Henri! J'pensais que tu avais promins de m'aidgi à essuyer les vaissiaux!! ..... Ah bein, j'crais bein qu'il a oublié et d'même j'm'en vais c'menchi .....

Ch'est drôle combein vite que la vis s'pâsse! Quand j'nos mathyimes, j'fûmes en Djèrnesy pouor trais jours.

Et ch'tait là que j'rencontrîmes Henri et Elise Moreau qui v'naient de St. Malo. Ils avaient 'té mathiés eune semaine et i' lus en allaient rester à l'hôtel pour un autre huit jours. Ils avaient loué un moto et i' nos invitîtent d'aller auve ieux le lendemain. I' 'taient chanceux d'aver déjà acaté eune maison sus la côte et, coumme nous, ils espéthaient de bein vite c'menchi eune fanmille. Quand i' tait temps pour nous a nos en raller, j'taimes dev'nus bouons amins et i' promintent de v'nin nos vaie dans les travers de Nouë.

Et ch'tait comme chenna que, touos l's ans i' v'naient siez nous pouor trais jours à Nouë et tchinze jours dans les grandes vacances de l'été. Nous, parce que j'avaimes eune vingtaine de vaques et quarante vrégies d'terre labouorabl'ye et bein, j'allaimes les vaie rein que pouor le jour touos l's'ans.

Neuf ans lus passîtent mais, malheuresement, ni ieux ni nous, n'avaient ieu la forteune de c'menchi eune fanmille. Nos fréthes, à 'Douard et mé, avaient eune racachie d'mousses et ma fanmille avaient l'habitude de nos ramemouaither que d's êfants valaient bein mus qu' eune bouonne pouognie d'sous, mais janmais je n'montraîmes not' tristesse.

Ch'tait l'année la que Henri et Elise bâtitent lus belle grande maison au bord de la Rance. J' laissimes not' domestique à souogni les vaques et, pour la preunmiéthe fais, j'nos en fûmes en France pouor chinq jours et j'passîmes eune hardi bouonne vacance avec nos chiers amins. Siex s'maines après, le docteu nos donnit les bouonnes nouvelles que, à la fin, j'tais en fanmille. Henri et Elize 'taient si excités et i' vivaient en espéthance de commenchi eune fanmille étout. Touos nos gens n'en r'venaient pas et 'Douard et mé, j'taîmes si heutheux que l'temps s'passit bein vite et un lundi, not' p'tit garcon fut né à dgiex heuthes du matin.

Chu sé là, quand j'taîmes trantchilles. 'Douard et mé, not êfant dans mes bras, j'décidimes de l'nommer Henri et de d'mander ès Moreau d'être san Parrain et Marraine. Tchi tu-tu qu'i' ieu quand j'donnîmes les nouvelles à nos gens!

Quand les pathents à 'Douard bâtitent eune neuve maison dans iun des clios d'la ferme, j'prînmes la grand' maison et Henri et Elise v'naient pouor un mais duthant l'été et i' jouissaient de lus temps avec lus filleul. Un jour, j'avais l'mousse à ma brachie et tout en 'rgardant alentout d' not vier parleux, j'dis à Elise: “Tchiquefais, quand j'vai ta belle maison, j'sis un miot jalouse et envieuse de té.” Ou s'touoni envèrs mé et d'eune vouaie d'colère ou m'dit: “Tout chenna, ch'n'est rein! Rein que du biau meublye et des tapis, mais ch'est eune maison viéde, compliétement viéde!” Ou s'en vint envèrs nous et d'eune vouaie triste et trembliante: “Vais-tu” ou s'fit “mé, j'n'ai pas Henri!”

Quand le mousse stèrti à l'ecole, i' r'venait avec des p'tits dessins pouor nous et tchiquefais pouor san Parrain et sa Marraine que j'enviaîmes en France. Sais-tu bein, Henri, qu'ils ont gardé toutes tes p'tites grivouoll'lies-là? Connais-tu le pliaisi que tu lus donni? A huit ans Henri c'menchi à rester en France pour eune semaine et quand i' 'fut pus grand i' passait tchinze jours avec ieux. J' mantchaimes not' Henri, mais quand i' 'rvenait, san français avait si bein amendé et j'taîmes contents de vaie nos amins si heutheux de sa visite.

Malgré que j'n'avons ieu qu'un pouochin, i' m'èrsemblye que la maison a tout l'temps 'té plienne de ses amins et Henri a passé touos ses examens avec des bouonnes mèrques. Ch'est pourtchi, l'année passée, à seize ans, je n'taimes pas surprins quand i' nos dit qu'i' voudrait bein aller en France pouor amender san francais. San Parrain et sa Marraine n'en r'venaient pas de penser qu'ils lus en allaient aver Henri à ieux-même pour au mains neuf mais d'temps! Nous, le tchoeu gros, j'n'savaimes pas comment que j'nos allaimes vivre sans li.

Quand il r'arrivit en Jerri pour Nouë, i' nos ersemblyait que not' garcon avait grandi, mais ch'tait à Paques que j'trouvîmes eune telle difference! Là devant nous 'tait un biau janne homme, siez pids d'haut, pus d'pais dans ses manches achteu, et ses blonds j'veux copés à la mode. Quand i' vit not' surprinse i' s'mint à rithe et en nos embrachant i' nos dit que ch'tait grâce a sa belle blieue cascaque et sa c'minse en souaie que Henri et Elise li avaient acaté à Paris, qu'il avait tant changi!

Il a fait hardi bein en France et il a apprint tant d'choses ilà. Il a viagi avec Elise et Henri et quand i' r'vint hier arlévée, il avait assez d'habits pouor commenchi eune boutique! Il' l'ont gâté, j'crais bein et malgré not' bouonheu de l'aver siez nous j'savons bein qu'i' s'en vont l' mantchi. Sens-tu not' jouaie de te 'rvaie siez nous, Henri?

Oh. Oh. Henri. Je n' t'ai pas ouï entrer dans la tchuisinne! Oh mais Henri don, sais-tu bein que quand tu m'embrache coumme chenna j'pense que ch'est eune bouonne habitude que tu as r'apporté d'France.

Mais, man scelerat, j'sis quâsiment finie des vaissiaux!! Va-t-en caqueter à tan péthe. Il est dans l'garage à niv'loter avec chu moto-là qu'i' t'a acaté pour tan jour de naissance la s'maine tchi vint. Si i' l'êpouste acouo eune fais, i' n y étha pas d'peintuthe de restant d'ssus!! ........ Et Henri, n'oublie pas à telephoner à ta tante Elise! J'sais bein qu'ou dait t'mantchi tchiquechose de terriblye!!

************