Moussieu, - Jé n'sai pon comment vouos r'mercié pour avé insézait la lettre qué j'vouos avais enviet l'aoute jeu, dans votte Gazette de Sam'di paszait. Y pazaît qué tout l'monde en approuvait - d'pis l'pus honnaîte jusqu'au pus grand coquin. Ouest-che qué j'en sézions, si j'n'avions pon la "Presse" à nouos aîdgyi?
Les consommateurs de lait dév'zaient être r'connaissant à Moussieu Baudains, le digne Connaistablle de St.-Hélier, pour avé yeu le couozage dé faize en sorte qu'une louai, descouvrant les vendeurs d'iau au lieu de lait, fût passaie par les Zestats. Y dév'zaient lis bâti une Pyramide qui esclipsezai la pus haoute d'Egypte.
Jé lu avecque la pus grande attention la lettre d'un "Fils de Fermier." Jé crai qué chain qui dit n'est pon bain lien dé la vézitai. Dans la fin de sa lettre y dit qué "certains fermiers qui, sans mélanger de l'eau avec leur lait, ont cependant un petit moyen pour ne pas le vendre tel qu'il sort de la vache." Mais, Moussieu, qu'un "Fils de Fermier" ne se gêne pon, Moussieu Toms, l'analyste angliais par excellence séza bain despôqui toutes chès triques là - y n'est pon un couôsin de nos Couôsins, heureusement pour Jerri! Nou peut attendre Fair Play dé ly - pas d'humbugzezie, oh! ma fé, nan.
Jé si, Moussieu,
Yun qu'espelle san nom coume vous, chest-à-dize,
FEUVRE - non pas FEVRE.
Bequet-ès-Cas, 24 Nov. 1884
Viyiz étout: