Le Ménage ès Feuvres,
St. Ouën.
Lé 18 juilet, 1970.
Moussieu l'Rédacteu,
Quand j'tais à l'entèrrement d'un vièr anmin l'aut' jour et qué j'viyais l'bieau grand moto tchi fait sèrvi d'hèrse au jour d'aniet, j'pensais à la hèrse atout des plieunmes sus l'haut des deux côtés, halée par un nièr chéva tch'en avait ieune sus l'haut d'la tête étout, tchi portit ma grand-grand-méthe (née Elizabeth L'Brun, veuve dé man grand-grand-péthe Jean Thomas) au chînm'tchièthe en 1895. J'n'avais qu' quatre ans dans chu temps-là, mais j'm'en r'souveins - dé ch't entèrrement-là - comme si ch'tait aniet. Dans chu temps-là, la mort et l's entèrrements 'taient affaithes solonnelles, et comme mousse j'en 'tais hardi împressionné.
Lé corps 'tait tréjous gardé dans la maiethon, et touos les ridgieaux des f'nêtres 'taient bas jusqu'à la sortie du corps pour l'entèrrement. Y'avait toutes sortes d'crianches au sujet des morts. Aut'fais l'côffre était couvert dé fielles dé dgèrrue et d'louothi, symboles d'immportalité. I' fallait qué l'corps sortîsse dé la maiethon les pids l'avant. Ch'tait souô-disant pour l'empêchi d'vaie sa maiethon et d'pouver r'trouver san c'mîn comme érvénant! Dans l'églyise, un laïc 'tait pliaichi les pids l'avant d'vant l'autel, l'idée étant qué quand i' s'rêvill'lait à la résurrection i' s'sait en fache dé l'autel quand i' s'mâtt'tait d'but. Ch'tait l'contraithe pour un minnistre. Il 'tait pliaichi la tête à l'autel pour qué quand i' s'butt'tait à la résurrection i' s'sait en fache dé sa congrégâtion pour les béni.
Dans les touos vièrs temps i' sonnaient la clioche dé l'églyise dé bouanne heuthe lé matîn d'l'entèrrement, et i' continnuaient à la sonner jusqu'à l'arrivée du corps. Il' appelaient ch'la rompre l'chînm'tchièthe. Oulle est sonnée acouo un jour d'aniet, mais seulement à l'arrivée du cortège à l'églyise, et oulle est sonnée au pas d'l'entèrrement.
Ch'tait la couôteunme d'aller à l'églyise lé dînmanche auprès l'entèrrement pour prendre lé deu. Les membres d'la fanmile prannant l'deu, au sèrvice, s'assiévaient dans les bancs dé d'vant et restaient assis duthant tout l'sèrvice, et nou n'dévait pon pâler en s'en r'allant à la maiethon. Nou couvrait les mitheurs atout un blianc lincheu dans la maiethon au moment d'la mort pour qué l'âme né pûsse s'y vaie. Et dans les touos vièrs temps eune veuve changeait sa bague dé neuches au maitre-dé pour aver bouanne chance - s'èrmathier?
Ieune des vielles crianches était qué si un corps pâssait l'dinmanche dans la maiethon, un autre dé la fanmile mouorrait d'vant longtemps, et qué si la porte 'tait laîssie ouvèrte auprès qu'un corps 'tait sorti d'la maiethon un autre lé siéthait d'vant siex mais. Si y'avait deux morts dans un vaîthinné, il 'tait seux d'y'en aver un traisième!
Aut'fais, ch'tait considéthée charitabl'ye dé donner, d'vant mouothi, du fronment pour êt' moulu, et l'pain distribué és pauvres lé jour dé s'n entèrrement, et au Recteu d'la pâraisse du défunt eune certaine somme d'argent pour faithe un prêche à l'entèrrement. En pensant à chutte vielle crianche-là, j'mé d'mande si, pour y donner êffet, lé pouorre malade 'tait avèrti tch'i' s'en allait mouothi, chein tchi s'sait absolûment contraithe à la couôteunme d'à ch't heu dépis qu' nou-s-êprouve à lî donner un mio d'couothage en lî disant tch'i' s'en va s'èrfaithe!
Auprès un décès, l'temps passé, et n'y a pon 'couo bein d's années qué v'là tchi n'sé fait pus, nou-s-avèrtissait déliêment, en pèrsonne, les pathents, et nou les priait dé v'nîn à l'entèrrement, comme, étout, l's anmîns, vaîthîns ét autres. Quand j'tais mousse, j'ai connu un homme tch'était prieux d'entèrrements, et i' m'sembl'ye qué j'lé vai acouo v'nîn siez Papa, à la forge, l'avèrti d'un décès et l'prier d'aller à l'entèrrement. J'pense qué chutte couôtunme-là duthit jusqué dans les 1930. À ch't heu, sans doute, nou fait ch'la sus la gâzette et par la poste.
D'èrtou d'l'églyise, nou donnaît étout aut'fais un dîner d'entèrrement à la maiethon du pus près pathent du défunt. Ch'là couôtait hardi d'sou. Lé festîn duthait, bein seux, tandi qu' y'avait du baithe, et d'amors, ayant c'menchi en tristesse, finnissait en rêvillon!
Quand i' s'agissait d'la nobliéche, étout, nou faîthait un tas d'affaithes et d'quant-à-moué, et l'sèrmon du Minnistre en 'tait d'autant pus long.
Eune aut' vielle crianche entouorre la mort 'tait qué si eune pérsonne s'èrvait - chein tchi n's'arrive pon souvent - oulle est seûthe dé patchi ses tailes dans l'couothant d'un an! Et quand eune entèrrement et des neuches s'adonnent lé même jour à l'églyise, i' fallait qu' l'entèrrement fûsse faite dévant les neuches. Ch'tait mauvaise chance autrément!
Heutheusement qué jé n'sommes pon êffrités par un tas d'crianches dé même à ch't heu. Comme nouos dît l'bouan vièr Pape Jean XXIII duthant sa dreine maladie Autchun jour est bouan pour maitre, et autchun jour est bouan pour mouothi!
George d'La Forge
Viyiz étout: