Les Pages Jèrriaises

La Dêcliathâtion

juthée par les compétiteurs des Jeux des Îles en Jèrri 1997

 

J'dêcliathons qué j'allons prendre part dans les Jeux des Îles de mille neu chents nénante-sept dans l'esprit d'amiêtchi entre compétiteurs, èrconnaîssant les règl'yes tchi les gouvernent, et auve lé d'si d'y participer pouor l'honneu de notre île et pouor la glouaithe du sport.  

Lé crapaud est l'symbôle du Jèrriais

 

Lé message d'beinv'nu des Gammes des Îles 1997 en Jèrri.

Un message dé Alan Cross,
Président d'l'Associâtion des Gammes des Îles

D'la part dé l'Associâtion des Gammes des Îles, j'veurs vos souhaiter tous la beinv'nue à la septième Gamme des Îles.

J'avons veu bein changements dans ches Gammes d'pis lus c'menchement en mille neu chent huiptante-chinq dans l'île dé Man.

J'avons hauchi lé neunmétho des sports dé sept à quatorze; deux fais d'pus dé competiteurs s'en vont prendre part; la qualité des gréements dé sports a 'té amendée, comme étout l'nivé dé la compétition dans touos les sports. J'sommes en dette à toutes les membres-îles qui continuent à supporter chutte êvén'ment touos les deux ans, partitchuliéthement les siens qu'ont té privilégyis d'être hôte ès Gammes. I' n'y a pas d'doute qué les Gammes des Îles ont donné eune strade hardi nécessaithe pour la compétition întèrnationnale et l'amiêtchi entre nos îles.

L'întéthêt dans les Gammes des Îles continnue à s'êntendre. Les médias et les donnants sont bein et peine d'en être partie, d's aut' îles qui n'sont pas membres ont applyitchi dé joindre not' Associâtion, et i'y a eune grande pression d'ajouôter pus des sports au programme. Les tchestions les pus împortants s'en vont être distchutés et rêsolus à seule fin dé dêtèrminner l'av'nîn dé l'AGI et ses gammes. Ch'est d'la pus grande împortance qu'autchun changement n'est pas au préjudice dé l'êvén'ment, et qué j'sommes tréjous èrgardés comme eune fanmille d'îlemans qui s'battent dans les "Gammes d'Amiêtchi".

J'sis enchanté d'souhaiter la beinv'nue chaleureuse à s'n Altesse la Prîncêsse Rouoyale, qu'a accepté, accouo eune fais, not' învitâtion d'ouvri les Gammes des Îles. Sa présence est spécialement apprêcyiée à cause dé s'n întéthêt dans les sports, et s'n expéthience comme compétiteuse dans les Gammes Olympiques. Ou comprend bein l'excitement dé l'occâsion, et oulle est tréjous dêtèrminnée d'rencontrer autant qué pôssibl'ye des siens qui s'en vont prendre part duthant sa courte visite. J'espéthons qu'ou jouie d'sa visite en Jérri, et qu'ou pouorra étre ès êvénements fututhes des Gammes des Îles.

J'crai que l's espéthances pour l'orginanisâtion des sports chutte sémaine sont hauts. Jèrri s'est bein apprêté pour hôte ès Gammes. Les gens dé l'île ont prépathé un solide Conmité d'Organisâtion m'né par Peter Pitcher, et il' ont r'chu lé mangnifique support des Êtats d'Jèrri et des compangnies locales.

J'sis seux qu'Jèrri s'en va donner eune excellente strade pour les Gammes mémorabl'yes. Les gréements qu'j'vos offrons sont d'un dîngne nivé et j'anticipons qu'les sports es'sont bein supportés par les spectateux locaux. Tout nos promets eune supèrbe huitaine dé compétition, auvec d's opporteunités pour la promotion des rapports même pus près et des lians d'amiêtchi acouo pus duthe entre l'publyi des Îles.

Mes espéthances sont que, s'ous êtres compétiteu, officyi ou spectateu, ous allez vos joui de chutte sémaine dans not' belle île de Jèrri, qu'ou faites des nouvelles amiêtchies qui duth'ont tréjous, et qu'ous remporterez des bouonnes mémouaithes des Septième Gammes des Îles.

La beinv'nu et bouonne chance!

 

 

Viyiz étout:

 

 

Les Pages Jèrriaises