Fallbrook, California,
USA.
Lé 29 dé janvyi, 1977.
Moussieu l'Rédacteu,
Appathemment, les gâzettes veinnent pus vite ichîn en Califournie qu' au Michigan. Dans ma lettre dé la s'maine pâssée j'vouos disais qué j'avais r'chu la cheinne du 18 dé novembre. Eh bein, ichîn, m's anmîns Triggs (Mde. Triggs est St. Ouënnais, née Carré) ont r'chu toutes les gâzettes jusqu'au neuf dé dézembre, ch'est en tchi j'ai ieu la chance dé m'régaler en les liêsant dé A jusqu'à Z.
Dans la gâzette du 25 dé novembre j'ai ieu l'pliaîsi d'vaie l'portrait du Docteu Fraînque Le Maistre et d'sa danme et d'lus deux garçons Françouais et Edouard en d'vant du palais d'Buckingham où'est qu' Sa Majesté la Reine, nouot' Duc, présentit l's însîngnes dé l'O.B.E. au Docteu. Et dans la mème gâzette j'vai l'portrait d'lus traîsième fis, l'Député Jean d'vrais Jèrriais, parmi eune racachie d'jannes filles. Né v'la eune fanmil'ye, Jèrriaise dans l'âme, tchi fait honneu à sa pâraisse et à toute l'île en mème temps!
Ch'est auve grand pliaîsi qué j'vai acouo quâsi tous des vrais noms Jèrriais en liêsant la liste des Officièrs dé Connêtabl'yes, Vîngt'nièrs et Chent'nièrs êlus dans lus pâraisses et assèrmentès dans la Cour Rouoyale pour sèrvi dans la Police Honorifique dé l'île. Ch'est un bouan sîngne pour l'av'nîn du système honorifique, et ch'est r'mèrquabl'ye tch'i' s'trouve acouo tant d'vrais Jèrriais parmi eune populâtion dév'nue hardi êtrangiéthe dans l'couothant d'eune trentaine d'années, à sèrvi l'publ'yi d'l'île.
Par contre, sus la preunmié page dé la gâzette du deux d'dézembre nou vait les portraits de chînq mêssieux, appathemment d'împortance dans la bureaucratie, tchi sont partie d'eune douzaine dêjà bein payis comme “civil servants” et tchi 'taient sus l'tapis pour eune augmentâtion dé septante-chînq pour chent d'salaithes, et sus les chînq i' n'y'a qu' un nom Jèrriais! Ch'n'est pon ravissant qu' les sŷndicats d'mandent pus d'sou, mème au point d'lus mettre en grêve, quand i' vaient d'ité dans la gâzette.
I' faut féliciter lé “Working Party” tch'a décidé qu' ch'est pus souhaitabl'ye dé rap'tichi l'nombre d'motos dans l'Île qué d'vilanner la campangne en abattant des maîsons et d'gâter d'bouanne tèrre à patates pour faithe du run pour des neuves routes et en êlargi d'vielles. Vouot' articl'ye d'fond au sujet est bein à propos. Ou dév'thait êt' apprînse par tchoeu par touos les motoristes.
Et j'sis acouo d'avis (j'l'ai dis tant d'fais qué j'peux, auve raison, êt' atchûsé d'répêtition!) qué ch'est la vitesse tch'est grandement responsabl'ye pour les dgiex morts, et eune racachie d'bliessés, dans l's accidents d'motos dans les routes dé l'île l'année pâssée. Et qu' les Connêtabl'yes dév'thaient mett' des affiches ordonnant eune réduction d'vitesse dans les p'tites rues d'lus pâraisses, et cèrtainement dans la ville. Mème en Améthique, ou'est qu' j'avons d'belles grandes et larges rues, i' n'est pon pèrmîns d'cachi à quarante milles à l'heuthe dans les rues des villes, et ch'est riditchule dé l'pèrmettre dans la ville dé St. Hélyi.
I' faut admither les jannes filles “naviguantes” d'au jour d'aniet quand nou vait l'portrait dans la gâzette d'un navithe à vailes dans la caûchie auve un fliotchet d'filles jutchies dans l'ridgage, mème quâsi jusqu'au haut, du mât d'mîsaine. Nou-s-en frémit d'les vaie, et v'la tchi m'fait penser au dangi tchi hantait tréjous nouos anchêtres Jèrriais tch'étaient naviguants quand i' fallait grîmper amont l'ridgage dé lus navithes en plieine mé duthant les tempêtes, prîncipalement dans l'hivé quand i' g'lait et que vèrgues, filins et vailes 'taient gliaichies. Fallait-i' êt' dueurs!
I' s'en va êt' întérêssant d'vaie l'rêsultat d'la décision d's Êtats dé pèrmett' lé stâtionnement d'motos gratis la niet dans les garages dé stâtionnement d'la ville, auve l'idée qu' les propriétaithes dé motos îthont stâtionner d'dans à la pliaiche dé laissi lus motos à encombrer les rues la niet.
À m'n idée, les gens sont dév'nus trop pièrcheux pour marchi les deux pas aller et v'nîn d'sièz ieux ès garages, sustout s'i' faut aller dans l'chein tch'est au haut du C'mîn d'la Caûchie. J'espéthe que j'mé trompe, mais j'allons vaie. Si j'tais prophète, j'dithais qué l'av'nîn prouvetha qué les villais aiment mus aller sus rouelles qué sus lus pids d'driéthe, et qu' la seule mannièthe dé l's empêchi d'laissi lus motos dans les rues la niet est d'les mettre à l'amende!
George d'La Forge
Viyiz étout: