Les St. Jeannais s'en vont aver un bal
Ki ri-ki-ki
Ka-ra-ka-ka
Eh bein, sav'ous les dreines? Les St. Jeannais s'en vont aver un bal - eune grand' bordée d'danse au Pavillon souos l'Mont ès Pendus! N'y'a pon 'couo rein d'officiel, l'pense, mais i' pathaît qué les grosses têtes dé la pâraisse en ont pâlé et, ayant consulté les femmes, ont décidé qué y'étha moyen d'organiser tchiquechose comme nou n'a jammais veu devant... Car, sapresti, les Grouvillais en ont ieu eune bordée comme i' faut, ieux, et les gens d'St. Ouain (pardon, St. Jean) n'vaient pas pourtchi qu'i' n'en f'saient pas autant. Et pis, si ch'est qu'i' lus y mettent, faut penser qu'ch'n'es'sa pas d'la p'tit biéthe! Ah dame, nan, ch'n'es'sa pas pour des preunes! Actuellement, si ch'est qu'la pâraisse dé Grouville n'avaient pas pensé à ch'la les preumièrs il est probablye qué St. Jean (extchusez, St. Ou... mais non, St. Jean) éthaient ieu la r'nommée d'en être, comme nou dit, les initiateurs! Enfin, les St. Jeannais - dgiâtre, est-che les St. Ouonnais ou les St. Jeannais? - n'portent pon rantcheune ès Grouvillais mais il' ont bouonne idée d'aver lus r'venge, tout d'même.
Ch'est en tchi, lé Pavillon souos l'Mont ès Pendus est rêsèrvé pour la dreine sémaine dé mar (i' n'sont pas 'couo seux tchi jour) si tout va bein, J'ai grande envie d'y'aller, mé, bouistre. Jé sai qué j'sis eune tèrriblye badlagoule mais d'ichîn là j'm'en vais têchi dé m'comporter pour qu'i' n'y'ait pas d'èrproches contre man caractéthe, et j'espéthe bein d'être ieune des preumiéthes à aver eune învitation pour chutte grand' bordée.
Assa, il est tchestion d'habits, et pis, sans doute, i' s'en va faller d'la pratique. Car, ou savez, à St. Jean (à St. Ou, pûtôt) ch'n'est pon touos les jours qué nou-s-a la chance d'aller à un bal. Parmi les femmes, acouo, ch'est difféthent; i' n'faut pas longtemps à astitchi eune robe pour l'occasion, mais quant ès hommes, faut penser qu'la grand' partie n'possèdent pas seulement d'nos jours eune câsaque à coue d'héthonde vèrmoulue, bein mains un bill-tappeur bosseté! Y'a acouo un fliotchet d'gens qui d'meuthent dans les racoins d'la pâraisse qui n'sont pas fichus d'pâler en angliais pour sauver lus vie. Et quant à la dans'sie, eune dgaingue d'învités afflyigis d'romatisses ou souffrant d'toutes sortes d'ahans n'sont pas capablyes d'faithe honneur à eune pâraisse! Ch'n'est pas pour dithe qué ches bouonnes gens sont tous d's êstropiés, du tout, du tout, mais il est bein êvident qu'i' n'faudra pon pèrdre d'temps s'i' veulent lus dêgourdi les dgéthets un mio, sapresti. Et pis, ch'n'est pas les grosses bottes à vrai qu'nou met dans l'Pûlé qui s'en vont faithe pour chutte séthée-là - ah dame, nan! I' faudra qu'les Etac'sos lus râsent pus souvent qu'i' n'ont ieu l'habitude dé faithe par lé passé, car i' faut aver la chai cliaithe pour né montrer pas qu'nou s'sait pûtôt sauvages siez sé. Sus l'même prîncipe comme nou-s-affinyit les bêtes pour lé "Show," ma fé!
I' y'étha d'la d'mande ches jours pour des blianches quémînses dé-ouelle, et i' s'en va y'en aver du travas à emb'ser tout ch'la! Ch'es'sa eune visite en ville étou lé sammedi dé d'vant, pour coper ses g'veux. Y'en a tch'en ont d'vielles touaisons du bord du Mouothi, et pis dans l'Vaux d'la Mathe y'a d'la vielle cringne qui n'a pon 'té touzée pour dgiâtre sait combein longtemps!
Ah véthe, il est d'mêtchi d'pathaître neumétho iun et d'être mins, car lé Bailli y s'sa et l'Protchuleux et l'Avocat Général et l'Vicomte et l'Greffyi et l'Huissier d'la Cour et toutes lus dames, et deux douzaines d'avocats et d's êcrivains et des mêssiotîns et des pouivettes à la braichie. La, la, tchi d'autre qu'y s'sa, don? Ou pûtôt, tch'est qui n'y s'sa pon? - car tout l'élite dé l'Ile s'y dêhal'la!
Les grands d'la pâraisse, ch'la s'comprend, y s'sont. Lé Connêtablye, les Protchutheurs du Bein Publyi, lé Minnistre, les Chentenièrs, lé Député, l's Officièrs, Vîngt'nièrs et toutes lus dames et d'mouaiselles (et pis y'en a eune tappée à St. Ou!), les Survillants d'Egise et les Collecteurs d'Aumônes - démnâge, qué y'en étha un fièr fliotchet!
Mais y'étha étou, pour en nommer tchitch'un, l'Douard Saumon d'la Porte d'Bas, Ph'lippe Tchèrouongne d'la Rue Féthée, Jean l'Prêtre d'la Hèche, Cliém V'licot d'la Grand' Route, Samuel Nièrpid d'la R'traite, Charles Trotteux du Mont Bridot, Jean Vithouette du Grand Mathais, Laïesse Timon d'la Mathe à Crapauds, Ph'lippe Mouais du P'tit Canné et Georges Paisson d'la Tchithiéthe à Epu. Fraînque Pivèrt dé Villeville y s'sa, sans doute, et Laïesse Lé Bousilli d'la Ruelle ès Faîtchieaux, Thomas Sallehache d'la Vieillotte, Franço Pendeloque du Vau d'Cocanne et Pièrre Lé Tavelinné du Pignon Bigathé et bein d'autres!
Ah, bouonnes gens, y'étha du rêvillon, j'vos garantis! Les cheins tchi n'peuvent pon danser aut'chose f'sont au mains la "gigontons," lé cotillon ou tchiqu'aut' vielle danse jèrriaise. Tchi spectaclye! Enfin, j'sis seuse qu'ch'es'sa amusant d'vaie la compangnie à s'rêjoui - et qu'il en faudra des raffrâchissements!
Eh bein, iun d'ches jours quand ou vèrrez lé grand bal annoncé sus les gâzettes ou séthez bein qu'i' s'en va tout d'bouon aver lieu! Y'a eune seule chose, dgia, m'est avis qué j'me sis mêlée un mio en nommant la pâraisse. Jé n'sis pon bein seuse si ch'est véthitablyément St. Ouain ou bein St. Jean. Ma mémouaithe mé fait faute par bordées, partitchuliéthement au sujet des nouvelles, car j'en ouai tant, ou viyiz! Ch'est en tchi, si j'ai mêlé les noms des mêssieurs, n'y'a pas d'faute - j'lus d'mande extchuse. A la préchaine èrveue - au grand bal, ofûche!
Marie la Pie
Les Chroniques de Jersey 1/4/1939
Viyiz étout: