Les Pages Jèrriaises

 

 

Lé service annuel 1961

 

L'Assembliée d'Jèrriais

 

Ch'tait bein encouothageant pour les officièrs dé L'Assem­bliée d'Jèrriais dé vaie au mains 200 personnes lus rêuni dans la belle églyise dé St. Sauveux, Dinmanche, lé 25 dé Juin, pour lé 5ième service annuel. Chu service en Jèrriais et Français est arrangi pour autchune personne qui veurt rendre hommage au Bouan Dgieu dans la vielle langue dé Jèrri.

Lé Canon J. S. Norman annoncit les cantiques et fit les priéthes en Français et auprès aver fait la beinv'nue à tous dit qué v'la tchi li faithait pliaisi d'vaie tant d'monde.

Pour la preunmié leçon l'Sieur Françouais L'Maistre liut lé 73ième Psaulme, et comme deuxième leçon, lé Président, l'Sieur H. M. Gibaut, liut la Parabole du S'meux. Ches deux leçons avaient 'té traduites en Jèrriais par deux bein fidèles membres dé L'Assembliée.

Lé Sermon


Lé Sieur Henry F. Le Gresley nos fit un bein bouan sermon, en Jèrriais étout. Ayant print l'20ième versé du 5ième chapitre dé l'Êvangile sélon St. Matthieu comme san texte, i' nos dit qué ch'tait p'têtre iun des pus înmportants versés d'la Biblye. Lé Sieur Le Gresley nos dit comment qué dans l'temps d'nout' Seigneur les pharisiens et les scribes suivaient la louai "à la lettre" sus touos sens et nos racontit comment que, dans la Parabole du Pharisien et l'Collecteux d'Taxe, l'pharisien s'contait si bouan, mais qué l'collecteux d'taxe d'mandait au Bouan Dgieu d'aver pitchi d'li qui 'tait un pécheux. En paslant d'la Parabole du S'meux i' nos dit étout qué dans nos entréprînses dans nout' vie sus chutte terre, nous éthait un succès dé p't'être 30 pour chent, ou 60 pour chent. ou même 100 pour 100 si ches entréprînses pliaisaient au Bouan Dgieu. Quand nout' Seigneur voulait instruithe ses apôtres, I' lus paslait en paraboles et en mentionnit plusieurs comme examplyes.

Eune chose bein seuthe est qué ch'est l'Eglyise qui nos a donné la Bibl'ye, et tout Chrétien dait aller au tchulte, car ch'est là qu'nou-s-apprend les choses essentielles, qui sont: la Grace dé nout' Seigneur, l'amour du Bouan Dgieu et la Communication du Saint Esprit. I' finit par nos dithe qué auprès qué j'éthions fait tout ch'qui nos est c'mandé, j'éthions fait qué nout' simplye d'vé comme Chrétiens.

Vièrs cantiques


Duthant l'service, les bouans vièrs cantiques Français “Ouvrages du Seigneur". "Oh, qu'il m'est doux de savoir que Dieu m'aime", "Semons dès que brille l'aurore" et "Esprit Saint que ta flamme", et, pour la preunmié fais, un cantique en Jèrriais par lé Sieur George Le Feuvre, “Oyez! Oyez! la vouaix des anges dans les cieux " fudrent chantés dé bouan tchoeu par la congregation (des gens dé partout l'Ile) et par lé tchoeur, avec lé Sieur George Baudains à jouer l'orgue.

Duthant l'drein cantique quatre membres dé L'Assembliée fidrent la collecte, et comme est la couôtunme, lé montant est donné au lieu d'tchulte où-est qu'lé service a lieu.

 

Viyiz étout:

 

Les Pages Jèrriaises