J'ouiyais eune histouaithe l'aut' jour entouor un Irlandais tch'est hardi rîsibl'ye. Ch'est vrai tch'i' sont souvent dans les nouvelles ches jours, les Irlandais, à cause dé chein tchi s'pâsse dans l'Nord dé l'Irlande, mais i' faut admettre tch'i' n'sont pon touos mêchants, et i' n'y a pon à les battre pour lus bouanne heunmeu quand tout va bein.
Eh bein, un ouvriyi Irlandais tch'avait nom Pat d'mandit à san maître dé lî haûchi ses gages. "Si tu l'méthites," san maître lî dit, "jé s'sai content d'les haûchi, Châtchun a sa valeu - et l'cat a la sienne. Mais, tout d'abord, èrgardons tchi travas qu' tu fais dans l'couothant d'un an. Consultons l'calendri ensembl'ye. Comme tu peux l'vaie pour té-même, y'a trais chent souaixante-chîn jours dans l'année. Tu dors huit heuthes par jour. V'la tchi r'veint à chent vîngt-deux jours. Hale chent vîngt-deux dé trais chent souaixante-chînq, et v'la tchi nouos donne deux chent quarante-trais jours dé restant.
Nou sait bein qu' tout l'monde ont bésoin d'un mio d'èrpos touos les jours, ch'est en tchi tu'as huit heuthes dé laîsi par jour. V'la tchi r'veint à chent vîngt-deux jours. Chent vîngt-deux dé deux chent quarante-trais jours nouos laîsse chent vîngt-tch-uns jours. Comme touos les bouans Chrêtchiens, i' faut qu' tu'âge à l'églyise touos les Dînmanches, ch'est en tchi i' faut considéther les Dînmanches. Y'en a chînquante-deux dans l'année. Hale les chînquante-deux jours des chent vîngt-tch-uns tchi nouos restent. V'la tchi fait souaixante-neu jours.
"La vie es'sait bein triste si' fallait travailli trais chent souaixante-chîn jours sans vacances, et j 't'en donnons quatorze jours, dé vacances. Hale ches quatorze jours-là des souaixante-neu d'restant et v'là tchi nouos en laîsse chînquante-chînq.
"Tu n'travâle pon l'sanm'di l'arlévée. Nou n'peut pon s'y'attendre, car tu'es lâssé. V'là tchi r'veint à chînquante-deux d'mié jours, ou vîngt-siez jours entchièrs. Vîngt-six halés des chinquante-chîns tchi restaient auprès tes quatorze jours dé vacances nouos laîsse vîngt-neu jours.
"A ch't heu qu' ch'est l'habitude dé baithe et mangi duthant l's heuthes dé travas et entre les r'pas, i' faut considéther l'temps pèrdu à mangi la bouochie matîn et arlévée, et l'temps pour dîner dans l'mitan du jour - disons eune heuthe et chînquante-chîns munnutes par jour. Si tu cartchules ch'la comme i' faut, tu trouv'thas qué v'là tchi r'veint à vîngt-huit jours. Vîngt-huit des vîngt-neu tchi nouos restaient auprès l'temps pèrdu pour la bouochie nouos laîsse un jour. Eh bein, un bouan restant vaut mus qu' un mauvais rein, mais i' n'y' a même pon un jour dé restant, car j'té donne tréjous tan jour quand la fête dé St. Patrice arrive, pour qué tu piêsses prendre ta pliaiche dans la procêssion, driéthe la musique et l'gros tambour, tchi marche la londgeu dé la grand' rue pour célébrer chutte fête-là. Nouos v'là arrivés au drein jour des trais chents souaixante-chînq et j'n'avons pon 'couo arrivé à un jour dé travas. Comment qu' tu crai qué j'pouôrrais affaûrder à haûchi tes gages?"
"Eh bein, sémnâge!", s'fit nouot' anmîn Pat en grattant sa tête. "Tchi dgiâtre qu' j'ai 'té à faithe tout l'temps, don? Voul'-ous m'dithe qué j 'n'ai fait rein?"
"Eh bein, man garçon," san maître lî dit, "tu n'as qu'à cartchuler pour té-même. J't'ai donné touos les chiffres, et ch'est la mèrquéthie tchi sauve !"
La dreine fais qué j'vis Pat il 'tait acouo à cartchuler pour êprouver à prouver qu' san maître s'était trompé, mais i' n'avait pon 'couo arrivé à l'faithe.
George d'la Forge
Viyiz étout: