Les Pages Jèrriaises

Les Docteurs et l'Auditeu'


Y'a justement tchinze jours annièt
J'avais êcrit sus un sujèt
De la derniéthe actualité.
Nos vièrs lecteurs de la "Nouvelle,"
Je sis bein certain s'en rappellent:
Les Auditeurs et les Docteurs!

Les deux Auditeurs des Etats
Faisaient un divers embarras
Disant qu'i' n'pas'saient vraiment pas
Tout chein qu'les Docteurs de Milice
Ercliamaient pour bein p'tit d'service; -
Disaient l's'Auditeurs des Docteurs!

Pour mai, j'en avais fait des vers,
Sans, j'espéthe, rimer trop d'travers,
Et sans offenser jannes ou vièrs,
Mais j'vos avoue qu'je pensais dgéthe
Erpâler si vite de l'affaithe
Des Auditeurs et des Docteurs!

Mais ach'teu ch'est une autre chanson
Que nou-z'entend par la maison...
Nou dit souvent,avec raison,
Qu'i n'ya si bouan tcheth'tchi qui n'verse,
- Tout dêpend du c'min qu'i' traverse.
Témoin l's'Auditeurs et Docteurs!

Les Etats ont deux Auditeurs,
Lus noms sont connus des lecteurs,
Ch'est Larbalestchi et Hellyer,
Hellyer est l'Auditeur-Comptabl'ye, -
Ses additions sont ermèquabl'yes!
Oh! Ches Docteurs et Auditeurs!

Faut auditer, touos les quart-d'ans,
Et, qu'i' faiche bé ou mauvais temps,
Moussieu Hellyer qu'a, je comprends,
Son domicile en Angleterre,
Veint toutes les fais, même en temps d'ghèrre.
Ou l'savez bein, êche pon, Docteurs?

Ls Auditeurs, pour lus travas,
Erchevent chaque annèe des Etats,
- Que nou' dit pauvres commes des rats,
Mais qui puchent bein dans nos pouchettes! -
Une belle miquelotte! -Tch'est qu'ous en faites?
Touos vous Docteurs et Auditeurs.

Nou craithait quâsi qu'même des Jui's
N'se trouv'thaient pas trop mal payis
En r'chevant par an trais chents louis
Pour vaie dans l'bureau d'Moussieu d'Veulle,
Touos les comptes et livres qu'i' veulent,
Et même les papiers ès Docteurs!

Mais les Docteurs, qu'ont yeu lus tou',
Et qui d'mandaient, sans droit in'tou,
D'erchever une bouanne pautèe d'sous,
Ouvrent l's'yiers ach'teu', j'imagine
Et sans doute rient das lus babines
D'l'aventuthe de y'un d's'Auditeurs!

Car Mess Hellyer veurt trente louis d'pus -
Parce qu'i' y'avait tchic comptes e r'chus
De pus pour li à r'garder d'sus!
"L'appétit veint à m'suthe qu'nou mange -"
Mais chutte fais ch'est assez êtrange:
Après la bordèe des Docteurs!

L'Comité des Finances 'tait pour -
Mais l'Bailli et l's'Etats, l'autr' jour,
L'ont r'fusè bein vite et tout court. -
Ils ont veu l'dangi quand nou laisse
Des ca'ts à pautrindgi d'la graisse,
Qu'che s'sait Docteurs ou Auditeurs!!

Elie

 

Viyiz étout:

 

Les Pages Jèrriaises