à Portinfé, Saint Ou.
Vendredi au sé.
Moussieu l'Editeu,
Nou peut pâsler de bein des choses, mais nou r'veint tréjous au temps, et j'en avons veu pûs d'une sorte dernièthement. Du temps fraid, du bieau solé, du vent et d'la pluie, mais pas du temps d'êté. Comme j'l'ai dit plusieurs fais, le temps est yunne des seuls choses que nou n'peut pas changi, et ch'est p't'être aussi bein.
Je n'crais pas que j'ai veu la Merrienne rithe tant quand ou liut dans la gâzette que l'Chantgni Edgar Mourant d'la Trinité avait 'té mordu par un tchan. Sans doute, ou s'fit, le Chantgni n'avait rein sûs li pour démontré tch'il 'tait un membre împortant de la Police Honorifique. S'il avait yeu une médaille ou même un mio d'riban le tchan n'éthait pas yeu l'audace de l'attatchi. Et ou se r'mînt à rithe.
Après chonna, Moussieu, j'nos mîmes à pâslé de l'affaithe du fermyi tchi n'avait pas peut entré sa vaque pour le show d'l'Île. Je sommes d'opinion fortement touos les deux que dans les circonstances la Société éthait deu aver un mio d'considéthâtion et éthait deu accepter l'entrée. Après tout, le pouôre homme avait 'té bein malade, avait yeu à sorti d'l'Île pour une sérieuse opéthâtion et avait laissi sa femme à soigni la ferme. Est-che êtonnant, qu'avec tout chein qu'oulle avait à faithe, oulle oublyit la souscription? Mé et la bouonnefemme je criyons que ch'est tout-à-fait comprenablye, mais i' pathaît que les règlyes de la Société ne peuvent pas être d'sobéyies pour autchune cause. Aussi bein que chonna ne s'applique pas à toutes nos actions dans la vie.
Oui, Moussieu, je fut ès courses à Grosnez, ayant 'té transporté là et ram'né par un bouan vaîsin. La Merrienne m'avait donné chînq ch'lîns, mais man bidet avait l'crampre dans ses gambes ou mantchait d'couothage, car je crais qu'un j'va d'ferme ordinaithe l'éthait battu sans s'dêrangi. Je r'vînt siez-mé sans un sou, et i' faut admettre, pas tout-à-fait sobre. La Merrienne ne m'a pas ocquo pardonné, mais ch'est bein seux que la préchaine fais j'n'éthait pas chînq ch'lîns dans ma pouchette, si je n'peux l's'emprunter de Bram, man bieau-fils. J'si convaintchu tch'i' n'ditha pas nennîn au vier Ph'lip.
Je n'sait pas s'ou êtes comme mé, Moussieu, mais j'ithais un but pour un bouon fricot d'huitres, et par conséquent j'ai 'té bein content de vaie par la gâzette que nous en a trouver un nombre du bord de l'est. Dans les vièrs temps y'en avait yeu des mâsses là, assez même pour pouver en exporter en Angliétèrre, mais quand vînt un temps i' n'en restait pas, car y'avait trop d'batiaux à les pêtchi. Y'eut du brit quand l'ordre vînt que nou n'avait pûs l'drouait de les pêtchi, et la Milice eut à s'en mêler. Chutte fais j'espèthe que n'y'étha rein ditet, et que dans p'tit d'temps j'en vèrrait sûs ma tablye.
Jèrri est pour aver un nouvieau Lieutenant-Gouverneux, et par san portrait dans la Post, il a toute l'appathence d'un bouan moussieu. J'avons 'té bein chanceux, car dépis la célèbre Abadie, tchi 'tait tréjous en brit avec le Baillyi, touos nos Gouverneux ont 'té bein charmants et populaithes.
Y'a une autre vacance pour Juré-Justicier, mais je n'crais pas que le public est bein întérêssi. Dans les viers temps ch'n'tait pas d'même, et nou se r'souveint, par exemplye, du Juge Gervaise La Gros, du Juge Duret-Aubin, du Juge Philip Aubin, dans san temps président d'une demié-douzaine de comités, du Juge Malet d'Cart'ret et de bein d'autres à tchi nou hallait san chapé quand nou les rencontrait.
J'avions 'té învités, la bouonnefemme et mé, à la grande fête à Saint Aubin, mais quand j'entendîmes chein tchi s'était pâssé là, je fûmes bein contents que j'avions resté siez-nous, car i' s'y trouvit un fliantchet de vagabonds, tchi 'taient là simplyement pour faithe du brit. J'en avons bein trop de chutte sorte-là, et ch'est grand dommage que nou n'peut pas les clièrgi d'l'Île.
Ch'est avec grand r'gret que j'ai ouï d'la mort du Sieur MacMonies, car ch'tait yun des Améthitchains sûs tchi nou pouvait s'fier. Il accatait tréjous du miyeu, et payait d'bouons sous pour.
Y'a plusieurs autres choses que j'éthais voulu mentionner, mais je qu'menche à m'lâssé, et je crais tch'il est temps que je m'couoche. À la s'maine tchi veint, et tout succès.
Ph'lip
1963
Viyiz étout: