Les Pages Jèrriaises

Les Jeux Întèrvilles

 

St Hélyi

 

Ch'est la Pâraîsse dé St. Hélyi tchi vos învite ès Jeux Întèrvilles ch't' année, lé vîngt-deux et l'vîngt-trais d'Juilet duthant la Faithe Jèrri-Nouormandie.

Les preunmièrs Jeux Întèrvilles prîntent pliaiche en mil neu chents nénante deux dans la Pâraîsse dé St. Jean. Ch'fut l'idée du Connêtabl'ye Jean L'Sueu dé jouer des gammes à seule fîn d'renforchi les lians entré les villes en Nouormandie et lus Pâraîsses-parchounniéthes en Jèrri.

I' rassemblyit don eune dgaîngue bein enthousiaste dé Pârouaîssiens tchi travaillaient ensembl'ye pouor considéther coumme tchi aver du fanne et faithe en même temps eune êchange des difféthentes tchultuthes.

Il' eûtent l'idée d'aver des "Gammes Sans Frontchiéthes" auve des stâlles et des stands, pouor vendre des produits Nouormands, et eune strade étout pouor mouontrer l's artistes des deux tchultuthes.

L'occâsion fût un grand succès et nou dêcidit d'aver l'êvénement touos les deux ans - en altèrnance entré la Nouormandie et Jèrri.

Les preunmièrs Jeux en Nouormandie prîntent pliaiche à Villedieu-les-Poêles en mil neu chents nénante quat'.

Les préchains Jeux 'taient à Ste. Mathie en mil neu chents nénante six, et à Avranches en mil neu chents nénante huit.

Auprès les cheins à St. Hélyi, les préchains Jeux es'sont à Longue-sur-Mer en deux mille deux, et pis ché s'sa l'tou à Grouville en deux mille quat'.

Les gângnants des jeux avaû l's années ont 'té:

Achteu, y'a sept Pâraîsses tch'ont trouvé des "jeunmieaux" en Nouormandie et tchi lus en vont prendre part ch't' année.

Coumme tréjous y'étha sept êtchipes auve lé même nombre dé compétiteurs Jèrriais et Nouormands dans châque êtchipe.

L'amiêtchi entré les membres d's êtchipes a 'té bein tchultivé - et chenna a aîdgi lé "jumelage" des deux communautés.

Autchun profit généthé par l'êvénement ch't' année es'sa donné à l'Êcole du Mont à l'Abbé et à "Sport pouor l's handicapés".

 

 

Viyiz étout:

 

 

Les Pages Jèrriaises