Quand la Merrienne vit dans la gâzette qu'un comité appointé par les Etats y'a tchique temps 'tait en faveur d'êtablye un casino en Jêrri, et, ocquo pièthe, une lott'tie, oulle en eut pour une bouonne dém'ieuthe à m'dithe chein qu'oulle en pensait.
J'êcoutit sans dithe un mot, mais quand à la fin s'n'haleine l'y mantchit, j'crut tch'il tait temps de faithe tchiques obsèrvations.
“Je n'sais pas, après tout, Merrienne, si un casino ne s'sait pas une bouonne chose. Pense ès millionaithes tch'y veindraient de touos les bords et pense au profit pour les Etats et pour l'île généralement. Considèthe, vieille duthe-tête, qu'après tchiques années y n'y'éthait pas d'taxes en Jêrri, et que j'n'éthions pas à péyi d'rât. Tu pouôrrais mettre un ch'lin ou même pûs, dans la collécte à la chapelle sans l'en apérchevé. Mé, j'éthais un doméstique et té une sérvante et je s'saimes heutheux comme des princes.”
“Mércie bein des fais,” ou dit, “mais j'peux m'graie sans une sérvante, et té sans doméstique. Si j'n'avais rain à faithe, je s'saimes bétôt souos les mérgots. Nânin, Man Ph'lip, tout chonna ch'est du gniolin, et j'éspèthe bein qu'nos membres de campagne enviêthont chu rapport tu sans bein iou.”
“Ch'est pûs qu'probablye,” j'l'y dit, “car la pliupart sont d's'imbéciles, mais au mains y m'dévthaient pas objécté à une lott'tie organîsee par l's'Etats.”
“Chonna s'sait piéthe qu'un casino,” ou dit, capuchant la tablye avec sa main. "Tu'ès fo don, Ph'lip.”
“Nouffé, Merrienne, je n's'y pas fo,” j'l'y dit, “car, après tout, tchesque ch'est qu'la vie sinon une lott'tie?”
“Ecoute,” je continuit. “Quand tu t'leve au matin peux-tu être seuze que tu s's'as en vie quand veindra l'se? Quand tu fais un podin d'Noué, peux-tu t'né que tu s's'as la pour aidgi à l'mangi?”
Oulle êcoutit et n'dit rain.
“Pûs qu'chonna,” j'l'y dit, “quand j'pliante mes patates, ai-je autchune idée du prix sûs l'bridge quand j'vendrai à les defouï? J'peux-t'y être seux qu' autchune chose que j'met dans la têrre me rapportetha un sou d'profit? Quand - ”
Ou m'interrompit: “N'en v'la assez,” ou dit. “Pâslons d'autre chose.”
“Une minute,” je m'fit. “La pûs grande lott'tie dans l'monde ch'est l'mathiage, et tu l'sais bein. Combain qu'j'avons veu dans notre temps tch'ont touone mal après avé fait un bouon qu'mench'ment?”
“Ch'est presque tréjous la faute des hommes.” ou dit.
“Chonna ch'n'est pas vrai,” j'l'y dit. “En s'mathiant la hardelle promet qu'oulle obéitha a s'n'homme. Dans l'couothant d'ma longue-vie, j'n'en ai connu qu' yunne tch'y l'fit, et au but d'siez mais la pouôre garce s'en fut à l'asile. Ach'teu, es-tu ocquo d'la meme idée au sujet d'une lott'tie publique?”
“Oui,” ou raiponnit, “ch'tait injuste de forchi une femme a promettre qu'oulle obeithait a s'n'homme, et j'comprends que l'service est difféthent ach'teu, et qu'ou n'est pas obligie de promettre une chose si riditchule. Che sait une bouonne chose, a ma veue, si ch'tait l's'hommes tch'avaient a promettre d'obei à lus femmes.”
“Ch'n'est pas nécéssaithe,” j'l'y dit, “car les pouôres balloques le font et l'ont tréjous fait. Si un homme tache de faithe à sa volonté et dit à sa bouonnefemme de taithe sa béque, y trouve bein vite que n'y'a pas une minute de paix et de trantchillité dans la maison. Mé, par éxemplye, j'ai êprouvé des fais sans nombre à l'prouvé que j'tais maître ichin, mais tréjous tu m'as m'né une telle vie que j'ai bétôt abandonné l'idée.”
“Et en as-tu 'tait d'pièthe?”
Moussieu, j'éthais bein voulu dithe oui, mais étant un homme tch'y dit tréjous la véthité, je n'pouvais pas, et quand la Merrienne me dit d'allé vais que tout tait bein dans l'êtablye, je m'y'en fut comme un tchan fouôté.
Ph'lip
1959
Viyiz étout: