À Portinfé, Saint Ou.
Jeudi au sé.
Moussieu l'Editeu,
Le pouôre vièr Ph'lip est en disgrâce, et pourtant i' n'peut pas vaie tchèsqu'il a fait d'ma.
Pour vos explitchi. La s'maine pâssée ma femme me dit qu'à l'âge qu'oulle avait ou criyait tch'il 'tait temps qu'oulle eûsse une servante, "car" oulle àjouotit, "avec mes rhoumatices je n'peux pas faithe le travas d'la maison sans aide".
J'approuvis de ch't'idée-là, et deux jours après une jeune fille de dans les djais-sept à djais-huit ans fut engagie et qu'menchi san travas. La hardelle me pliaisait bein, et quand, dans la matinée du traisième jour, ou me d'mandit s'ou pouvait se r'pôser pour tchiques minutes, car ou 'tait lâssée, j'la prins sûs mes g'nors et ou n'fit, autchune objection. Tout éthait 'té bein si la Merrienne n'avait pas entré soudainement, sans nos donner autchun avertissement. La pouôre fille en entendit de pûs d'une sorte devant pouver ramâsser ses effets et fichi san camp. Epis la bouonnefemme m'en chantit pour une bouonne djais minutes. Ou m'traitit de touos les vices, et éthait sans doute continué pûs longtemps sinon qu'ou vint au but d'haleine, et j'eus une chance de me d'fendre.
J'li dis que viyant qu'la pouôre fille voulait se r'pôser tchiques minutes je l'avais prinse sûs
mes g'nors hors de sympathie, et ch'tait tout.
"Oh! ch'est d'même," ou s'fit, "et si, un bieau matin, tu'avais entré et trouvé
un jeune domestique sûs mes g'nors, tchèsque tu'éthais fait?"
"J'li éthais souhaité jouaie," j'li dis, "et j'vos éthais laissis trantchille."
À ch'teu', Moussieu, ou pouôrrez comprendre que l'pouôre Ph'lip est drait dans l'fond d'la câsse à tchan. La Merrienne ne m'a pas dit une pathole pour deux jours, et de niet ou m'touône le dos. Mais oulle a engagi une autre servante, une grôsse femme d'au mains septante ans, tch'a tué trais hommes et est ocquo à r'garder pour un autre. Ou n'veindra pas se r'pôser sûs mes g'nors, chette-là!
Hièr matin, lé Francis Le Ruez vint m'vaie, et j'en n'tais bein content, car ch'est yun des
raide bouons garçons que j'aie connu dans l'couothant d'ma longue vie. Il avait 'té au "Dairy Show" avec plusieurs autres Jêrriais, et i' 'taient tous d'opinion que les juges (des Angliais) n'savaient pas lûs djobbe. Pûs tard dans la s'maine, ils avaient tous fait une longue touônée pour vaie des gens tchi gardent des jêrriaises, et l'impression tch'ils en eûtent ch'tait qe les raide bouons piéchots 'taient bein rares, la grand mâjorité ayant des piéchots dêspendus. I' r'vintent en Jêrri tout à fait satisfaits que bein p'tit des chents bêtes tch'ils avaient veu éthaient gâgni même un prix d'pâraisse en Jêrri.
Le Comité des Travaux Publics r'est dans les nouvelles, car sans consulter autchune personne que yeux-mêmes - une habitude tch'ils éthaient deu abandonné après le fiasco du Vièr Marchi - ils ont décidé de faithe de grands changements dans le grand marchi. Les bouochièrs et d'autres ont protesté, mais, à ch'qui pathait, sans r'sultat, et chutte fais le Comité s'en va faithe les changements sans crainte d'oppôsition. Au moment nou n'comprend pas exactement tchèsqu'est lûs idée, mais i' faut espéther tch'i' savent chein tch'i' font.
Quant ès êlections, lé Sieur Syvret n'a pas yeu d'oppôsition pour Chantgni à
Saint Louothains et l'Fred du Feu à bein battu l'Sieur de Faye dans l'êlection pour un Juge samedi l'arlevée. Y'a des gens tchi craient que l'Bill Perchard pouôrrait aver un djobbe à se r'trouver ré-élu à un an d'ichin quand y'étha une êlection partout l'Ile pour chouaisi quatre Sénateurs. Pour un an il est bein, mais dans une êlection générale, avec p't'être sept ou huit candidates, ou meme pûs, autchune chose pouôrrait s'arriver. Enfin, ch'est d'même dans la politique quand nou-s-a tchiquefais veu de bein drôles dé r'sultats. J'ai déjà ouï de trais Députés tchi voudraient p't'être monter un mio pûs haut l'année tchi veint.
J'ai liut avec grand pliaisi qu'une vraie forêt d'bouais s'en va être pliantée à Nièrmont. Ch'est un signe que y'a ocquo des hommes en Jêrri tchi sont en faveur non seulement de prêserver mais actuellement de v'nin à l'aide de la natuthe, en embéllissant ses bieautés.
Une drôle d'affaithe d'la mort de chais deux couochons dans l'couothant d'la traversée de Jêrri à l'Angliétérre. Nou pouôrra en saver pûs long bétôt, mais j'avais tréjous creu qu'un couochon n'tait pas un anima que nou pouvait considéther délicat. I' s'peut avec chonna ,que les pouôres bêtes avaient 'té si malades en faisant l'trajet tch'ils avaient succombé, comme j'fus bein près d'faithe y'a bein d's années quand le vièr Ibex print pûs d'quatre heuthes d'vant arriver en Djèrnési. J'me r'souveins que j'pâssi la maintchi du temps à dithe mes prièthes, et que p't'être chonna m'gardit en vie mais nou n'peut pas craithe que chu r'mède-là s'applique à des animaux si inférieurs comme des couochons.
Par les chiffres que nou-s-a veu sûs la gazette les fermiers ont fait raide bein avec lûs patates
ch't année et y'a toute espéthance que l'année tchi veint la saison s'sa bouonne étout. Au moment ch'est les brécolis tchi sont exportés et les prix n'pathaissent pas tant pièthe. Dans les circonstances ch'n'est pas étonnant que d'bouonnes fermes à louer sont écarces et que les louages d'mandés né sont pas trais ou quatre louis la vrégie comme dans man jeune temps. Quand-même, nou-s-est content d'vaie que parmi nos jeunes fermiers y'en a tchi n'ont pas d'peux de chein tchi l's attend dans les jours à v'nin. Y'a, par exemplye, le fils au Jack Rondé, tchi veint de mathier la fille à Edgar Mouothant, et tchi prend la ferme des P'tits Canons tandis que san pèthe se r'tithe au Haut d'l'Orme tout près. En v'la yun tchi ne f'tha jamais banq'route. Quand au Edgar Mouothant, ch'est l'traisième mathiage ch't année dans sa
famille.
À ch'teu', Moussieu, assez pour agniet et toutes les bouonnes chances.
Ph'lip
Viyiz étout: