Jean Tantmus et Adolphe Tantpiéthe
Ki ri-ki-ki
Ka-ra-ka-ka
J'sis bein contente du complyiment qué Marie Hibou m'payit l'autre jour dans s'n articlye sus la Chronique, et j'l'accepte dé bouon tchoeu. Marie Hibou èrconnaît ses supérieurs quand ou les rencontre, mais l'Cahouain tch'est pus âgi es'sait pus ou mains pus hautain et n'sé dêcar'rait pon pour toute pèrsonne d'un moment à l'autre. Et jé n'lé bliâme pas. Il est ancien et a d'l'expérience et sait un tas d'tchi. Pour dé mé j'sis tout à fait contente dé rester un bouon deuxième, et ch'est man tou chutte fais, à payi un complyiment - en disant qué l'Sieur Cahouain est man supérieur en toutes choses. J'lî don'nait ieune dé mes plieumes quand jé l'vèr'rait.
Mais, si ch'est qu'la bouonnefemme Smêledétout et la vielle Badlagoule ont d'tchi à dithe qué ch'est p'tite chose dé lus env'yer eune Rémontrance, et d'gliainer eune bouonne ronde somme en êchange pour eune pacotile dé menneties et deux ou trais patholes dé véthité!
En pâlant d'Rémontrances v'là tchi m'ramémouaithe eune histouaithe qué nos pathents soulaient m'raconter. Ch'tait d'vant lus temps et même dévant ch'la; comme dans les quatre-vîngts du dgiex-huitième sièclye, jé craithais. Dans l'temps, tréjous, qué nous n'avait pon d'saison d'patates pour vos apporter tchiques cappeurs.
San nom 'tait Jean Tantmus et i' né liait pon trop auve sans vaisîn Adolphe Tantpiéthe. Un bouon jour Tantmus, ayant 'té êlu cap'taine d'la compangnie pour empêchi les gens d'sorti l'sé (ch'tait là la louai dans ces temps-là), et ayant chèrge d'eune partie d'l'ameunition, eut les daigts longs et s'empathit d'eune quantité d'cartouches. I' fut, cèrtainement, atchusé, mais passit par la grand' porte et auve la chance sé clièrgit. Tant piéthe, le connaissaint d'vielle main et sachant tch'il 'tait coupablye dé bein d'autres choses, né put sinon en faithe du fliannet. Véthe, mais pas longtemps après une grand' dgèrre eut lieu. Pour coper d'court né v'chîn l'résultat. Les Tribunaux condamnîtent Adolphe a eune amende de Chinq livres d'ordre (grand' somme dans chu temps-là) et à Trais bouons mouochés à chînq carres et Deux gros passe-l'avant, sans compter les frais des raffraichissements pour les Mêssieurs. Ch'n'tait pas 'couo là la fîn. Mes pathents m'racontaient qué Tantpiéthe fît un voeu qu'il éthait sa r'venge sus Tantmus tchique jour. La r'venge eut lieu mais jé n'mé rappelle pus souos tchi forme. J'sai bein, tréjous, qué y'eut eune êlection et pis pus tard d'la tith'thie et du sang sus l'pas d'l'hus, et finnalement un grand jour sus l'Mont ès Pendus, l'êchaufaud, la corde et tout compliet!
Là, ch'n'est qu'eune histouaithe, bein seux, mais ch'est un exemplye dé la Justice d'un temps fut, et comme tchi qu'nou n'avait pon bésoin dé saisons d'pommes dé tèrre pour fourni les hèrpîns pour payi ses rentes et s'enrichi. D'itet, sans doute, né sé f'sait pon d'nos jours. La civilisation a fait dé tels progrès et j'sommes d'la peine à comprendre les moeurs et les couôteumes d'un âge câsi oublié. V'là m'n histouaithe. Lecteurs, av'ous sommé? Acouo ieune dévant vos couochi.
L'autre jour un p'tit garçon d'St. Ou, ayant fait tchique mêché et sachant tch'i' s'en allait probablyément être peuni, sé battit en li-même à seul fîn dé n'dithe pon d'menneties quand i' veindrait en présence du maître d'êcole. Finnalement Ph'lippe (ch'est là san nom) tch'a tréjous promîns à ses pathents dé jamais né s'êcarter d'la véthité et toutes fais et quantes dé s'êloigni du mensongi, s'en fut comme un soudard, dévant san juge, l'maître d'êcole, et dit la puthe, la plieine et l'entchiéthe véthité. Il eut eune ronde mais comme i' dit, "la véthité est la véthité, quand même qu'ou couôte chi par bordées." Ch'est là chein qu'j'appelle un grand garçon. I' sé f'sa un homme devant sa m'mée!
Marie
Les Chroniques de Jersey 7/7/1934
Viyiz étout: