Le Ménage ès Feuvres,
St. Ouën.
Lé 10 d'août, 1974.
Moussieu l'Rédacteu,
J'eûnmes eune mangnifique arlévée d'pliaisi à l'occâsion d'l'excursion d'L'Assembliée, chutte fais en promenade dans l'Île mème, lé 25 dé juilet. J'finnissînmes auve un bouan r'pas l'sé dans l'restaurant d'l'aérodrome, et du rêvillon l'restant d'la séthée.
Auve eune liste d'chansons d'vant châtchun des membres, nouos v'la à les chanter au son d'l'accordéon, joué en parfaite harmonie par Madanme Eileen Le Sueux - tch'est aussi au-faite au manniéthe d's instruments d'mûsique comme oulle est à r'citer l'Jèrriais. Les vèrsets d'ieune dé ches chansons fûdrent composés, y'a dêjà bein d's années, par lé fanmeux êcrivain d'la langue Jèrriaise, Edwin John (“Jock”) Luce (1881-1918), et ch'est du si bouan Jèrriais et eune si bouanne réminiscence du temps pâssé quand nou faithait du cidre à gogo en Jèrri, tch'i' m'vîns à l'idée dé d'mander la pèrmission d'L'Assembliée d'la r'produithe dans la gâzette, à seule fîn qu' touos les lecteurs piêssent en profiter et en aver eune copie. La v'chîn (entendu tch'i' faut chanter l'èrfrain auprès châque vèrset) :-
|
Ma Modgie d'Cidre Ma femme et mé j'd'meuthons touos seurs Dans eune maiethon parmi les flieurs; Je bai du cidre et lyi du thée Et j'sommes tréjous heutheurs et dgais. Èrfrain Ha! ha! ha! - ma modgie d'cidre, I' m'en faut un p'tit lèrmîn! Ha! ha! ha! - ma modgie d'cidre, Vite acouothe un p'tit gouttîn. Lé matîn d'vant man dêjeuner, Jé file tout drait dans man preinseu; Jé happe un mogue et bai eune lache Pour mé rafraîchi la fache. Auprès qu'j'ai souongni les bestchieaux, Jé vais travailli dans les clios; À la maîntchi d'la matinnée J'dêhale man cidre et ma beurrée. Touos les jours pour mé rassâsier - Eune bollée d'soupe à man dînner, Patates et lard - oh! l'bouôn fricot, Et du cidre à tare-larigot. Touos les sièrs j'aime à m'caûffer Auve ma bouonnefemme à côté d'mé; Quand tchi qu'oulle ouvre et dèrne ou coud, J'lié la gâzette et bai deux d'gouts. La dèrnié chose dévant m'couochi Jé bai eune vèrrée d'cidre bouoilli, Jé peux vouos dithe qué jusqu'à ch't heu J'n'ai janmais ieu bésoin d'docteu. J'espéthe dé vivre jusqu'à chent ans, Si ch'est qu'ou voulez en faithe autant I' faut baithe cidre caud ou fraid Pour êt' seux d'joui d'eune bouanne santé! |
Où'est tch'est l'temps qué, à la pliaiche dé vaie un tas d'cruques de maiethons modèrnes lé long des rues, nou viyait les bieaux gardins d'pommes tchi donnîdrent l'idée à “Jock” Luce dé composer chutte belle chanson?
George d'La Forge
Viyiz étout: