Fallbrook, California,
USA.
Lé 22 d'janvyi, 1977.
Moussieu l'Rédacteu,
J'veins d'èrchever la gâzette du 18 dé novembre. V'la tchi m'fait grand pliaîsi d'aver des nouvelles dé man p'tit pays natal. Lé preunmié portrait qu' j'ai avisé est l'chein du Connétabl'ye Pithouet d'ma pâraisse dé St. Ouën, et j'lé félicite d'aver 'té chouaîsi pour présider l'Conmité Seurvilyant des Connétabl'yes dé l'île. San chouaix est bein à propos dépis tch'i' r'présente la pus grand' pâraisse dé l'île. J'tais bein content d'vaie, tout, l'portrait d'un aut' St. Ouënnais, tch'est janne mais tch'a dêjà gângni eune bouanne èrnommée pour li-mème, lé Sieur Brian Vibert. J'ai connu ses anchêtres dé y'a huiptante ans. Comme les mains, il' 'taient Louothièrs dans l'âme!
Dé vaie l'portrait du Connétabl'ye Pithouet a fait pliaisi étout à eune St. Ouënnaise, Madanme Sidney Triggs, née Eva Maugi Carré, siez tchi j'sis à pâsser eune partie d'l'hivé. J'arrivis à Los Angeles Dînmanche pâssé et l'Sieur Triggs vînt à ma rencontre à l'aérodrome dé chutte grand' ville des Anges. Ichîn, à Fallbrook, j'sommes à bein près à maîntchi c'mîn entre Los Angeles et San Diego. Tchi bieau pays! Et tchi bieau temps! J'voudrais nouver vouos env'yer un mio d'chutte chaleu d'Califournie pour raccourchi l'hivé en Jèrri.
Moussieu l'Député Bailli Crill a un bieau portrait dans la gâzette étout. J'n'en ai janmais veu un miyeu d'li. Ch'est seux qu' san souôri s'en va encouothagi et faithe pliaîsi ès femmes dé l'île tch'éthaient l'ambition d'lus assiéthe à côté d'li sus l'Banc d'Justice dans la Cour Rouoyale. Né v'la eune nouvelle idée! Et pourtchi pon? Lé prîncipe dé mett' la rouoge robe de justice sus l's êpaules des femmes est bein à propos dépis tch'i' sont bein êtabl'yies comme “Avocates” dans la Cour et “Députées” dans la Chambre Législative. Et y'a probabliément pus d'femmes qué d'hommes comme clèrcottes dans La Rue ès Trais Pigeons. V'la tchi m'ramémouaithe tch'i' n'y'en avait pon eune seule dans chutte rue-là quand j'tais clèrcot d'dans me-mème dévant la preunmié dgèrre mondiale. I' n'y'a qu' eune chose tchi pouôrrait p't-êt' les empêchi d'êt' bouannes Juges - ch'est tch'il' ont l'tchoeu tendre, ches chéthes, et y'a des jannes malfaiteurs tchi lus f'thaient p't-êt' des doux yeux d'vant êt' jugis!
I' faudrait, étout, înventer des nouvieaux titres. Nou pouôrrait-i' l's appeler des “Jugettes” ou “Jurées-Justicières?” Et pis, j'sis-t-i' en ordre dé changi l'titre d'Avocat à “Avocate?” J'n'ôse pon êpeler chu mot-là “Avocatte!”
Un aut' portrait qué j'sis content d'vaie est l'chein du Juge Gordon Le Breton auve ses mains sus les cliès d'l'orgue dé l'Églyise dé St. Sauveux. V'la tchi m'ramémouaithe les Dînmanches des sèrvices annuels dé L'Assembliée d'Jèrriais où'est tch'il a 'té si génétheux en nouos donnant l'bénéfice de san talent comme organniste, pas seulement pour lé grand Dînmanche du sèrvice mème, mais pour les pratiques tchi c'menchent des s'maines dévant.
Malheutheusement, tout n'est pon jouaie dans la gâzette. Y'a des choses dédans tchi n'sont pon pliaîsantes à liéthe. La crainte des “bureaux” d'poste d'campangne au sujet des voleurs et malfaiteurs est un exempl'ye du troubl'ye qué l'învâsion d'êtrangièrs a apporté en Jèrri. Et les bastaudes et l'brit dans l's aubèrges sont eune honte pour l'île. Lé Député Bailli a grandement raison quand i' dit qué v'la tchi n'peut pon êt' pèrmîns d'continnuer, et la Cour avait raison d'env'yer iun d'ches malfaiteurs-là en prison.
J'n'aime pon vaie l'annonce qué l's expèrts engagis par la Compangnie des Ieaux èrquémandent qué la belle vallée mênommée “Fern Valley” s'sait innondée. J'espèthe qué L's Êtats s'en vont aver l'avis d'empêchi un sacrilège dé mème. Ch'n'est pon les Jèrriais tchi sont responsabl'yes pour lé bésoin d'faithe sèrvi tant dgieau. Ch'est l's hôtels et pensions touristiques. Il est grand temps d'y mett' eune lînmite. Et pourtchi pèrmettre l'agrandissement d'la populâtion d'île à huiptante mille pèrsonnes? S'il est possibl'ye dé l'arrêter à ch't heu qu'oulle a arrive à septante-deux mille - tch'est dêjà trop.
J'ai r'gret d'vaie qué l'Sénateu Averty veurt bâti acouo d'aut' “gratte-ciels”. V'la tch'encouothage l'empliai d'travailleurs tchi veinnent d'houors-pays et tchi finnissent par rester en Jèrri et otchuper les louages ieux-mèmes. V'la tchi n'aigue pon ès Jèrriais tch'en ont bésoin.
Chein qué jé n'comprends pon est pourtchi qu' des gens tch'ont des noms Angliais et tchi sont tréjous à lus pliaindre qué jé n'sommes pon bein gouvérnés, restent en Jèrri quand i' sont libres dé lus en r'aller en Angliétèrre où'est qué l'gouvèrnément est appathemment à lus goût. À m'n idée, ches gens-là sont des faitheux d'embarras tchi n'ont pon 'couo apprîns l'diton qué d'faithe et dithe ch'est deux, mais qué d'vant dithe i' faut saver faithe!
George d'La Forge
Viyiz étout: