Les Pages Jèrriaises

Tout chu spam

Mouôn Doue d'la vie! Y'a-t-i' un tas d'niolîn tch'arrive dans ma boête à m'sages à ches drein! Nou m'a offèrt des coutchieaux à steaks, des boulets d'Viagra, des vaituthes-jouettes, des cartouches à bas prix pouor les printeurs ès compiuteurs, d's hypothèques et d's aéroglisseurs.... sans pâler des m'sages tchi promettent d'allouongni mes parties ou d'agrandi mes seins.

Et pis y'a ches e-mails souo-disant dé tchique membre d'la fanmil'ye d'un dictateur Afritchain tchi d'mandent mén aîgue pouor transféther des sou d'eune banque en Nigérie, ou à la Côte d'Iviéthe, ou au Congo ou à tchique bord d'même. N'en v'là-t-i' du niolîn et d'la fraude!

Chein qué j'n'ai pon r'chu, ch'est un tas d'tout chu spam en Jèrriais. J'n'ai pon eune boêtée dé m'sages tchi m'proposent des pais au fou à bas prix, ni des photos d'vaques dé Jèrri, ni du sitho d'colînmachons. J'n'ai pon r'chu nitout dé m'sages entouor lé transfèrt d'sou pouor tchique membre d'la fanmil'ye d'un Connêtabl'ye d'eune des pâraîsses d'amont, Dgieu mèrcie.

Mais quand jé s'sons n'yés par des louêmes dé spam en Jèrriais, j'saithons qu'not' vielle langue est vraînment d'èrtou. Tch'est qu'ous en pensez?

Geraint Jennings
 

Viyiz étout:

 

Les Pages Jèrriaises