San Antonio, Texas,
U.S.A.
Lé 8 janvyi, 1972.
Moussieu l'Rédacteu,
La s'maine pâssée j'vouos disais qu' j'avais r'chu la gâzette dé Jèrri du 4 novembre. Eh bein, chutte sémaine la cheinne du onze novembre est v'nue et j'ai ieu l'pliaîsi d'liéthe des nouvelles dé Jèrri deux s'maines dé siette! Ouaithe tch'i' sont quâsi deux mais en r'tard, ch'est quand mème un pliaîsi. Mais ch'n'est janmais pliaîsant d'vaie les noms des gens qu' nou-s-a connus dans la colonne des décès, et y'en a tréjous tchitch'uns. Chutte fais y'en avait deux qu' j'avais connu dans ma jannèche, Madanme Jean J'valyi, née Selous, et Madanme Nicholson, née Rhona L'Mèrquand, aut'fais d'La Baie d'St. Brélade.
Quand jé d'meuthais à La Forge à St. Ouën, j'allais souvent à la boutique siez Mait' Fraînque Selous, lé p'pèe à Madanme J'valyi, et j'admithais ses deux belles pétites filles. Quand jé d'meuthais à La Mouaie à St. Brélade, lé p'pèe à Madanme Nicholson 'tait l'propriêtaithe dé Haute Place, la maison dans tchi jé d'meuthais, et j'viyais souvent les D'mouaîselles Eunice et Rhona L'Mèrquand et lus pus janne soeu tchi fut Madanme Shepard pus tard. Mes condoléances à Moussieu J'valyi et Madanme West. J'ai r'gret d'êt' si tard à l's ouffri, mais ch'est la faute du temps tch'i' prend pour les gâzettes à v'nîn ichîn.
J'vai qu' j'avons eune bouanne opposition dans L's Êtats dans la pèrsonne du Sénateu John Le Mèrquand. Sans en saver assez entouore lé problème des architectes entanmé par lé Sénateu à la séance du deux d'novembre pour aver eune opinnion personelle pour ou contre, j'peux dithe qué l'mêtchi d'architecte est iu des milyeurs ichîn en Améthique pour faithe des sou. N'împorte tchi sorte d'bâtisse tch'i' dessinnent, i' sont seux d'êt' payis, et les louais tchi forchent l'approbâtion d's autorités meunicipaux dévant la construction, exigent un plian prépathé par un architecte. I' font des sou comme des êcales en dessinnant les plians pour nouos êcoles, car i' sont autorisés à chèrgi un pourcentage du couôtement entchi d'l'êcole, et naturellement i' produisent un plian tchi s'en va couôter l'pus d'sou. I' mettent du marbre ichîn et là en d'dans ioù qu' du pliâtre ordinnaithe couôt'tait bein mains, et il' embellissent un tas d'choses inutilement pour augmenter l'prix d'l'entchi. Quant ès architectes Jèrriais, j'avoue qué l'seul à tchi j'ai janmais ieu affaithe est Moussieu L'Sueux, et j'l'ai trouvé bein raisonnabl'ye et un vraie moussieu.
Auve toutes les lettres êcrites par un tas d'monde contre lé travas et les dêpenses au Fort Régent, j'tais surprîns d'liéthe qué la bangnerêsse bâtie là-haut a ieu tant d'succès tch'il est nécessaithe d'en bâti eune deuxième. Quand oulle 'tait en train d'êt' bâtie, j'm'èrsouveins qu' ou pathaissait âffreuse à san tout seu sus l'haut du Mont d'La Ville à m'suthe qué nou-s-en appréchait, et qu' ou n'avait autcheune attrait point d'veue architectuthe. J'sai bein qué l'Sieur Duncan Gibson, tch'est en chèrge du travas sus l'Fort, est un moussieu tchi connait san mêtchi, et j'espéthe tch'i' fut consulté par lé moussieu tchi dît au Skal Club tch'il en fallait eune deuxième dévant avanchi pathelle idée.
J'vai qu' la tchestchion d'changi l's heuthes d'ouvèrtuthe des aubèrges n'est pon populaithe auve tout l'monde ouaithe qué les Connêtabl'yes sont en faveur dé l'faithe. Quant à mé, jé s'sais content d'les vaie toutes freunmées pour bouan, l's aubèrges. I' n'font qu' apporter la mînséthe ès pauvres femmes tch'ont ieu l'malheur dé mathier d's ivrouangnes. Les môtoristes tchi pâssent lus séthée là-d'dans sont un dangi à touos les cheins tchi sont sobres sus la route à onze heuthes au sé. Les cheins tchi dêhalent des aubèrges à ch't heuthe-là, auprès aver goudalé toute la séthée, sont à mainchi êbédés si pon souls. I' font du brit dans les rues d'la ville et empêchent lé monde dé lus r'pôser et d'dormi. Eune chose qué j'n'ai janmais peu comprendre est comment qué l's aubèrgistes ont la conscienche dé gangni lus vie, et mème faithe forteune, en suivant un mêtchi d'mème. J'n'ai autcheune objection à vaie un homme ou eune femme joui d'eune fais à baithe trantchilement siez ieux, et j'garde un lèrmîn siez mé pour convier l's anmîns tchi m'font l'honneu dé v'nîn m'vaie. Pour dé mé i' n'y a autcheune raison d'aller à l'aubèrge pour baithe eune fais quand nou peut l'faithe siez sé.
J'vai, étout, qu'un meurtriyi a pliaidgi coupabl'ye, et dépis qu' la louai n'a pon changi en Jèrri, j'pense bein tch'il a 'tê condâmné à mort par La Cour Rouoyale. V'la tchi m'raméouaithe aveu veu pathel cas quand j'tais clèrcot dans Hill Street. J'crai qué ch'tait en 1906 ou 1908 quand un pouorre dgiâtre fut condâmné à mort pour meurtre. Ch'tait Moussieu l'Bailli Vèrnon tchi présidait la Cour dans chu temps-là, et ch'fut un êvènement solonnel dé l'vaie mett' un mio d'nièr drap ou v'lous sus sa tête et prononcer la sentence. J'm'èrsouveins d'la matinée que l'meurtriyi fut pendu. Ches choses là vouos font frémi!
George d'La Forge
Viyiz étout: