Chein tchi nouos mantchit preunmiéthement ch'tait probabliément lé sé.. j'n'avions pas d'sé du tout... et pouor mé j'rapportais un coupl'ye d'boutelles d'ieau salée d'la mé... La Preunmié Tour, touos les jours... pouor pouver faithe d'la soupe et bouoilli nos pommes dé tèrre.... pa'ce qué i' y'avait pas d'sé... i' y'avait des gens qu'allaient... à la mé ramâsser d'ieau.... et il' êprouvaient à ê... à êvaporiser l'ieau... mais i' 'y'avait presqué pas d'sé du tout... j'trouvais qu'ch'tait mus, mé, d'apporter un coupl'ye d'boutillies d'ieau salée... et pi j'en faîsions sèrvi chenna pouor coutchi.... Y'avait pas... y'avait pas... j'n'avions pas grand's râtions et j'n'... quand vînt un temps j'n'avions pas d'pain du tout... j'feûnmes d'pis l'mais d'octobre jusqu'en Noué sans autchun pain... i' n'y avait pas d'râtions du tout j'avions.... y'avait pas d'pain pas pour les Allemands y'avait pas pouor nous ni n'tout... mais la vie 'tait sîmpl'ye... ou' tait duthe... et j'... et j'... j'crai bein qu's... j'vivions quâsiment... entchiéthement sus des... lédgeunmes... j'faîthions sèrvi des pânnais, des cârottes, des... patates, des ouognons dans... pouor faithe toutes sortes d'affaithes, même j'faîsêmes un bran avec des lédgeunmes... j'm'en r'souveins pas comment qu'j'lé faîsions mais i' tait divèrsément bouon... et j'faîsions d'la flieu d'patates... en râpant les pommes dé tèrre... et pi i' restait au fond... d'la tinne eune manniéthe dé pâte... et v'là qu'i fallait qu'i' fûsse s'tchi au solé et nou-s-avait eune flieu pouor faithe un p'tit mio d'galette ou un p'tit mio d' "pudding"... J'n'avions pas d'... j'n'avions pas d'café ni j'avions pas d'thée... fallait qué j'montrêmes un bouon mio d'îngéniosité pouor pouver... trouver tchique chose à baithe... j'êprouvîmes à faithe du café... à faithe du thée avec des fielles dé... dé nouoyi... j'les... j'les m'ttais à s'tchi... j'êprouvis avec des fielles dé... dé néthes gradiles... j'êprouvis avec des fielles dé ronche, mais ch'tait les fielles dé... dé nouoyi tchi 'taient les miyeurs actuellement... et pouor faithe du café j'creissions eune espêce dé pânnais... d'tchi qu'les Français appellent eune rave à chucre... et j'râpions chenna... et j'les m'ttais à s'tchi au fou... et pi... j'm'... j'les... j'en faîsêmes du café.
Transcription par FLM(?)
Viyiz étout: