Le Ménage ès Feuvres,
St. Ouën.
Lé 31 d'octobre, 1981.
Moussieu l'Rédacteu,
Né v'chîn l'heuthe tch'appréche pour m'en r'aller en Améthique. Lé temps s'est pâssé vite ches deux mais en Jèrri et il' ont veu, nou peut dithe, lé couronnement d'ma carriéthe d'êcrivain d'nouot' vielle langue Jèrriaise, un couronnement tch'est d'en pus précieux viyant qué jé n'l'avais pon d'sithé ni même attendu.
À c'menchi, j'sis r'connaîssant qué l'Bouan Dgieu m'a accordé l'privilège dé vivre nénante ans, un privilège tchi n'est pon donné à tout l'monde. Et pis j'sis r'connaîssant d'aver 'té fêté par Moussieu l'Bailli, Messire Frank Ereaut, et complyimenté par Sén Excellence Moussieu l'Gouverneux, l'Général Messire Peter Whiteley, et honoré dans L's Êtats et au diner donné par Lé Don Balleine, auve Moussieu l'Député Bailli Peter Crill, Président d'La Société Jèrriaise, dé tchi qué j'partage, auve lé Docteu A. E. Mourant, l'honneu d'êt' les pus vièrs membres, point d'veue d'êlection, et Moussieu l'Juge La Cornu, Président d'L'Assembliée d'Jèrriais, présents. Et j'fus doubliément honoré par la présence dé Moussieu l'Abbé Lelégard dé l'Abbaye dé La Lucerne en Nouormandie. L'Abbé est bein r'connu comme étant iun des grands savants, si pas l'pus grand, d'la Nouormandie.
Et i' n'faut pon qué j'oublie les cheins tchi m'ont encouothagi avau l's années d'êcrithe en Jèrriais, l'Docteu Fraînque Le Maistre, OBE, lé Juge Max Lucas, Moussieu P. M. de Veulle, et dans san vivant, Moussieu A. G. Harrison du “Jersey Evening Post”, et Moussieu M. A. Rumfitt, lé Rédacteu d'à ch't heu.
J'dév'thais p't-êt' êt ordgilleux d'aver pathu sus la télévision, et j'èrmèrcie l'janne Moussieu Guy de Faye pour aver ieu la pacienche che dé m'faithe pathaître à maîntchi respectabl'ye dévant l'audience en mâchant des chucrîns pour la toux viyant qué j'souffrais acouo du ma d'la gorge tchi m'avait quâsi empêchi d'pâler pour eune sémaine. Ch'tait à cause dé ch'là qu' j'avais la vouaix si enrouée qué ch'tait probabliément difficile pour un tas d'monde à comprendre tch'est qué j'tais à dithe.
Et pis i' faut qué j'diche un grand mèrcie à la chînquantaine dé pèrsonnes tchi m'envyîdrent des lettres et des cartes dé félicitâtion. J'aimethais aver l'temps d'les rêpondre toutes îndividuellement, mais y'en a tant - et j'espéthe tch'i' s'en vont accepter chutte expression d'èrconnaîssance et la cheinne qué j'mîns dans la gâzette du sept d'octobre, 1981.
Ch'a té un grand privilège dé pouver d'vénîn acouo eune fais d'Améthique à l'âge dé nénante ans et d'pouver r'marchi les c'mîns ès envithons d'man vièr Ménage. Et d'penser, en viyant les vièrs fossés à maîntchi êcroûlés, ès siècl'yes tchi veinnent dé s'pâsser dépis qu' nouos anchêtres avaient travailli à les bâti, pièrre sus pìerre, et graduellement faithe des rues et des routes en agrandissant les c'mîns et mettant les pal'tées d'bann'lais à haûchi les fossés. Il en rêsultait, sans doute, qué bein des rues s'trouvaient en d'sous du nivé du clios, eune chose qué mes fréthes Cannadgiens trouvaient drôle quand i' vîndrent en Jèrri et visitaient la campangne.
Tchi capestes ches vièrs anchêtres! Vresser les c'mîns généthâtion sus généthâtion, labouother les tèrres, aller au vrai, êl'ver d'grands' fanmil'yes, navidgi les navithes à vailes dans touos l's “océans” du monde, et à l'înjuthe du temps, des tempêtes et vents contraithes aussi bein comme dé bouan vent. Et i' faut penser tch'il' allaient à la pêque au baté et à bâsse-ieau, et tch'i' mangeaient un tas d'baînis et d'ormèrs en saîson, des couôteunmes qué j'avons continnué sénon p't-êt' bein pour les ormèrs lé tou d'nouos côtes viyant qu' des gourmands ont înventé eune manniéthe dé les prendre souos ieau et tenvri la quantité à presque rein.
Jé d'vons honmage et respé à la mémouaithe dé ches bouans vièrs. I' n'faut pon oublier qué sans ieux jé n'séthions pon ichîn, et sans lus dû travas et esprit Jèrriais et lus louoyauté d'fanmil'ye dé péthe en fis un tas d'nous né s'saient pon si bein comme jé l'sommes au jour d'aniet.
Malheutheusement, nouot' race et nouot' langue, comme nouot' vièr anmîn l'crapaud, s'en vont dispathaître. La preuve en est qué l'drein récensement d'l'Ile nouos dit qu' la maîntchi d'la populâtion d'Jèrri n'a pon 'té née ichîn. Av'ous cartchulé tchi tragédie qué ch'la veurt dithe pour l'av'nîn d'la race Jèrriaise dans san pays natal?
George d'La Forge
Viyiz étout: