La Ménage ès Feuvres,
St. Ouën.
Lé 24 juin, 1972.
Moussieu l'Rédacteu,
J'viyais dans la gâzette du 21 dé chu mais qu' un moussieu Angliais crait qu' Jèrri est dgiex ans en arrièthe quand y'a tchestchion d'punni les cheins tchi font sèrvi du cannabis et aut' drogues. J'pense tch'i' bâse sén opinnion sus l'fait qué nouos Cours les punnissent trop sévéthement, et i' s'en va v'nîn en Jèrri pour s'en entchêter et nouos donner d's avis. Eh bein, à m'n idée, nou n'peut pon êt' trop sévéthe dans des cas d'mème s'i' y'a autcheune espéthance dé d's'encouothagi l'trafi des drogues. Si les Cours dé Justice sont îndulgentes, les cheins tchi s'abandonnent à chu vice-là s'sont encouothagis à continnuer l'mêfait.
Les drogues sont la cause dé bein pus d'mînséthe, sustout en Améthique, que nou n'pense. Là, un tas d'soudards ont prîns l'habitude à la dgèrre du Viet Nam, et i' veulent la continnuer dans l'civil auprès tch'i' sont dêmobilisés. Heutheusement, l'affaithe n'est pon si piéthe en Jèrri, et j'crai qué l's autorités ont raison d'êprouver à aboli l'trafi.
Eune aut' chose qué j'ai r'mèrtchi dans la mème gâzette est lé p'tit but tchi pâle des êvènements dé y'a septante-chînq ans. Ch'tait l'occâsion du jubilé d'Sa Majesté la Reine Victoria pour célébrer souoxante ans d'san rêgne, et j'm'èrsouveins tout à fait bein d'aver veu l'arche dé triomphe au haut d'l'Avenue Victoria, tch'est photographiée dans la gâzette du 22 d'juîn, et montrée auve l'articl'ye du Sieur Leslie Sinel au sujet d'la célébration du jubilé. J'avais quâsi siex ans dans l'temps, et Manman m'avait emmené auve lyi en ville pour vaie la fête. J'vînmes les procêssions et les soudards dans l'Vièr Marchi, et j'ouînmes la Mûsique dé nouot' Milice Rouoyale et des rédgulièrs (lé régiment Wiltshire) jouer Dgieu sauve la Reine et j'ouînmes, étout, les chînquante coups d'canon du Châté Lisabé. Ch'tait mèrveilleux pour un si janne mousse dé vaie tchiquechose dé mème, et jé n'l'ai janmais oubliyé.
Dans chu temps-là, i' n'y avait pon bein des maîsons tchi n'avaient pon un portrait d'la Reine dans l'parleux. Siex Papa et Manman y'en avait un grand d'lyi et du Prînce dé Galles et d'sa femme, la Princêsse Alexandra. Nou peut dithe qué tout l'monde aimaient la Fanmile Rouoyale.
En pâlant d'la Reine, v'la tchi m'fait penser ès assasinnâtions des Présidents et grands politiciens en Améthique, car ouaithe qu' oulle 'tait si bein aimée, la Reine, au mains trais îndividus êprouvîdrent à l'assâsinner. L'encyclopédie Britannica nouos dit qué l'dgix d'juin, 1840, un janne êrchèrvélé nommé Edward Oxford tithit deux corps d'pistolet dans la direction d'sa cârrosse comme ou pâssait par Constitutional Hill, et les balles passîdrent bein près d'sa tête et d'la cheinne au Prînce Albert assis à côté d'lyi.
Oxford prétendit d'êt' dêrangi quand i' fut présenté d'vant Justice et fut env'yé à l'âsile dé Bedlam. Au but d'quarante ans i' fut env'yé en Australie. Là, i' gângnit sa vie comme peintre et disait au monde tch'i' n'avait janmais 'té fo. Il avait ieu la chance dé s'en r'dêhaler d'mème.
Deux îndividus, un nommé Francis et l'autre Bean, fîdrent un attentat sus la vie d'la Reine en 1842, mais l'encyclopédie n'en donne pon les dêtails. Bean, tch'était bossu, 'tait vrainment fo. I' fûdrent condâmnés à peine dé prison. En 1850 un offici d'l'armée tchi n'tait pon empliyé dans l'temps et 'tait en r'chette dé d'mié salaithe, attatchi la Reine atout san bâton et avraûnit san bannète. I' fut forbanni pour sept ans. Un janne Irlandais du nom d' O'Connor la m'nichit atout un pistolet en 1869 et fut condâmné à 18 mais d'prison, et à êt' fouëtté, mais ou donnit d's ordres, en cachette, dé né l'fouëtter pon, et ou donnit les sou ès autorités pour l'env'yer en Australie.
Finnalement, en 1882, un nommé Maclean tithit un coup d'pistolet dans sa direction comme la Reine sortait d'la stâtion du train à Windsor. Heutheusement, i' n'avait pon mithé drait, et ou n'eut pon d'ma. I' fut trouvé fo étout et fut env'yé à l'âsile dé Broadmoor. En 1842, eune louai avait 'té pâssée ordonnant l'fouët pour tout attentat sus la vie d'la Reine, mais appathemment ches malfaiteurs-là en êcappidrent. La Reine pathaissait êt' contre chutte punnition-là.
J'viyais dans la gâzette d'hièr tch'i' y'a tchestchion d'bâti acouo un aut' Multi-Storey garage pour lé stâtionnement d'motos, chutte fais sus la caûchie. À m'n idée, l's autorités dév'thaient pûtôt empêchi l'nombre d'motos dans l'Île d'agrandi. Y'en a [dêjà] bein trop. Ch'n'est pus [pliaîthant] d'aver à en cachi iun en [Jèrri] à ch't heu, et si nou veurt marchi dans la campangne, nou l'fait au péthi d'sa vie. Si janmais l'commèrce d'tourisme veint à mantchi, i' faudra orner ches grand' babaines dé garages atout des trompes d'éléphant, car i' pouôrraient dév'nin chein qu' nou-à-appelle en Angliais White Elephants!
George d'La Forge
Viyiz étout: