Ch'tait une occasion spéciale pour lé Sieur Emile Siouville; i' dit qu'il avait prêchi san preunmié sermon dans chutte chapelle-là i'y a 41 ans, et i' 'tait à faithe' san preunmié sermon en Jérriais dans la même chapelle. En même, temps i' dit ès membres qué ch'tait eune bouonne chose pour les Jérriais, qu'ont 'té bénis sus tant d'sens, dé lus rêuni eune fais par an pour ermerçier l'Bouan Dgieu.
Lé Sieur Siouville fit un divers bouan sermon et en prennant "La véthité vos rendra libre," pour san texte, i' dit comment qu'les Juifs 'taient escliaves à lus traditions et qué l'âme d'eune personne peut être tuée par l'escliavage - ch't escliavage qui peut exister par des choses comme l'ignouothance, les superstitions et d'mauvais penchants, qui peuvent étout causer les gens à perdre tout sens d'responsabilité! Même au jour d'anniet quand les gens sont si prêssis qué lus otchupations - la maiethon et l'commerce - prennent tout lus temps à la perte dé la Vie Spirituelle. Pour les siens qui passent à travers d'afflictions et d's êpreuves passagiéthes, la consolation d'lus amîns n'est pas assez - i' fait la Grace et l'Amour dé Dgieu pour l's êl'ver.
Auprés aver r'citer des patholes dé Nout' Seigneur, lé Sieur Siouville racontit eune histouaithe bein touchante, comme illustration, entouor un péthe dé plusieurs garçons et d'eune seule fille, dé tchi qu'il en faisait un jouau, et quand, par malheur, la p'tite mouothit, i' sé m'sespéthit, perdit sa confiance, et auprès tchique temps, sa méthe l'avisit d's'en aller tout seu' dans sa chambre pour prier. L'homme, qui s'était bein déhallé, avait oublier l'Bouan Dgieu. A c'menchi les patholes né lî v'naient pas mais par lé matîn, auprès aver passé sa niet sus ses g'nouors en priéthe, i' 'tait libre car il avait trouvé san Sauveur.
Lé Sieur Siouville fini par dithe qué auprès aver accepté chutte liberté, ch'tait lé d'ver à tous dé montrer ès siens qu'i' rencontrez qu'ils avaient la paix du seigneur dans lus tchoeu.
Viyiz étout: