Le Ménage ès Feuvres,
St. Ouën.
Lé 13 septembre, 1969.
Moussieu l'Rédacteu,
Quand j'vai tch'est tch'i' s'passe ches jours en Irlande à cause dé difféthentes opinnions réligieuses, v'la tchi m'fait penser à persétchutions des vièrs temps, et qu'ch'est vrai qu'l'histouaithe sé répète avau les siècl'yes.
Dans ma lettre du 28 juin de ch't année, j'vouos pâlais des cruelles punnitions dé y'a quat' chents ans pour tchiques mêfaits qu'nou n'créthait pon êt' dé grand' conséquenche dé nouos jours, mais ché n'tait rein à compather ès cruautées faites au nom d'la réligion - par Protestants aussi bein comme Catholiques - dans l'temps du règne dé la Reine Marie (1553-1558) en Angliétèrre, tch'avait mathié l'Prînce (pus tard Rouai) Ph'lip d'Espangne, et souos les rouais d'France à ch't êpoque-là. Les Tableaux Historiques dé John Patriarche Ahier nouos dîsent qué l'întoléthance et la cruauté, et l'esprit d'Calvîn et l'chein des Papes, volaient comme des vautours sus les camps d'carnage. Brûlez sans pitié les hérétiques, dîsaient les Catholiques, et, à lus tou, Calvinistes criyaient Frappez sans miséricorde les Papistes prédestinés à être les ennemis de la vraie parole du Christ!
Ch'tait en 1530 qué la persétchution des Protestants avait c'menchi en France. Jèrri 'tait dans l'diocèse dé Coutanches. Sire Richard Mabon, Curé d'la pâraisse dé St. Martîn, avait 'té nommé Douoyen d'l'Île en Fevri, 1509-10, et comme la Chronologie d'Jèrri (par E.T. Nicolle et Ralph Mollet) nouos dit tch'i' mouothit en 1543, ch'tait li tch'était douoyen dans chu temps-là. Nou n'peut pon l'oublier, lé Sire Mabon, car châque fais qu'nou va à La Hougue Bie, et qu'nou-s-est r'chus comme des rouais par lé Sieur Hêlyi Vibert et sa charmante damme, touos les deux av'nants et compliaisants, nou vait la chapelle dé Notre Dame tch'il avait bâtie en 1521. Il avait 'té à Jérusalem, et ch'tait auprès tch'il en r'vînt tchi la bâtit en mémouaithe du Saint Sépulcre dé Notre Sauveur. I' pathait tch'i' fit eune forteune à faithe accraithe au monde qué lé p'tit sanctuaithe tch'i' bâtit contre l'but est et au bas d'la chapelle, èrsembliait au Saint Sépulcre, et qu'La Sainte Vièrge Marie v'nait l'rencontrer là souvent, et i' y'allaient en grand nombre en pélérinage. I' n'mantchait pon d'faithe la collecte châque fais, sans doute, et s'n entréprînse prouvit profitabl'ye, mais j'vouos asseûthe tch'i' n'y a autcheune èrsembliance au Saint Sépulcre, qué j'ai mé-mème veu à Jérusalem. Les Tableaux Historiques nouos dîsent qué l'Douoyen Mabon fut suspendu d'ses fonctions par les Calvinistes. Il' avaient convèrti un tas d'Jèrriais, et mème cèrtains des prêtres Catholiques, par chu temps-là, et les prêtres nouvellement convèrtis fûdrent pèrmîns d'rester minnistres dé lus églyises parouaîssiales en promettant dé s'conformer ès nouvelles crianches, et en fournissant caution d'lus louoyale convèrsion. Un acte d'la Cour, en date du 4 mai, 1548, nouos dit qué John du Soulement et John Payn fûdrent les cautions dé Jacques J'valyi, minnistre dé St. Martin dé Grouville, et tch'i' continnuit à jouï d'san bénéfice.
Mais pour èrvénin ês persêtchutions réligieuses dé l'êpoque, i' pathait qué Dgèrnésy en souffrit hardi. Les Tableaux Historiques nouos dîsent qué trais femmes fûdrent brûlées viyant tch'il' 'taient Protestantes, mais Jèrri n'en souffrit pon fort. I y'eut des vengeances entre Catholiques et Protestants, mais pon d'violence barbare. Les millieuthes fanmiles dé l'île 'taient Protestantes. Des Calvinistes dé France s'étaient r'fugiés en Jèrri et lus prédicâtions ayant convèrti un tas d'monde, quand la Reine Marie mouothit en 1558 et qu'ou fut rempliaichie par la Reine Elizabé, la réligion Anglicane fut êtabl'yie pour bouan dans l'Île.
Ch'tait en Nouormandie qué la violence fut tèrribl'ye, à ch'qué l'Sieur John Patriarche Ahier nouos dit dans san livre. Les Calvinistes, appelés Huguenots, 'taient pèrsétchutés maugré l'êdit d' 1562 concèrnant la suspension des condamnâtions en affaithes dé réligion, et des réformés fûdrent êbieillis et traînés dans les rues d'mème. Les Seigneurs Calvinistes dé Houesville et de Cosqueville fûdrent hachis en morcieaux et donnés ès tchians à Valognes. Jean Giffard (p't êt' iun d'mes pathents du côté matèrnel!) fut pitchi sus eune brotchette dé tchuîsinne tchi li passit l'travèrs du corps, et i' fut rôti vivant! Ch'n'est pon ravissant tch'i' s'en v'naient s'èrfugier en Jèrri!
L'histouaithe est plieine dé ches êvenèments-là, et j'avions ieu la chance dé n'aver pon 'té au rang des vivants d'ches temps barbares-là. J'éthions-t-i' ieu l'couothage dé nouos crianches? Quant à mé, j'sis content d'n'aver pon ieu à êt mîns à pathelle êpreuve! Si les grosses têtes, civiles et ecclésiastiques, dé chu temps-là, pouvaient r'vénîn d'nouos jours, i' né s'saient probabliément pon ravis d'vaie l'êtat des choses en Irlande du Nord, mais i' trouvethaient, Dgieu mèrci, un difféthent spectacl'ye en Jèrri. J'ai veu et ouï un prêtre Catholique Romain prêchi l'sérmon dans la tchaîthe dé l'églyise Anglicane dé St. George, où'est qué j'fus bâptisi, et ch'n'est rein d'liéthe dans la gâzette qu'un sèrvice eut lieu dans eune églyise ou eune chapelle non-conformiste auve prêtres Anglican et Catholique et pasteur Méthodiste y prannant part en mème temps! Si iun ou l'autre n'accordent pon tout à fait en matchiéthe dé crianches, il ont au mains assez d'avis d'nouos jours dé travailli ensembl'ye et en paix pour l'avanchement du Rouoyaume des Cieux sus la tèrre!
George d'La Forge.
Viyiz étout: