à Portinfé,
Saint Ou.
Moussieu l'Editeu,
Quant au temps, i' n'faut pas nos pliaindre, car, après tout, j'n'sommes qu'au mais d'avri, et si, dans la s'maine passée, j'avons yeu d'la plyie et des vents fraids, j'avons yeu étout un mio d'solé. En Angliétèrre et en France le temps a 'té pièthe, et d'l'autre but du monde y'a yeu un terriblye trembliément d'têrre tch'a dêtruit des villes et tué des chents personnes. Nan, Moussieu, je n'd'vons pas nos pliaindre, mais au contraithe i' faut nos féliciter que la Providence nos a 'té bouonne.
Hier matîn, la charmante dame de tchi j'vos ai souvent pâslé me prînt dans san auto faithe une prom'nade dans l'nord et l'ouest de l'Île, et ch'tait dans la vallée du Mouothi que j'vîmes les pûs belles patates, car dans plusieurs betchets ils avaient 'té grapinées et mertchaient l'rang. J'n'ai pas ocquo veu L'Etâ, Rôsé ou la Grève dé Lé et l's autres districts eûsifs, mais je n'crais pas, pour chein qu'j'ai ouï, tch'i' sont pûs avanchies que les siennes que j'vîmes hier,
En Djernézi, chînq femmes tchi s'étaient mînses sûs les rangs dans l'élection pour Députés ont toutes réussi, et la Merrienne maintchein que ch'est une preuve que les Djernéziais ont pûs d'întelligence que nous Jèrriais. Oulle espèthe qu'la d'mouaîselle Enid Le Feuvre, tch'a décidé d'prendre dans l'élection dans l'traîsième district à St. Hélyi, s'en va gângni par une grande mâjorité, et je n'crais pas qu'oulle en est d'lyien.
J'éthais voulu vos donner m'n opinion de chein tchi s'en va s'arriver à la Trin'té, mais quant à chonna je n'si pas, au moment, pûs savant qu'vous, ch'est à dithe, j'n'y connait rein. Mais y'a pûs d'animâtion dans la pâraisse agniet que même dans la fameuse élection pour Député quand le John Godeaux et l'Colonel Nicolle, tchi m'suthé pûs d'siez pids, se trouvîtent en oppôsition.
Assez pour les élections à ch't heu pour l'paiement des membres des Etats. Tchèsque est votre opinion là-d'sûs, Moussieu? La Merrienne n'veurt pas en ouï pâsler, mais quant à mé y'a longtemps que j'ai veu chonna v'nîn, et j'me rappèle, Moussieu, que vous et mé j'avions donné nos opinions sûs l'sujet dans mes lettres et que j'n'accordaîmes pas tout à fait. Je n'crais pas que j'avons changi hardi.
Partout ouèsque nou va dans la Ville, et même dans la Campagne, ch'est la même histouaithe de pûs de touristes ch't année que janmais, et la Merrienne, se r'souv'nant de chein tchi s'arrive dans les prîncipales boutiques de St. Hélyi, a dêjà fait des préparations en accatant tandis tch'il est temps tout ch'qu'i' nos faudra ch't êté. Oulle a même accaté tchiques boutelles de rhum et d'cognac pour me garder trantchille, et sans doute. Moussieu, j'éthais pûs à vos dithe quand l'temps veindra. Et ch'est tout ch'que j'ai à vos dithe agniet. J'vos souhaite, Moussieu, bouonne santé et tout succès dans toutes vos entreprînses.
Ph'lip.
Viyiz étout: