Appréchant d'180 personnes lus rêunitent dans la grand' Chapelle dé Ouën dinmanche, lé 26 d'Juin, pour lé quatrième service annuel. Chu service est en Jèrriais et Français pour les membres de l'Assembliée d'Jèrriais et autchune personne qui veurt prendre avantage dé rendre hommage à san Créateur dans la vielle langue dé Jèrri.
Lé Rev. H. Bernard annoncit les cantiques et fit les priéthes en Français et auprès fit la beinv'nue à tout l'monde et dit qué L'Assembliée d'Jèrriais 'tait couothue pour prêserver la langue Jèrriaise. mais qué ch'tait magnifique dé vaie qu'la religion 'tait maintinse et qu i' y'eusse un service annuel.
Lé Sieur Arthur Quérée fit un magnifique sermon, et d'mandit si la religion avait fait san temps dans chu temps modèrne. Ch'est eune tchestchion bein difficile a répondre. Lé Sieur Quérée continuit en disant qué les dêcouvertes dé nos jours peuvent nos aidgi à connaître lé Bouan Dgieu et qué toutes les pensées pour les construithe veinnent dé Sa main. Eune exemplye dé la forche du Créateur est si évidente au r'nouvé quand les flieurs erprennent vie auprès l'hiver et comment qu'i' faut l'solei, la plluie et l'vent pour les faithe craitre.
Lé sermon 'tait basé sus l'drein verset dé la deuxième leçon et l'Sieur Quérée nos paslit des trais vertues, et comment qué je r'préthentaimes lé passé et nos dênommit tout chein qu'j'avions les églyises et chapelles bâtis par nos anchêtres, ches braves gens qu'avaient d'l'espéthance et d'la charité. La miyeu vertue est la fouai, et n'en vchin eune histouaithe comme exemplye.
Un ministre vit trais hommes en travas et lus d'mandit ès trais la même tchestchion. "Tch'est qu'ous êtes à faithe?" Lé preunmnyi 'tait à faithe du mortchi pour pouver erchever ses gages, à la fin d'la s'maine; le deuxième faithait rein d'autre qué d'ramonter du briques pour la même raison, mais l'traisième dit qu'il 'tait à aidgi à bâtti eune cathédrale. I' y'avait une telle difféthence entre la fouai des trais hommes! Un artiste peut peindre dé bein bieaux portraits mais i' n'ont pas d'vie : et qu'avec la main du Bouan Dgieu Jèrri est bé et si bein dév'loppé.
En finissant l'Sieur Quérée d'mandit à la congrégation de penser ès trais vertues, la fouai, l'espéthance et la charité.
Viyiz étout: