Dans l'monde, la pizza est iun des fricots favoris achteu, mais l'originne est êdgéthée dans la bliâse du pâssé. Ch'est cèrtain qu'lé mangi a 'té sèrvi sus du pain d'pis les touos vièrs temps, mais la rêunnion d'la tonmate et la boulangu'thie en Ûrope avait à attendre l'întroduction d'la tonmate du Nouvieau Monde.
Les Vièrs Romains soulaient graie des ronds d'pâte atout d'tchi d'ssus, et nou pouôrrait înmaginner qué Jules César avait divisé s'n île dé Césarée en douze sus la carte tout coumme des tranchies d'pizza qu'li et ses douze généraux 'taient à mangi à chu moment-là! Nou dit qu'lé mot pizza appathut pouor la preunmié fais dans des dotchuments au dgiêxième siècl'ye – mais ché n'fut dame mention d'eune pizza au poulet tikka! Nan, i' sembl'ye qu'la pizza 'tait tout sîmpliément du pliat pain, un couôsîn du pain pitta qu'nou mange acouo en Grêce. Y'en a tchi disent qu'les mots pizza et pitta veinnent d'la même réchinne, mais ch'n'est pon tout l'monde tchi sont d'avis sus l'originne.
L'originne d'la pizza Mèrdgitte est bein connue. Quand la Reine Mèrdgitte d'Italie vîsitit Napl'yes en mil huit chent huiptante-neuf, un couque d'là-bas griyit eune nouvelle pizza patriotique s'lon la couleu Italienne: des tonmates pouor lé rouoge, du fronmage mozzarella pouor lé blianc, et du basilic pouor lé vèrt.
D'pis chu temps-là, la pizza a crouaîsi l'ochéan, a tchilyi d'l'ananas pouor la pizza Hawaïenne, a ramâssé du pînment pouor la pizza Texanne-Mexitchaine, et a 'té fricachie en Êcosse atout des frites.
Pouor dé mé, j'ai mangi eune pizza Brétonne ès artichauts en Finistère, et eune fais dans la Grand'-Tèrre, j'vîsitis eune aubèrge Irlandaise où'est qué j'gouôtis eune pizza Irlandaise ès patates!
Et s'nou voulait înventer eune pizza Jèrriaise, tch'est qu'nou-s'y ajouôt'tait? Des pais au fou et d'l'andgulle, p't-êt'? Mais l'pus împortant s'sait d'la fouângner sus eune fielle dé chour!
Geraint Jennings
Viyiz étout: