La St. Jean
À la St. Jean temps pâssé nou soulait célébrer en Jèrri. Ch'est en tchi des couôteunmes païennes avaient survêtchu jusqu'ès siècl'yes modèrnes.
Viyant qu'les gens criyaient ès mauvais esprits, nou cônait atout eune cône dé boeu ou eune coharne à seule fîn d'êffriter ches esprits-là. Et né v'là pouortchi qu'nou fait braithe les peîles étout. Nou m'ttait tchiquefais d'la féthâle et d'la coutell'lie dans l'fond du bachîn pouor tressonner contre lé méta. Les cheins tch'ont ouï la sonn'nie d'bachîns peuvent têmouongni qu'ch'est d'tchi bizarre.
La Faithe dé la St. Jean 'tait un grand êvénement et des hèrnachies d'gens soulaient aller à St. Jean pouor aver du fanne. Les pêtcheurs avaient la couôteunme dé faithe eune touônnée dans lus batchieaux lé tou du J'va Dgilliaume, un rotchi en d'houors du hâvre d'Bouonne Niet. Ch'est eune couôteunme tchi dispathut tchique temps d'vant la Preunmié Dgèrre Mondiale.
Lé milk-é-pan'tch 'tait eune tradition tchi n'sembliéthait pon trop s'accorder auve nos idées d'anti-crînme d'aujourd'aniet, car les jannes gens soulaient traithe les vaques ès vaîsîns en s'gret bein tôt l'matîn d'la Saint Jean, et pis nou-s'allait voler d's oeufs dé d'dans l'poulailli! La r'chette nos raconte qu'i' faut ajouôter du rhonme au lait auve les oeufs d'battus, et pis du chucre et d'la muscade. Sans doute, v'là tch'était l'êtchivalent du Baileys ou d's alcopops tchi sont populaithes achteu.
J'espéthons qu'touos les mauvais esprits es'sont chassés dé par siez vous, et j'souhaitons à tous (excepté ès voleurs d'lait et d'oeufs) eune bouanne St. Jean!
Geraint Jennings
Viyiz étout:
