Noufait dgia, jé n'sis pon horte d'Jèrri - comme ous avez sans doute pensé né v'là tchiques sémaines. nan, j'n'ai pon 'couo 'té appelée à faithe man sèrvice - mais entre nous, dites-mé, jé sis seuse qué ou préfethez qué j'n'en pâle pon, entouor chutte malheutheuse dgèrre. Vaut bein mus s'taithe car ch'n'est dame pon d'tchi à en bagouler au pliaisi, bein mains en faithe des rithies. Mais, tout d'même, comme nou dithait en Sèr, ch'est ''d'pouorres affaires,'' est-che pon? Et pis, quand même, tch'est qu'nou peut bein en dithe, quand nou n'y connait rein? Y'a un bouon vièr diton jèrriais qui dit - Quand nou n'sait pon nou n'peut pon faithe, et si nou n'sait pon faithe faut s'taithe. Et ch'est bein vrai, est-che pas?
Allons, pâlons d'autres choses. J'mé sis apèrchue qué les papièrs à ches drein sont bein pus raisonablyes quant ès titres qu'i' font sèrvi à la tête des colonnes qu'i' n'avaient 'té pour eune volée. Car y'avait longtemps ichin en Jèrri, comme par ailleurs, sans doute, qu'i' sembliait qu'les cheins respnsablyes pour les bouistres d'papièrs prenaient lus pliaisi à produithe des titres sensationnels pour les fichues nouvelles. Et même ches nouvelles 'taient souvent exaggéthées d'eune maniéthe èmèrquablye - un tats dé p'tites nouvelles dé rein du tout et pas d'conséquenche, du p'tit devis, enfin, qué nou s'pliaisait à raconter d'eune maniéthe à faithe êcaler l's yièrs et tout sîmpliément pour enbliûter les gens à acater un papi pour vaie les nouvelles. Véthe, autcheune pétite chose est touonnée chein d'ssus d'ssous et à l'envèrs et agrandie pour l'occasion - en véthité, d'eune moûque un êléphant! Hé, pour en finni d'pus court, quand ches mêssieurs journalistes n'ont pon d'vraies nouvelles - eh bein, mes chièrs lecteurs, il' en font, là don! Eh bein jé n'sis pon d'même, mé. Marie La Pie vouos a tréjous dit les nouvelles telles qu'ou l's avait ieues, sans modification et sans exaggéthation. Car, j'l'ai dit devant, j'crai, et jé l'dis acouo - la maîntchi des menneties qu'nou-s'entend n'sont pas seulement dé vraies menneties! Ou comprendez bein chein qué j'veurs dithe, est-che pas? Et pis, ayant 'té bein êlevée, à l'êcole du dimmanche et confirmée et dé tout, j'ai tréjous tâchi d'siéthe les bouons conseils dé mes pathents, tchi m'disaient tréjous du temps tch'il 'taient acouo d'chutte pouorre triste tèrre dé n'aver jamais d'peux dé dithe la véthité, la puthe, plieine et entchiéthe véthité! Hé, véthe, et acouo, quand nou-s-y pense, i' n'est p'têt' pas tréjous bouon dé dithe la véthité telle qué nou la sait, valet. M'est avis, mé, qué si j'l'avait fait, j'éthais bein des fais ieu eune paffe dans la bec et un passe'l'avant ailleurs, bouffre d'métchi!
J'avais quâsiment pensé dé c'menchi eune colonne dé nouvelles couothantes et d'appeler chutte colonne 'Chin et Là - pour être à la mode, ou viyiz. Cèrtainement, i' faudrait qu'j'en pâlais au Chef, car ch'est li qu'est l'maître dé tout ch'la - mais j'vouos l'avais dit devant, j'pense.
'Chin et Là.
Hièr au sé dans les huit heuthes un grand fliotchet d'monde sé trouvit à la carre dé la Rue Tathée. Par la f'nêtre du pignon d'la maison d'la carre i' viyaient un cat à s'laver la fache.
La s'maine passée y'a ieu tout pliein d'frétîn dans la mathe à cabots àla Grand' Grève et l's avièrs du vaisinné ont 'té bein embarassés atou lus haves niet et jour.
Il est temps qu'la nouvelle leune èrveinge, car i'fait si niet tout chu temps auprès l'thée qué nou-s-a d'la peine à vaie l'pid devant sé.
Y'a du pité et d'l'ieau dans les mathes tout chu temps car i' tchait d'la pyie quâsi touos les jours.
Dans cèrtain district né v'la longtemps nou-s-a veu (ou nou pensait qu'nou-s-avait veu) un îndividu aransé l'long du fossé auprês solé couochant. Cèrtain moussieu, l'autre jour, prînt couothage et quand il appraichit i' s'apèrchut qué ch'tait eune vielle pièrre dé hèche tch'avait 'té là sans doute au mains quat' chents ans.
Dans l'Mathais d'Haut un homme fut veu avant hièr faisant l'quatre et l'chînq et chantant à tue-tête. Bein seux qu'il 'tait soûl.
Bein vite j'allons r'aver eune êlection pour Juge. Y'a trais candidats et il est probable qué l'chein tch'étha l'pus d'vouaix es'sa êlu.
I' pathaît qu'i' failit y'aver un accident hièr en ville quand un basset crouaîsit la rue d'un enbront et s'enhèrmellit dans les gambes d'eune démouaiselle qui s'êtravelit. Ou n'eut pas d'ma mais tout l'trafi fut arrêté pour chinq ou siex minnutes jusqu'à qu'la foule fusse êcartée.
Iun d's aut' jours i'eut du train dans eune pétite aubèrge. Deux gas s'entre-traitîtent dé quédoles et dé touos les vices pour un bouon quart d'heuthe. L'affaithe avait toute la minne dé dév'nîn salope, mais les deux ''mêssieurs'' finnîtent par châtchi d'main et r'sont raide bouons anmins.
Là, eh bein, n'en v'là pas mal. Y'a un but à tout, même à des nouvelles!
Marie la Pie
7/10/1939
Viyiz étout: