'A chein qu'nou m'dit', s'fit l'Ph'lip Desclios lautr'sé, 'I' parait que quand tu 'tais au Foreign Office, tu n't'accordais pas avec le sieur George Brown, qui 'tait Sécrétaithe d'Etat. Est ch'vrai?'
'Ah, mon Ph'lip,' j'lis rêpounnis, 'tu peux bein l'dithe! J'ai counnu et servi pusieurs Sécrétaithes d'Etat, et avec la puspart j'm'accordais bein, mais avec George Brown j'n'avais que du brit et du fracâs.
Dans son temps j'tais Souas Sécrétaithe d'Etat en chèrge éd nos affaithes avec
l'Orient et l'Asie du Sud, et li et me je'n' 'taimes pas du tout d'eun avis au sujet d'not' politique envèrs le Vietnam. Mais Georges én 'tait pas accouôtumé a aver des founctiounnaithes argumenter avec li. Toutes les fais que j'allais l'vaie, ou que je l'recountrais dans les passages de l'office i' jurait coumme eun abrutit et m'app'lait toutes sortes éd choses, voyou, salaud, bâtard, et d'même. Mais i' 'tait tréjous les trais quart plyein, et j'n'y prenais pas d'avis.
Mais eune buoanne bordée qu'i' m'avait insulté pus qu'amors et qu'j'en avais ieu assez j'lis dis: 'rgardez, Moussieu l'Sécrétaithe d'Etat, ous êtes tréjous a m'faithe des teurbleudes, mais, bah, ch'n'est qu'en angliais et les jurouns anglais ne valent pas chi, i' lus manque d'esprit. J'm'en vais vos en apprendre tchiques raides bouans en jérriais', et j'l'en dounnis eune douzainne que j'avais apprînt y'a septante ans du vier Ph'lip Cabot, Counnétablye éd la Trin'té la bordée que j'min feu au Tas d'Geoun. Le George Brown m'êcoutit tout ravi et m'dit: 'Mais i'm'paraissent en raides bouoans, ches-là! I' faut
que tu m'les apprendes.' Et j'les li fis apprendre et érpéter tant et si bein
qu'i' les savait sans fautes ou mêprinse. Dès chu jour-là i' jurait coumme
autcheun bouan Jèrriais, pas seulement countre memais countre touas les autres
du Foreign Office qu'i' rencountrait, et quand il avait bu eune fais, ch'est à
dithe touas les jours, nous entendait des bouans jurouns jèrriais partout
l'Bâtisse.
Ch'n'est pas pour dithe que dépis chu jour-là l'attitude de
George Brown envers me s'adouochit. Je' voudrais pas faithe à craithe que ma
tâche au foreign Office duthant son temps fu eun grand succès, bein au contraithe,
mais si je n'fis fein d'autre au mains j'mîns p'têtre le George Brown en
miyeuthe humeu' qu'i'n'tait d'amors!'
Le Ph'lip Desclios s'êbouffit d'rithe. 'Javais déjà entendu
de pusieurs persounnes les bêtises que t';avais fait dans ton temps, mais, ma
fé, j'n'éthais jamais creu qué t'éthais apprîns à eun Sécrétaithe d'Etat à jurer en jérriais. J'sis bein seux qu' 'tais le seul dans l'histouaithe du
Foreign Office qu'ait fait dité'.
'Ch'n'est pas seulement', j'lis dis, 'par les grandes counferences internatiounalles, par le rapport entre les gouvernements que la diplomatie s'fait. I'faut étout le bouan sens dans l's affaithes de jour en
jour. Ch'tait chu buoan sens-là tchi fit Ernest Bevin, qui c'mentchi à gagner
son pain a déliv'rer des ledgeumes et d'la viande maisoun par maisoun, eun si buoan Sécrétaithe d'Etat avec tant d'succès. et ch'tait chu buoan sens-là tchi mantchait à Anthony Eden, tout suave et av'nant qu'i' paraissait. Ch'tait eune vraie mînséthe à travailli avec li, pas parc qu'i jurait coumme George Brown, mais parc'qu'i traitait ses founctiounnaithes coumme la poussiéthe souas ses
bottes. J'ai servi avec bein des Sécrétaithes d'Etat, aristocrates et socialistes, mais les deux que j'aimais l'mus, ch'tait Ernest Bevin, socialiste, et Douglas Home, aristocrate, qui d'veint Preumié Ministre et 'tait
le quatorzieme coumte Home of the Hirsel. I'taient touas les deux de si différente parentage et d'êl'vage, mais i'taient vrais messieus.
'V'là tchi fait' j'countinuis, 'que ch'r'est pas de iou qu'nou' veint, mais tchi sorte éd houmme nous est tchi coumpte. Y'a des messieus et des salauds dans touts professioun. Et si not'mêtchi est diplomate, coumme le mein,
i'n'faut jamais oublier chutte buoanne leçoun.
Le Vièr Trin'tais
1994
Viyiz étout: