Les Pages Jèrriaises

Oh Ma Patrie!

Oh ma Paraisse! oui, pour sept ans
MESSERVI t'a consacrai sen temps ;
Tu étais bain avant dans l'pité,
Y fit de sen mus pour t'erlévé;
Avec biaucoup d'peine y réussit,
Pour des annales chétai avec pitchi.
De longtemps tu avais 'tai dans la main
De yeun qui n'cherchait pon tan bain ;
Il étai tréjous en procès,
La Paraisse payait les frais ;
Dans mains d'neuf ans furent payis,
En frais, près de siez chents louis.

Pour dghix ans n'y'en a pas yeu
D'procès, y vont qu'manchi achteu,
Car Philippe le Proquleux
Dit, qu'il est maître de tuous yeux;
Y fétha rompre l'contrat, et
Il en cuouta du a PHILIP DUOTHAI,
Car Philippe ne voulit pon voté
Pour san peth', pour le mettre Député.
(Y s'est attithai la renoumaie
Du Député la buouche frumaie.)
Y s'vante dêja que pour tout chonna
Y l'y fétha autant qui puourra d'ma ;
Je sai bain qu'il ne l'aime pon, et pis
Depis longtemps y l'tient en jalousie ;
(Mais demandais! que sa fille a ozai
Allai a cheva, sans y'avai d'mandai.)
Y prétend bain aitou quemandai
Tout le monde dans san vaisiné,
Y se dit tout haut, chest sans cesse
Qu'il est le pus grand d'la Paraisse,
Et combain de fais qui s'est moqui
Du pus jeune fils du cordongni,
En drait tout le Régiment
Y s'en moqui joliment ;
Car chetai sus tuous, en véthitai
Même sus Tom, le modéthai,
Et sus le pus jeune modéthous,
Il en avait raide entuours tous.
Chest dam' bain seux qu'il a mantchi
San mêtchi en restant siez li.
Il a 'tai en France deux ou trais mais
Apprendre à pâlai le buoan français.
Pour un temps à toute forche y voulait
Dans le nord de l'Améthic s'en allai,
Car y criait qu'fallait biaucou pus d'run
A un esprit comme le sien, hors du commun,
En Jerri y n'y avait qu'la pièche de Bailli,
Car y ne séthai rain en d'sous de MESSERVI.
(Y s'promet dêja de pouvait bain le slinghi.)
Chest ditai comme san pèthe, prêt à s'mochi
Des siens qui crait pus fâhies que li;
Y n'est pas fort sus les chiffres, mais
Il a les lois au bu de ses daights ;
De tuous les jeunes gens, y n'manque
Pon de les passai suous sa langue.

Y dizait qu'il éthai honte,
Y s'est plusieurs fais vantai
Qu'y n'éthais jamais hantai
Avec PHILIP LE VESCONTE.

Toutes les fais que jé l'vé,
L'idaie me vain de me gratté;
Je pense au temps passai,
Je voudrais avait l'dos grattai.

Tout chonna me donne bain envie
De criai : Oh ma puoure Patrie!!!

 

Viyiz étout:

 

Les Pages Jèrriaises