Houston, Texas,
U.S.A.
Lé 5 dé janvyi, 1974.
Moussieu l'Rédacteu,
J'veins d'èrchéver la gâzette dé Jèrri du tchînze novembre, 1973, et j'vouos asseûthe qué v'la tchi m'a fait pliaîsi, ouaithe qué j'n'ai pon veu la rêponse à un tas d'tchestchions tchi m'veinnent à l'idée. Par exempl'ye, ieune des dreines entèrrements à tchi qu' j'allis ch't année d'vant tchitter Jèrri fut la cheinne du respecté Connêtabl'ye L'Vesconte dé St. Jean, et jé n'sai pon 'couo tch'est tch'i' fut êlu pour lé rempliaichi à la tête dé la municipalité. J'sai bein qu' les deux candidats 'taient des mêssieux bein connus et touos les deux dîngnes et capabl'yes dé la chèrge, et j'mé sis d'mandé bein des fais tch'est tch'en gangnit.
J'viyais tch'i' y'avait trais candidats pour deux Chent'nièrs à Grouville. Ch'est drôle comment qu' un tas d'pèrsonnes pathaîssent craithe qu' un homme est vyi à septante ans. J'mé criyais acouo tout janne quand j'avais ch't' âge-là, et j'donn'nais autcheune chose pour pouver y r'tchuler, à septante, et êt' seux d'aver eune aut' dgiexaine ou pus d'années l'vant à mé! Mais ch'est mangnifique dé vaie les Jèrriais continnuer à supporter l'sèrvice honorifique dé lus pays.
I' fut mentionné, à la rêunion d'une conférence îndustrielle, qué la seule mannièthe dé combattre la renchiéthe du couôtement d'la vie est d'faithe pus d'sou sé-mème pour en aver pus dans la bourse. Ch'est întérêssant d'liéthe qué ch'est les riches immigrants tch'apportent quâsi la maîntchi du r'vénu d'l'Île, et qu' les banques contribuent dgix du chent et qu' les touristes amènent assez pour payi les gages et l's êcoles et aut' sèrvices sociaux. Mais chein tchi m'întérêsse lé pus est chein tchi nouos fut dit entouorre l'agritchultuthe, tchi soulait êt' la “preunmié pièrre” dé la vie Jerriaise. I' nouos fut dit qué l'fait qué l'Marchi Commun pèrmet ès Jèrriais d'continnuer l'exportâtion en Angliétèrre pouorrait êt' contre-balanchi par la compétition des produits d's aut' pays du Marchi. Mais chein tch'est alarmant et tchi m'êffrite est quand i' fut mentionné qué cèrtains tchi sont dépendants sus l'agritchultuthe pour lus gangne-pain éthont p't-êt' a r'garder pour tchique aut' activité. À m'n idée, v'la tchi pathait comme si nou n'crait pon grand' chose dé l'av'nîn pour lé fèrmyi.
Ch'est bein aîsi d'dithe tch'i' faut faithe aut' chose pour gangni san pain, mais si un fèrmyi a pâssé les preunmié chînquante ans d'sa vie à fèrmer, nou peut dithe tch'il a négrer sa vie, car i' travâle dé solé l'vant à la niet et souvent bein pus tard. Il est vengi par l'înjuthe du temps, et s'il a la chance d'aver eune bouanne saison, ou s'sa souvent sieue par deux mauvaises. Mais qu'la saison s'sait bouanne ou mauvaise pour li, oulle est tréjous bouanne pour sa main-d'oeuvre, car i' faut qu' ses ouvrièrs s'saient payis, et dans bein des cas il' ont fait pus d'sou qu' li quand veint la fîn d'l'année. S'i' dêcouvre tchique récolte spéciale tchi li rapporte un mio d'profit, l'année en r'vénant y'étha tant d'fèrmièrs tchi s'en sont appèrchus et tchi s'mett' à la craître ieux-mèmes, qué toute l'Île en s'sa couverte et n'y étha pon mouoyen d'la vendre à profit à cause dé l'excès sus l'marchi!
Et si un homme a fèrmé jusqu'à l'âge dé 60 ans - mème dé 50 ans - et tch'i' n'a fait qué d'gangni san pain et l'pain d'sa femme et d'sa fanmile, et mett' lé mio d'profit tch'il a êrachi pénibliément d'ses récoltes à env'yer ses êfants au collège pour lus donner un avantage tch'i' n'a pon ieu li-mème dans la vie, et tch'i' faut continnuer à travailli pour mangi, tchi mêtchi tch'i' peut entreprendre à s'n âge? I' m'sembl'ye que les circonstances actuelles sont assez pour faithe un péthe encouothagi ses garçons à n'aller pon au collège mais d'travailli sus la cauchie pour faithe des sou. Il' appellent ch'la êt' “dockers” en Angliais. Ch'est tragique quand nou pensé qué y'a des chances qué v'la tchi paiethait mus qué d'continnuer l'travas d'lus anchêtres - la tchultuthe dé la tèrre pour la faithe produithe la nouorrituthe nécessaithe pour la vie!
Eune aut' mauvaise nouvelle dans la gâzette est la renchiéthe du pain et que l'prix des oeufs a r'doublié dans les dreins onze mais. Quant au fait qu' la biéthe a renchiéthe étout, d'quatorze sou la pînte dans cèrtains cas, ch'là n'm'empêche pon d'dormi!
J'èrgret d'vaie l'décès du Révérend Albert Raymond Durand. J'n'ai pon ieu l'honneu dé l'connaître pérsonnellement, mais j'connais san p'pèe d'vièr temps, et j'lî fais part dé mes condoléances. J'tions anmîns dans l'vivant d' “Jock” Luce et Edmond Delaquaine des “Chroniques”, et si ma mémouaithe né m'trompe pon, j'tions ensembl'ye dans les “Dickens Players” du temps du Sieur E. C. Boielle.
George d'La Forge
Viyiz étout: