Y'a tchiques mais, ieune des membres dé l'Assembliée d'Jèrriais célébrit ses chent ans, et j'érmèrtchit qu'ch'tait încriyabl'ye d'penser qu'oulle avait vêtchu pus longtemps qu' l's avions! Des gens avaient volé d'pis la fîn du 18ième siècl'ye, mais seulement dans des machinnes pus ligièthes qué l'air, des ballons et des dirigibl'yes.
En êffet, nou peut dithe qu' l'avion fut înventé par un Angliais, l'Sire George Cayley en 1799, mais viyant qu'i'n'existait pon d'engîn convenabl'ye dans chu temps-là, i'n' pouôrrait faithe qu'des vols à vaile.
Les fréthes Wright fîtent voler lus avion à Kitty Hawk, en Carolîne du Nord, lé matîn du 17 dé Dézembre 1903, auprès au mains quatre ans d'travas et d'èrchèrche; ch'tait la preunmié fais qu'les hommes avaient contrôlé un avion motorisé, mais chenna n'duthit qu' douze s'gondes. Orville et Wilbur n' fîtent qu' 45 minnutes en vol dans toute l'année suivante, et i' n'y avait pon grand întéthêt dans lus expéthiments en Améthique, mais en Ûrope nou viyait la dgèrre tch'appraichait, et les gouvèrnéments ilo baillîtent des sou pour dêv'lopper l'aviâtion, ayant l'idée qu'les avions pouôrraient être l's ièrs des armées pour dgetter l'ennemîn au liain.
En 1912, trais ans auprès qu' Louis Blériot fit la crouaîs'sie d'la Manche, les preunmièrs avions en Jèrri arrivîtent sus la grève d'la Ville, des hydravions en course dé St. Mâlo.
Entre les deux dgèrres les avions d'lîngne c'menchîtent, et duthant la deuxième dgèrre nou-s' înventait l'engîn à réaction et les fisées tchi pus tard pèrmettaient ès hommes d'viagi à la leune.
Et quand nou pense qu'lé preunmié vol des fréthes Wright 'tait la maintchi d'la londgeu d'un Boeing 747 Jumbo !
Tony Scott Warren
Viyiz étout: