|
Si lé canné t'a trempé auve sén ieau, Si lé c'mîn d'hal'lie t'a châtchi en miettes, Si les ortchies t'ont pitchi coumme un fo, I' t'faut des frites dans du papi d'gâzette. Tchi faithe don quand tu'es au pus grand m'sespé? Quand ta neu c'mînse est trîlyie en chitchettes? N'y'a qu'un seul mouoyen dé t'ravigotter: Mangi des frites dans du papi d'gâzette. Quand tu'es gêné, troublié et mal à l'aîse, Ou tortuthé par dêmons ès pînchettes, Hale tan vinnaigre, tan sé, ta mayonnaise, Et mange des frites dans du papi d'gâzette. Nou mang'geait bein un j'va, et ch'na sans frites, Mais si tu n'as ni couté ni fourchette, Tch'est qu'nou mange auve lé pus grand pliaîsi? Vite! Oui-dgia! Des frites dans du papi d'gâzette! Mais même quand tu'es l'pus bas, l'pus mînséthâbl'ye, Né pense pon à mangi ni r'nards ni b'lettes. À lus pliaiche met du paîsson sus la tabl'ye, Auve tchique bouonnes frites dans du papi d'gâzette. Né couque pon tan tchian, n'mange-en pon les pattes; N'fai pon nitout eune êtuivée d'Minette. Tes annimaux, même auve d'la sauce d'tonmate, N'valent pon des frites dans du papi d'gâzette. Geraint Jennings Août 2002 |
Viyiz étout: