Trenton,
Michigan. U.S.A.
Lé 15 dé dézembre, 1979.
Moussieu l'Rédacteu,
Quand ou r'chév'thez, chutte lettre ichîn, jé s'sai dans les pays cauds. A Fort Lauderdale, en Floride, où'est qué j'm'en vais et où'est qué l's Améthitchains d'ches êtats du nord et d'la fraid veulent pâsser un mais ou deux, s'i' peuvent y'affaûrder, pour raccourchi l'hivé autant qu' possibl'ye, i' fait caud toute l'année.
La preunmié chose tchi s'en va m'frapper en arrivant là est l'nombre excessif dé motos par les c'mîns, un trafi si accâbliant qué j'pouorrai quâsi m'înmaginner êt' en Jèrri!
J'viyais, auve grand pliaîsi dans la gâzette dé Jèrri du 25 d'octobre qu' un anmîn en Califournie veint d'm'env'yer (la dreine êrchue d'Jèrri étant du 18 d'octobre), qué L's Etats sont, à la fîn des fins, en trains d'lînmiter l'nombre d'pèrsonnes arrivant pour rester en Jèrri à deux chent chînquante par an. Lé mangnifique rapport au sujet, par lé Député Messire Robert Mathet, vaut la peine dé liéthe. L's Etats ont la chance d'aver un moussieu d'san calibre comme membre. I' m'sembl'ye qué ch'est danmage qué la populâtion d'l'Ile né peut pon êt' lînmitée pour bouan au nombre d'au jour d'aniet, mais j'crai bein que j'sis trop gourmand. Ch'est bein seux qu' Messire Robert a pus d'avis qu' mé!
La bouanne chose entouôrre la décision d's Etats est qué v'là tchi s'en va aver l'rêsultat d'réduithe la bâtithie d'maîsons, dêjà si nombreuses, tchi d'sahonte l'Ile, et, faut espether, lé nombre dé motos tch'êtouffrent nouos p'tites rues d'campangne.
En pâlant d'motos, j'tais hardi întérêssi en liêsant l'articl'ye entouôrre la visite dans l'Ile dé Moussieu Ralph Marshall, minnistre des Travaux Publyiques des Iles Bermudes. I' nouos montre eune bouanne solution du problème du trafi accâbliant Jèrri. Un moto par maîson? J'pense bein qué v'là tchi veurt dithe par fanmil'ye étout. Y'en éthait-i', des cris et des pliaintes, man bouanhomme, si ch'la 'tait adopté en Jèrri! Eune aut' bouanne idée des Bermudiens, étout, est d'lînmiter la grandeu des motos et de n'en aver pon à louage. Et tout chenna ouaithe qué l's Iles Bermudes ont à s'fier sus l'tourisme comme en Jèrri. I' faudrait cértainement du couothage pour un membre à proposer un tel projet dé louai dans L's Etats en Jèrri, et j'mé d'mande si y'en a iun? A m'n idée, ché s'sait un grand bonheu pour la trantchilité d'la campangne d'aver tchique système dé même, et pour sé dêfaithe du térribl'ye encombrément des rues. Ch'est întérêssant d'liéthe qué l'île prîncipale des Bermudes est à bein près la même grandeu comme Jèrri, et qu' oulle a, à tchiquechose près, la même populâtion. Et, comme nouos l'dit Moussieu Marshall, ch'est difficule dé r'toli les privilèges du peupl'ye, mais tant pus longtemps qué l'problème duthe, tant pus tch'il est difficile à r'miédgi.
Ieune des choses qué j'ai r'gret d'vaie dans les dreines gâzettes èrchues est l'décès d'la danme à Moussieu Winter L'Merquand, lé respecté et aimabl'ye Connêtabl'ye dé St. Pièrre, et j'lî fais mes bein sincéthes condolèances.
J'vai dans la gâzette qué la rangie d'caûminnes à La Ville ès R'nauds dans la pâraisse dé Grouville s'en va êt' abattue viyant qu' oulle a trais chents ans. I' faut féliciter d'Député Madanme Helen Baker pour aver ieu l'avis d'penser qu' ch'est danmage dé l's abattre à la pliaiche dé les r'graie. Sans doute, lé propriêtaithe sé d'mente pûtôt du point d'veue d'conmèrce et d'profit qué d'prêserver tchiquechose dé méthite historique. V'là tchi m'fait penser à man vièr Ménage tch'a quat' chents ans et tch'a 'te dans ma fanmil'ye trais chents ans ou pus. Quand j'm'en îthai en viage tchi n'a pon dé r'tou, ch'est probabl'ye qué tchique entrépranneux ou bâtisseux d'maîsons voudra l'acater pour l'abattre et bâti tchique grande babaine dé carrée maîson, ou un tas d'louages modèrnisés comme les cheins tch'ont 'té bâtis sus la propriêté dé feu Ph'lippe Powell au Carrefour à côté.
J'ai r'gret d'vaie qu' eune pèrsonne en viage auve lé tou organnîsé par vouot' gâzette eut l'malheu d'êt' prînse malade dans l'Hotel Siam Intercontinental à Bangkok en Thailand, et qu'ou trépâssit là-bas. V'là tchi m'ramémouaithe qué j'ai dêjeunné dans chutte mangnifique hôtel. Thailand est un pays hardi întérêssant à visiter. A m'n idée, la visite des supèrbes templ'yes dé Bangkok est bouanne rêcompense pour un viage si êlouangni, quand même qué nou s'vérrait rein d'autre, car j'sis d'avis tch'i' sont ieune des mèrveil'yes d'architectuthe du monde.
George d'La Forge
Viyiz étout: