'Djâtre sait,' s'fit Phl'ip Desclios qui veint m'vaie siez mé l'aut' sé - car j'sortis d'hôpita lé dgiex sept mars - 'Djatre sait, mais j'sis ti coument de t'érvaie siex té! I n'sen va pas t'enhanner, car tu t'en vas aver bein des gens v'ner t'vaie.'
'J'en s'srai bein aise,' j'lis rêponnis, 'et y'erra tréjous eun lèrmîn au found d'la bouteille pour les ravigotter.' 'Mais' le Phl'ip continuit, 'counte ten accident et ton séjour à l'hôpita coumme dé l'histouaithe passée, et, pour té dêlier l'esprit racounte mé ieune de tes sornettes du temps qu' tu 'tais à l'êtrangi.'
'Eh bein' j'lis dis, 'en v'chein ieune. Devant qu'les Japounnais nos fîtent la dgerre lus gouvernement publiyit un tas d'propagande countre nous pour préparer l'peuple. Ch'tait dans tchu temps-l'a qu'eun amîn a me' dans l'Ambassade me proposit eun dînmanche arlevée d'aller dans son car faithe eune tôuanné dans la campagne. Dans chu temps-là Tokyo én 'tait pas dutout si grand qu'achteu, et dans eune démi heuthe nou pouvait s'trouver en plienne campagne, entourés que d'villages agricoles iou qu'i' craissaient du riz. J'nos enfûmes et nos v'là tout d'suite dans chutte campagne superbe, parmi des clios d'riz et d'mounts pliens d'bois.
Mais, sus eune route à bein des teurses, bâtie sus l'haut d'eun embanquément presqu'à pic, men amin, qui cachait, se heurte dans l'drièthe d'un harnais cachi par eun vi'er paysan, et 'coup fit dêgringoler ava' la pente, hernais, ch'va et paysan dans le clios d'riz en d'sous. Le buonhoumme arrive à s'grappiner d'en d'sous du hernais et s'met à couathe au village, eun demié-mille à travers le riz, ouestque les 'jeunes patriotes' 'taient dans l'mittan d'eune demounstratioun countre la Grande Brétagne, et de ouesqu'j'taimes je l's entendaîmes hurler: 'A bas la Grande Bretagne, le cancer de l'orient'. Quand il' entenditent les nouvelles les v'là, toute la dgainge, eune chinquantaine ou pus, à marchi, en rangs militaithes, envers nous, avec lus drapeaux et l'dgaible à quatre en heurlant: 'A bas la Grande Brétagne'. Nous, jén pouaimes pas nos sauver, même bouogi, car not' esseu dé d'vant 'tait attrapé entre la route et la pente. J'nos entre ergardîmes, craignant qu'nos jours 'tait finis. Les 'jeunes patriotes' sé rangitent alentou d'nous et n'faisaient pas belle meine. Lus chef vient nos d'mander si j'taîmes Britaniques. Bein seux, j'dîmes qué oui, car malgré l'dangi je n'taîmes pas à même de nier not' nationalité.
Mais dès chu moment-là chein tchi s'dêrouallit fut bein différent de chein que j'avaimes craint. Le chef des Japounnais dounne eun ordre et trais ou quatre de sa brigade couathent d'aut bord d'la route, arrachent eun jeune sapin qui craissait là, l'fouare dsous not'esseu dé d'vant, le lèvent et nos r'mett' sus la route. Après s'être asseuthés que la vétuthe n'avait souffert de doumage et marchait coumme i'faut i's rangitent alentou d'nous en heurlant: pas 'A bas la Grande Bretagne' mais 'Eikoju banzai' - que la Grande Bretagne prospèthe chent milles ans.
Men amîn, qui 'tait deux ans pus vi qu'mé dans l'service et qui palait le Japounnais coumme eun natif, less r'mercyiet de tout not' tchoeur et lus offrit eun 'pourbèthe' pour aver eune peinte dé bièthe, mais lus chef les excthusit poliment, disant que j'tait eun grand pliaisi et privelege d'aver peut nos aidgi, et tous nos souhaitent buoanne chance et eun paisiblye értou' à Tokyo. Et pis, i's'enrfûtent à lus village heurlant, coumme lus avait préscrit lus gouvernement: 'A bas la Grande Bretagne, le cancer de l'Orient.'
D'même, chutte ptite histouaithe te fra mus coumprendre, mon chièr Phl'ip, pourtchi que, malgré toutes les choses affreuses qu'i' fitent duthant la dgèrre, j'n'ai jamais peu hair les Japounnais, coumme tant d'gens fount acquo au jour d'aniet. Y'a du boun et du mauvais dans tout l'mounde, qu'i' s'raient m'importe dé d'iou.
Mais me, qui counnais les Japounnais d'près, je s'rais preumi à admett' que ches d'drôles de pèrrots, bein difficiles à coumprendre. En dgèrre, i' sount des pus atroces, dans la paix i' sount des pus gentis et pus Amicaus du mounde' 'Tribunal de Brest', se fit l'Phl'ip Desclios, 'm'jai n' sais pas coumment qu'tu peus être amîn avec chutte sorte éd mounde-là' J'sais bein que me, avec tout tchit nos fitent duthant la dgèrre jé n'pourrais pas être de t' n'avis.'
Le vièr Trin'tais
30/4/1993
Viyiz étout: