Au Portinfé.
Moussieu l'Editeu,
Les moyennes à d'mié-prix! “Eh bein,” comme dit la Merrienne, “y fallait s'y'attendre, épis quand-même ch'n'est pas important, car ch't'année y y'a pour dithe que des grôsses. Même les p'tites que nous éthait aut'fais donné ès couochons mais tchi furent accattées pour pliante ès vendues d'vant Nouë, ont produit des toppeurs, une chose que nou n'avait jamais veu.”
“Et qu'nou n'pouôrrait pas r'vais pour bein d's'années,” j'l'y dit. “Notre vieille Royale est commes les femmes; d'une année à l'autre nou n'sait jamais tchèsqu'ou s'en va faithe.”
“Assez d'chonna,” ou s'fit. “L's'hommes de valent pas un mi mûs. A matin, par éxemplye, tu t'en allais faithe un bouon jour de trâvas, mais par chein qu'j'en ai veu, tu n'as pas ocquo qu'menchi.”
“Ch'n'est pas vrai,” j'l'y dit, “épis quand-même, après dêjeuné, j'ai tait print d'un têrriblye ma dans les reins, de tchi qu'j'ai tait bein près de m'méttre au liet.”
La bouonnefemme r'mértchit, sûs chonna, que chu ma-là n'avait pas affécté m'n'appétit.
“Ah, t'en va-tu t'taithe” je m'fit. “Y'a une chose que j'peux t'dithe, Merrienne, et ch'est que si j'connaissais une maladie tchi pouôrrait paralisé la langue, tu l'éthais bein vite. Ach'teu, pâslons d'autre chose, car je n'veur pas être mârri. J'ai ouï agniet qu'en Ville y'a des membres de la police honorifique tch'ont dit tch'y n'éthont pas l'temps de sérvi comme police spéciaux quand la Princésse s'sa ichin. Y pathait tch'y s'sont trop embarrassés.”
“Mais,” ou dit, “êstche tch'y n'ont pas yeu l'ordre du Connêtablye?”
“J'pense bein qu'oui,” j'l'y dit, “mais y s'en fichent.”
“Et pourtant, j'avais tréjous creu qu'un Chantgni ou un Officyi du Connêtablye, sans pâslé d'un Vingtgni ou même d'un Inspécteu des Qu'mins, était t'nu d'obéi san Connêtablye.”
“Et mé étout,” j'l'y dit, “mais y pathait que dans la pâraisse de Saint-Hélier tout chonna est changi d'nos jours. Dans l'temps du célèbre Johnny Piné et du Connêtablye Clarke, nou n'éthait pas veu ditét.”
“Et agniet, à Saint-Louothains, par éxemplye,” ou s'fit, “j'voudrais vais un seul membre de la Municipalité dithe nânin au Connêtablye Baudains.”
“Tu r'veins tréjous à Saint-Louothains, ma pouôre femme,” j'l'y dit, “mais ch'est vrai asséz, le Jack Baudains séthait comment ramâssé autchun individu tch'y dithait tch'il tait trop embarrassé quand il en avait besoin. Y ne s'sait pas membre d'la police longtemps, ch'y-là.”
Après chonna, Moussieu, ou s'mint à pâslé de chein qu'oulle avait liut dans la gâzette au sujet des licences à Saint-Sauveux, et j'n'ai pas besoin d'vos dithe que si n'y'avait dans l'île qu'une seule licence pour le bèthe, la bouonnefemme la freumthait s'oulle avait l'pouvé. Ou qu'menchit par mentionné l'Sieur Le Gallais.
“Ne v'la un homme que j'admithe,” ou s'fit. “Il est d'opinion que y'a dêjà asséz d'licences et y n'a pas d'peux de l'dithe en plienne Assembliée. Ch'est grand dommage que n'y'en a pas pûs comme l'y.”
“P't'être bein, sûs un sens,” j'l'y dit, “mais y n'faut pas oublié que l'Sieur Le Gallais, et d'autres qu'en ont l'moyen, n'ont pas bésoin d'allé à une auberge quand ils ont sé. Tout ch'qui veulent ils ont siez-yeux dans lûs armouaithes, mais ch'n'est pas d'même avec l'ouvriyi. S'y veur une pinte de bièthe après san jour de travas, y faut tch'il aille à l'aubérge, et tchiquefais y'a un but.”
“Y s'sait bein mûs siez-l'y à béthe une tâsse de tais avec sa femme.” ou dit.
“Par bordée,” j'l'y dit, “ch'est vrai, car quand un homme laisse sa femme toute-seule touos les siers, y'a l'dangi que tchique bouon vaisin pouorra considethé que ch'est san d'vé d'allé vais qu'ou n's'engnie pas.”
“Ch'n'est pas chein que j'voulais dithe,” ou s'fit sévèthement, “et tu l'sais bein. Si l's'hommes mathiés restaient au coin d'lûs feu, au lieu d'allé dêpensé lûs sous et ruiné lûs santé dans l's'aubérges, nou n'vêrrait pas toutes chais causes d'vant l'Magistrat, et pûs qu'chonna, y n'y'éthait pas toutes chais divorces.”
“J'en doute, Merrienne,” j'l'y dit, “et quant ès divorces, je s'y d'opinion que quand un homme et sa femme n'accordent pas y sont mûs s'pathés.”
“Oh!” ou s'fit, “et pourtant, té et mé j'n'avons pas tréjous accordé, et j'sommes ocquo ensemblye. Tchèsqu'en est la raison?”
“La raison, ma chièthe,” j'l'y dit, “est que j'nos entre enduthons, parsque, à prendre yun dans l'autre, je n'séthons pas tchi faithe sans té, et j's'y bein cértain que tu n'séthais pas tchi faithe sans mé. Allons, j'ai faim, tchèsque tu t'en vas nos donné pour soupé.”
“Et l'ma dans les reins,” ou s'fit, en souriant, “ès-t'y mûs?”
Et, Moussieu, j'fut forchi d'rithe.
Ph'lip
1959
Viyiz étout: