Les Pages Jèrriaises

En Avion!

Trenton, Michigan,
U.S.A.
Lé 9 d'octobre, 1965.

Moussieu l'Rédacteu,

Mé r'vélà en Améthique! La rapidité du transport dé nouos jours d'un pays à l'autre est prèsque'încriyabl'ye! Quand man p'pèe et ma m'mèe fûdrent vîngt-siez jours à crouaîsi d'Jèrri à Paspébia en 1901 dans l'Dawn, eune brigantine dé chent quarate-siex tonnieaux, ch'tait iun des pus courts passages dans un navithe à vailes dé chu temps-là. Pus tard, quand les stînmes rempliaichîdrent les navithes à vailes, nou pouvait faithe lé viage dans eune sémaine, et d'nouos jours les grands Queen Elizabeth, Queen Mary et United States lé font dans quat' jours et d'mi à chîn' jours. Et pis l's avions fûdrent pèrfectionnés au point tch'i' pouvaient crouaîsi l'Atlantique rédgulièthement sans avâries. en 1946 j'fis un viage à bord d'un avion d'dgèrre, Lancaster bomber, convèrti en avion passagyi dé Montréal à Prestwick en Êcosse, dans douze heuthes, eune vitesse èrmèrquabl'ye quand nou pense tch'i' y'a dêjà dgiez-neuv' ans dépis ch't êpoque-là. Mais à ch't heu nou va dé New York, Detroit ou Montréal à Londres dans siex heuthes, et en sens contraithe dans sept heuthes. I' prend eune heuthe dé pus d'Londres en améthique viyant tch'i' faut combattre les vents d'ouest et aver l'nez au vent tout l'long du c'mîn.

Ch'est les fanmeux Boeing, Douglas et Comet avions à rêaction tchi vont si vite. Nou-s est assis bein confortabl'yement dans ches grands navithes dé l'air-là à quatre engîns. I' peuvent porter chent trente-chîn' passagièrs en même temps et voler 580 milles à l'heuthe. Quand i' tchittent la tèrre i' montent en l'air rapidement et à travèrs des nuages à eune hauteu dé trente à quarante mille pids. Nou n'vait pon la tèrre fort à chutte hauteu-là, car les nuages sont en d'ssous d'l'avion et l'ciel est cliai en d'ssus.

Les nuages en d'ssous d'nous sont bliancs comme la né. I' sont en montangnes et vallées. Ichîn et là nou vait des néthes tacques. Ch'est la tèrre ou la mé tchi montrent à travèrs, mais à trente mille pids nou n'peut pon discèrnér ni l'un ni l'autre comme i' faut.

Si nou-s a la chance dé vaie l'solé couochant d'là-haut, ch'est un spectacl'ye supèrbe. Quand i' c'menche à s'muchi drièthe chutte belle couvèrtuthe-là d'bliancs nuages, i' les touannent rouoges comme du sang! Ch'est des minutes solonelles tchi vouos font penser ès mèrvelles dé l'univèrs et du Grand Architecte tchi les gouvèrnent! Sans vouler m'vanter d'êt' réligieux, j'vouos asseûthe qué ch'est eune vîsion tchi vouos ramémouaithe les mots êcrits dans l'dgiex-huitième vèrset du preunmié chapitre du Prophète Êsaïe: "Quand vos péchés seraient blanchis comme la neige, et quand ils seraient rouges comme le vermillon, ils deviendront blancs comme la laine!"* Tchi belle promêsse dé rédemption!

Et pis ch'n'est pon seulement l'solé couochant tch'est bé à vaie quand nou-s est là-haut. Ch'est, étout la leune - chutte belle grand' lantèrne tch'êcliaithe l'univèrs atout sa lueu douoche et mystérieuse. Si nou-s est chanceux - comme j'l'ai tchiquesfais 'té - d'vaie la lueu d'la plienne leune, oulle êcliaithe lé haut des nuages en d'ssous d'l'avion et fait lus montangnes pathaître comme des faûtônes ênormes et fantastiques. Ch'est un nouvieau monde tchi fait s'n appathence, un monde tchi pathaît pus comme un rêve qué comme tchiquechose rêél, un monde èrvêtu d'la lueu céleste, mèrveilleux et pliein d'charme et d'mystèthe?

Quand la leune né s'montre pon, ch'est eune niet sombre et néthe comme du jais, mais êcliaithie par des mille pétites êtailes tchi pétillent sans arrêt - les vraies lantèrnes magiques du ciel!

Nou m'a souvent d'mandé si l'temps pathaît long, là-haut. Nannîn! Pour mé, y'a tréjous tchiquechose à vaie, dans l'air comme sus tèrre, tchi nouos montre les mèrvelles dé l'univèrs. L'avion est un mouoyain d'transport aussi pratique comme il est rapide, si rapide qué nou peut dêjeuner en Jèrri et baithe du thée en Améthique lé même jour. Et quand l'pilote lé fait d'scendre un mio à la fais nou n's'en appèrchait pon, et beintôt nou s'trouve à bouler sus l'chînment du c'mîn d'atèrissage dans l'aërodrome quâsi sans l'saver!

À bord, nou-s est souangnis et nouorris comme des mêssieux et sèrvis par des jannes filles charmantes et d'belle présence, et les r'pas sont bouans et suffisants, sèrvis sus eune pétite tabl'ye en d'vant d'sé tchi s'pacque dans l'dos d'la tchaise vis-à-vis, et tchi n'prend pon d'pliaiche eune fais dans sa niche.

V'là tchi m'fait penser au passage du temps, lé viage par avion, car j'ai veu l'jour qué la machinne à pédales 'tait la manniéthe d'aller l'pus vit à tèrre, et qué l' "train" (lé "chemin de fer" des Français) 'tait appelé "eune cârrosse tchi va sans j'vaux". Et j'ai veu la naîssance du moto et d'l'avion! Et acouo pus dreinement la naîssance dé la capsule tchi fait l'orbite du monde! Tch'est qu'j'allons vaie la préchaine chose? Nou n'sait janmais!

George d'La Forge
Evening Post 21/10/1965

* "...si vos péchés sont teints d'êcarlate, coumme tchi qu'i' s'sont bliancs coumme d'la né? Et s'i' sont rouoges foncés coumme du pourpre, coumme tchi qu'i' s'sont coumme d'la laine?"

 

Viyiz étout:

 

Les Pages Jèrriaises