S'lon l's Êcrituthes, i' n'y'a rein d'miyeu pouor un houmme qué dé s'rêjoui et d'faithe du bein tandi qu'i' vit acouo; et pouor un houmme dé mangi et baithe et s'rêjoui d'tout san travas, v'là tch'est un don du Bouôn Dgieu.
J'tais à penser à chennechîn à ches drein quand j'pâssis par les Gardîns d'la Pathade. Lé solé lithait et les bouais 'taient fieillus et tchiqu's'uns 'taient flieuthis en rose ou blianc. Sus la bliête y'avait des fanmil'yes à piquenitchi, des jannes à jouer, et sans doutes des gens, coumme dé couôteunme, tch'avaient ofûche bu sans aver du travas dé tchi s'rêjoui. Mais y'avait des p'tchiots dans l'bel à jouer, des touristes à admither les monuments, et tout l'démnîn d'la Ville à l'entou.
Et v'là tchi m'sembliait mouontrer un idéal dé chein qu'nou veurt pouor la vie d'la c'meunauté: du run pouor tout l'monde à s'en rêjoui, pouor s'èrposer, mangi, couôrre, jouarder, jopînter et, véthe, baithe. I' nos faut du louga parmi les louogements, et l'Connêtabl'ye a raison: si les Villais s'sont oblyigis d'atchilyi un amas d'nouvieaux bâtisses et appartéments, pouor asseûther la qualité d'la vie d'la populâtion, i' nos faut des pars. S'rêjoui d'tout san travas, v'là tch'est un don du Bouôn Dgieu, véthe, mais il est d'mêtchi qu'les Êtats n'èrtèrgent d'aut' not' nouvieau par. Les bouais étout sont un don du Bouôn Dgieu, mais ch'est au monde d'les plianter dans les pars!
Geraint Jennings
Viyiz étout: