Les pas b'sants d'mes breunes bottes sus lé trottouaithe
M'suthaient un gris matîn dé dgêles et scouâles.
Amont la ruette j'allais - et j'tais à siéthe
Un garçon à marchi sus la muthâle.
Trop haut... trop d'vent... mais n''y'avait pon d'dangi.
Les ailes du jour souôt'naient l'saint reintchivâle.
Tchi mithacl'ye... J'admithais la balanch'chie
D'chu garçon tchi marchait sus la muthâle.
Pus tard, j'marchais ava lé mont, acouo
Eune fais souos la plyie, d'l'êcole où'est qu'j'travâle.
Tch'est qu'i' m'dgettait? La bête à tchique tchéthaud:
Un gros nièr-et-blianc cat sus la muthâle.
Lé cat 'tait là, ouaithe qué, mucre et mouoilli,
Nou n'eûsse pon creu qu'il ait un r'gard tchi scâle.
Tchi vîsion saûssée d'annima d'chorchi
Qu'chu dgiâbliotîn dé cat sus la muthâle!
Mais l'arlévée, j'eumes deux-trais brîns d'solé.
Mé v'là, j'm'en fus par l'mont dé tchi qué j'pâle.
Coumme eune pons'rêsse, j'ouïs un maûdit ouaîsé...
Eune mauve sauticottait sus la muthâle.
Mousse, minette, mauve - eune bein malinne trinn'té!
Et chutte dèrniéthe, un monstre tchi piaille et ouâle.
Tch'est qu'i' faut craithe? Ch'est-i' un sîngne pouor mé,
Ches avèrtis qué j'vis sus eune muthâle?
Geraint Jennings
16/12/2000
| 