Les Pages Jèrriaises

Lé Jeu dé Saute-Mouton


 


Un r'cit du jeu comme il 'tait joué à lEcole Wesleyenne dé St. Ouën quand j'tais mousse 'l'y'a souaixante ans.

Lé jeu est appelé "Saute-mouton" viyant qu'la maîntchi des joueurs jouent auve lé dos baîssi comme des moutons, et qu'l'aut' maîntchi lus sautent sus l'dos.

Un côté est appelé "Les Moutons" et l'aut' côté "Les Sauteurs". Chînq joueurs dé châque côté est l'miyeu nombre, ouaithe qué j'en ai veu pus, mais viyant tch'i' faut que l'preunmié sauteux êprouve à sauter par-dessus touos les dos en d'vant d'li, chînq est l'nombre idéal.

Deux des grands garçons chouaîsissent châtchun lus côté. I' pattent pour décider létché tch'étha l'preunmié chouaix, et pis i' font lus chouaix iun à la fais jusqu'à qu'châque côté ait ses chînq joueurs ou aut' nombre décidé entre ieux.

La préchaine chose est d'patter accouothe eune fais pouor décider létché des deux côtés tchi s'en va êt' les moutons pouor quémenchi. Lé côté gângnant chouaîsit tréjous d'êt' lé côté sautant.

Lé pus grand et l'pus fort des moutons est chouaisi pouor êt' lé “Pilyi" d'san côté. I' s'met d'but et s'cramponne du mus tch'i' peut à la muthâle, au fôssé, bâtisse ou objet chouaisi d'un bord dé l'empliaichement du jeu. Lé deuxième sé baisse lé dos et met sa tête à la hauteu du driéthe du Pilyi et gaffe lé bas d'sa câsaque ou corset d'oeuvre atout ses mains, eune main à châque côté d'sa tête. D'la même maniéthe, chatchun des trais aut' moutons s'cramponne à la casaque ou ès habits du chein en d'vant d'li, tête à san driéthe.

Eune fais touos les moutons en pliaiche, les sauteurs sé rangent à eune douzaine dé marches en lîngne driéthe ieux. Lé pus grand s'met à drouaite dé la lîngne pouor sauter l'preunmyi, viyant tch'i' faut tch'il êprouve à sauter par-dessus touos les dos en d'vant d'li jusqu'au Pilyi pouor donner du run ès cheins tchi sautent souotre li.

Lés sauteurs lus avolent et sautent sus l'dos des moutons, châtchun à san tou, iun auprès l'autre, et lus cramponnent du mus tch'i' peuvent, lé preunmyi au Pilyi et châtchun d's autres au dos du chein l'avant à li - sénon l'drein. I' faut qué ch't'ilà saute comme touos l's aut' et, i' peut s'cramponner ou s'attraper au dos du chein l'avant à li en sautant, mais seulement pouor un moment pouor sé balanchi. I' n'peut pon continnuer à sé t'nîn bouan viyant qué, pouor que les sauteurs gângnent, i' faut tchi' cliape ses mains en l'air trais fais d'siette en criyant : “Ieune, deux, trais - les moutons sont sautés!” S'i' drisse hors dé d'ssus l'dos du mouton en criyant ch'la, les sauteurs ont pèrdu et changent dé pliaiche auve les moutons. Si les sauteurs l'avant à li n'li' ont pon laîssi assez d'run pouor sauter et s'balanchi longtemps assez pour crier "Ieune, deux, trais - les moutons sont sautés” en cliapant les mains en l'air trais fais, les sauteurs ont pèrdu étout.

Si touos les sauteurs peuvent rester en pliaiche sus l'dos des moutons sans tchulbuter ou mett' pid à terre jusqu'au moment qu'lé drein ait annoncé qu'les moutons sont sautés, il' ont gângni. I' r'dévalent et lus rangent pouor lé préchain saut, et les moutons restent en pliaiche.

Si iun ou pus des sauteurs tchulbutent en sautant ou d'vant qué touos l's aut' aient sauté, ou qu'iun ou pus des sauteurs mettent pid à terre auprès aver sauté et d'vant ouï l'annonce qué les moutons sont sautés, les sauteurs ont pèrdu et i' faut tch'i' changent dé pliaiche auve les moutons.

Si les moutons, individuellement ou collectivement, né peuvent pon supporter l'paids des sauteurs et tch'i' s'êcroulent quand l'saut est en allant, il' ont pèrdu et lé jeu èrquémenche et i' continnuent à êt' moutons. Il' ont pèrdu, étout, si autchun d'ieux pèrd sa gaffe des habits du chein d'vant li ou s'laisse êt' s'pathé d'li quand l'sauteux li tchait sus l'dos, l'co ou la tête, et lé jeu èrquémenche et i' continnuent à êt' moutons.

Lé jeu dé Saute-mouton est rude. I' n'tait pon trop populaithe parmi les pathents viyant qué v'là tchi dêchithait l's habits. Quand un mousse 'tait "Mouton", lé bas d'sa câsaque 'tait souvent trilyi ou même en chiques. S'il avait un corset d'oeuvre - et 'l'y'en avait gentiment viyant qu'les femmes ouvraient hardi dans chu temps-là - 'l'y'avait des chances qué l'driéthe du corset né duthîsse pon longtemps. Lé mouton gaffait ch'la à la pouongnie pouor sé tnîn bouan quand l'sauteux lî tchiyait sus l'dos ou sus l'co ou la tête, et v'là tchi donnait eune raide sécousse à la pouongnie d'laine!

'L'y'avait l'dangi, étout, dé dêslotchi l's êpaules ou l'fi du dos du “Mouton" ou d'lî vilanner les mains ou l'driéthe d'la tête par lé paids du sauteux et l'êtoffe grôssiéthe dé ses habits. Mais i' faut penser qu'la Providence protège les mousses, car j'n'ai janmais veu pèrsonne subithe grand ma en jouant à Saute-mouton!


George F. Le Feuvre
1960



Note dé FLM: Ouaithe qué l'jeu fusse connu à St. Ou et par ailleurs comme "Saute-mouton", du côté d'la Ville nou l'app'lait "Solimatoo", chennechîn étant l'angliaîchîn dé chein qu' lé drein sauteux criait en cliapant ses mains. Quand il avait sauté i' cliapait ses mains trais fais en criant "Sale est man tchu!" Ch'la ch'tait êvidemment eune couôteunme des êcoles des alentours dé la Ville et dé tchitch'eunes dé l'Êst; mais cèrtains anciens d'l'Êst nouos ont pouortant dit tch'i' n'avaient jamnais ouï pâler d'chenna. V'là tchi n'pathait pon aver 'té connu dans l'Ouêst ; nou criait, comme lé dit l'Sieur Lé Feuvre, “Ieune, deux, trais - les moutons sont sautés!”

 

 

Viyiz:

 

Les Pages Jèrriaises