Moussieu l'Editeu,
La Merrienne avait tait s'prom'né l'autre arlevée et quand ou r'vint pour le tais j'viyais ben qu'oulle tait un mio gênée et je l'y d'mandit pourtchi.
'Ch'est la Jane' ou raiponnit. 'San grand s'en va bétôt tchitté l'êcole et ou n'sait pas tchèsque y s'en va s'mettre à faithe.'
Y faut que j'vos explique, moussieu, qu'la Jane est la trâisieme de nos filles et qu'oulle a un fliantchet d'mousses. Ch'est d'même dans notre famille.
'Tchèsque san pèthe dit' je d'mandit. 'Par chen qu'j'en ai veu d'chu mousse-là, ch'n'est pas yun des bouons garçons du monde.'
'Il est mauvais comme la galle' dit Merrienne. 'Il a tréjous tait d'même et la Jane n'a jamais peu san graie. Quand à san pèthe, y n's'en gène pon et la pouôre mèthe est au m'séspé.'
'Dis-l'y d'ma part d'en faithe un ministre. Ch'est tréjous les mauvais balloques tchi font les miyeurs prédicateurs' je l'y dit.
'Tu dév'thais avé honte de pâslé d'même' s'fit la Merrienne, toute mârrie. 'Tu n'amende pûs sus tes viers jours et v'la tchi m'fait grand dêpié.'
'Tu n'comprends pas, bouonnefemme' je l'y dit. 'Eune fais tchi s'sa ministre y s'comportétha. Touos ses vices dispathaitront et y d'veindra un vrai modèle. R'garde nos Recteurs. Jamais tu n'me dithas qu'parmi yeux n'y'en avait pas deux-trais tchi n'faisaient pas l'êcole bissonièthe quand y taient mousses et tchi n'allaient pas cherchi des nids au Dimanche quand ils éthaient deu être au tchulte.'
La Merrienne toussotit. 'P't'être ben' ou dit 'mais seux et certain que n'y'en avait pas yun qu'avait la mêchanc'té d'chu mousse ichîn. Y va à l'êcole quand il y pense, et san maître s'sa ben content d'en être dêfait. De jour y couort les qu'mins et sa mèthe me dit qu'oulle est seuze tchi d'valle de niet par un êchelle et s'en va ou n'sait pas iou. Y finitha par se trouvé en prison pour tchique bêtise et la Jane en mouôrra d'chagrin.'
'Par chen qu'tu m'dis je sis pûs convaintchu qu'jamais tchi faut en faithe un pâsteur' je l'y dit. 'Et je sis prêt à gagni qu'un jour, car y n'est pas bête, le mousse, auvec toute sa mauvâitchi, y s'sa Recteu d'Saint-Ou.'
'J'voudrais l'craithe' ou s'fit 'mais à qu'menchi y n'a pas l'êducâtion.'
'Tchèsque chonna fait? Pour ben tchi sache lièthe et chiffré un mio ch'est tout ch'qui faut. Et n'oublie pas la d'mande tch'y a au jour d'anniet pour des Recteurs. Le Doyen cherche partout mais y n'peut pas en trouvé. Va dithe à Jane d'allé l'vais tout'd'suite. Y l'y ditha comment tchi faut qu'ou s'prenne.'
'Eh ben' ou dit 'auprès tout tu'as p't'être raison. Les Recteurs ne sont pas mal péyis et y'a eune maison fournie et un gardin pour des flieurs et des lédgumes. Si seulement l'jeune Frâinque n'tait pas un si mauvais sujet.'
'Pâsle-l'y d'quatre chents louis par an sans conté les extras et eune djobbe tchi n'tue pas' je l'y dit 'et si je n'me trompe pas y ditha oui tout-d'suite. Ch'nest pas l'gâs pour r'fusé tant d'hérpins.'
PH'LIP
23/4/1949
Viyiz étout: