'J'entendu' s'fit l'Ph'lip Desclios qui n'savait pas tchi faithe de sé même, car à cause d'la plyie i' n'pouvait pas plianter ses patates, 'j'ai entendu que quand tu 'tais a l'hopita tu rêgalais les docteurs et les nosses avec tes sornettes'.
'Je n'said pas', j'lis rêpounnis, 'mais vais-tu, y'avait tant d'gens là-d'dans qui n'faisaient que se pliaindre que les doctures et les nosses v'naient m'vaie, sachant que j'n'allais pas m'pliaindre mais qu'j'allais rigoler avec ieux'.
'T'as tréjous té d'même', dit l'Ph'lip, 'Dreinement t'as ieu bein des malheurs, et acquo tu n'te pliains jamais. Mais ch'là tâit t' tréjous d'même"?
'Non n'gagne rein de s'pliaindre', j'lis dis, 'mais eune fais j'en veins bein près. Quand j'tais en travas le poste que j'voulais hardi aver ch'tait d'etre noummé Ambassadeu au Japoun, et j'avais toute raisoun d'craithe que j'allais l'aver. Mes superieurs au Foreign Office m'l'avaient promînt, et quand l'ambassadeu qui 'tait au Japoun veint à Loundres sus tchique affaithe i'm'dit que quand il allait en értraite en 1967 ch'tait me qui l'suivrais à Tokio. Mais malheureusement li et sa femme, touas les deux, fûtent prîns malade là-bas et il eut à s'er tither presqu' deux ans d'vant qu'il éthait deu'.
V'la tchi changit l's affaithes et les renvèrtchit coumplyétement. Le seul aut' collègue qu'était peut être candidat pour le Japoun ch'tait mon raide buoan amin John Pilcher, mais i' 'tait pus vi qu'me et s'loun les règlyes de l'Office nou' n'envyie pas eun ambassadeu à eun nouvieau poste si i'n' peut pas y rester au mains deux ans, préférablyément pus, et en souaixante sept quand Tokio d'vendrait libre il éthait 'té trop vi mais, dans les nouvelles circounstances. John Pilcher pouvait servi au Japoun au mains deux ans et d'mi, tandi'que'me, j'avais justement 'té noummé Souas-Sécrétaire d'Etat en chèrge de nos affaithes dans l'Extrême Orient et l'Asie du sud, et l'Office ne voulait pas me dêpliaichi si vite. Et d'même ch'tait John, pas me, qui fut noumme Ambassadeu au Japoun. J'avaimes servi ensemblye à Tokio dans les mil neu'chent trente, et i'm'dit que ni li ni sa femme ne voulaient r'aller au Japoun. Maie lé-v'là, quand i' veint à éyou qu'nous est envié nou' fait coumme l'Office nos dit. En poste j'ai souvent ieu d's argjuments avec Loundres et j'nais beuvent pas fair chein qu'i' m'avaient dit d'faithe, mais quand i' veint à éyou qu'i' veullent nos envier non' fait coumme i' disent'.
'Mais', s'fit l'Ph'lip, 'si t'as si souvent ieu du brit avec le Foreign Office coumment qu'tu d'veins si souvent si haut dans l'Service?'
'Eune buoanne tchestchioun' j'lis rêpounnis, 'mais si nou'n'rouspète jamais et fait tréjous coumme i' nos disent de faithe nos supérieurs nos coumptent des happes-la-leune et i'n' prennent autcheun avis d'nous. Mais s'nou' lus dit qu'i l'ount la tête viède coumme eune lanterne i' s'disent: 'Mais chu gâs ichein ne manque pas d'toupet, i' faut que j'prendre garde à li'.
'Mais s'nous a tchique pliainte i'n' faut jamais la mountrer, i' faut la r'garder en rigolant. Et vais-tu, ch' j'tais si dêchut de n' pas r'aller au Japoun, mais j'fus à Singapour et à Bangkok, tchi nos pliaisaient bein, à ma femme et me, et qui m'dounnîtent pus d' expérience que j'éthais autrement ieu'.
Le Vièr Trin'tais
21/4/1994
Viyiz étout: