Les Pages Jèrriaises

L'Armistie!

San Antonio, Texas,
U.S.A.
Lé 27 janvyi, 1973

Moussieu l'Rédacteu,

À la fîn des fîns! Ch'est aniet l'jour du "cêsse-feu" entre l's armées d'la dgèrre du Vietnam - eune dgèrre tch'a duthé l'travèrs des gestions dé deux Présidents d's Êtats-Unis. J'dis l'"cêsse-feu" car ch'est l'mot qu'nouot' bouan Président Richard Nixon a fait sèrvi pour nouos annoncer la fîn d'la dgèrre - ch'est à dithe qué j'l'espéthons, qu'ch'est la fîn. Jé n'sai pon s'i' y'a autcheune difféthence entre un "cêsse-feu" et eune armistie. J'créthais qué ch'est la mème chose car lé dictionnaithe Larousse nouos dit qué eune armistie est "Eune suspension d'armes et interruption momentanée des hostilités par accord mutuel".

J'sommes dêjà à faithe d's arrangements dans l's hôpitchaux pour èrchéver les prisonnièrs Améthitchains d'gèrre tchi s'en vont êt' libethés par lé Vietnam du Nord, et lus donner autchuns soins nécessaithes dévant l's env'yer siez ieux. Ch'est un grand jour dé jouaie et d'espéthance pour lus fanmiles, ouaithe qué les fanmiles des cheins tchi sont annoncés seulement comme étant "mantchant" s'en vont êt' acouo gênés jusqu'au moment d'saver pour seux s'i' sont du nombre des prisonnièrs tchi s'en vont r'vénîn.

J'avons ieu des jours dé deu national à ches drein. Deux ex-Présidents (Messieux Truman et Johnson) sont morts et entèrrés dans l'couothant d'un mais, et la nouvelle qué l'armistie 'tait en veue a 'té un mio attristée par la mort dé l'ex-Président Johnson. Tchiques jours dévant san décès, l'Président Nixon lî'avait dit qu'oulle 'tait seûthe d'êt' arrangie dans p'tit d'temps, mais il est mort sans l'saver pour seux. J'en avais r'gret pour li quand j'viyais s'n'entèrrement par télévision, car chutte dgèrre-là avait 'té un gros fardé tch'il avait ieu a suffatchi tout l'temps d'sa gestion. Ch'est r'mèrquabl'ye étout, qué ch'tait l'ex-Président Truman tch'avait ieu la responsabilité d'la décision d'faithe sèrvi la bombe atonmique pour faithe lé Japon s'rendre et finni la deuxième grand' dgèrre. Enfîn, les v'là touos les deux au r'pos êtèrnel oï'est qu'la paix du Bouan Dgieu "surpasse tout entendement" comme nouos l'dit La Litourgie.

J'espéthe qué ch'est la fîn d'toutes les dgèrres, mais ch'est p't êt' trop à espéther. Mais y'a des chances qué les jannes tch'ont 'té tant contre chette-chîn et tch'étaient, à m'n idée, craintifs d'aver à y'aller, s'en vont oublier lus dgèrre pèrsonnelle contre l'autorité d'gouvèrnément, d'pathents et d'êcole, et s'mett' à êtudier honnêtement pour asseûther l'av'nîn prospéthe dé chu grand et bouan pays d'Améthique.

Un anmîn mé d'mandait l'aut' jour s'i' y'avait d'la difféthence entre lé sort du monde d'ichîn et d'aut' pays. "Eh bein," j'lî dis, "deux professeurs d'univèrsités, iun d'ichîn et l'aut' dé la Hollande, ont fait des r'chèrches qu sujet, et il' ont trouvé qué deux tchièrs des Améthitchains tch'ont fait des sou duthant les dreines années s'attendent qué v'la tchi s'en va continnuer, et qu'un tchièr seulement des gens d'Europe ont ch't espéthance-là. En temps d'prospéthité, l's Améthitchains dêpensent, sans peux ni hésitâtion, lé gros r'vénu tch'i' s'attendent d'aver d'main. Dans l's aut' pays i' pensent pûtôt à piéchi l's êconomies d'hièr. Quarante pour chent d's Améthitchains craient qu'ch'est eune bouanne idée d'laîssi lis femmes travailli dans l'connèrce quand mème tch'il' aient d's êfants. Dé mème, il' atchumulent des sou et vivent gras. Dans d'aut' pays, un homme sus dgix seulement est d'la mème idée.

"Pus d'deux tchièrs des péthes Améthitchains lus attendent d'env'yer lus garçons à l'univèrsité, contre un tchièr seulement des péthes d'aut' pays."

Tout ch'la montre qué l'peupl'ye Améthitchain est adèrt au progrès et prêt à ristchi et prendre eune chance. Comme nou dit en Jèrri, pour li ch'est à la chance et au p'tit bonheu! I' peut s'adapter au changement et à l'êvenèment du jour, et tout va pus vite en Améthique qu'ailleurs. Chutte acceptâtion d'changement et d'progrès mène à l'idée d'acouo pus d'améliorâtion et d'atchumulâtion d'beins et aîgue l'êconomie du pays viyant qué tant pus d'bein siez l'îndividu, tant pus d'èrvénu pour lé gouvèrnément.

Pour dé mé, ch'est magnifique pour les jannes, tout chu tripot-là d'la vie. J'ai 'té l'travèrs dé tout chenna ayant 'té ichîn chînquante ans. Mais ayant veu la vie paîsibl'ye d'un fèrmyi en Jèrri dans man janne temps, j'sis v'nu à penser, dans mes vièrs jours, qué san sort 'tait bein pus heutheux qué l'chein d'l'homme tch'a ieu à lutter contre l'tîntamârre dé la vie modèrne en Améthique. Sans doute lé "Marchi Commun" né complyitchait pon la vie du fèrmyi en Jèrri quand j'tais mousse!

George d'La Forge

 

Viyiz étout:

 

Les Pages Jèrriaises