Et quand l'Pharaon s'appréchit, l's êfants d'Israël, en l'vant lus ièrs, vîtent l's Êgyptiens tchi cachaient souotre ieux, et il' avaient grand peux et i' criaient au Bouôn Dgieu,
et i' dîtent à Moïse, "Ch'est-i' qu'tu nos a m'né au d'sèrt pouor mouothi pa'ce qu'i' n'y'avait pon d'chînm'tchiéthes en Êgypte? Pouortchi qu'tu'as fait d'ité, d'nos haler hors d'Êgypte dé même? Ch'n'est-i' pon qué j't'avêmes dit en Êgypte, 'Laîsse-nous en paix sèrvi l's Êgyptiens'? Car ch'est mus d'sèrvi l's Êgyptiens qué d'mouothi dans lé d'sèrt."
Et Moïse dit ès gens, "N'ayiz pon d'peux. Restez ichîn et ou vèrrez l'salut du Bouôn Dgieu qu'i' vos donn'na aniet car ches Êgyptiens qu'ou viyiz aniet ou n'vèrrez d'aut'.
Taîs'-ous don, car ch'est l'Bouôn Dgieu tchi combatt'ta pouor vous."
Et l'Bouôn Dgieu dit à Moïse, "Pouortchi qu'tu m'crie d'même? Di ès êfants d'Israël d'avanchi!
Et té, lève ta badgette et êtend ta main à la mé et s'pathe les ieaux et l's êfants d'Israël crouaîs'sont à pid sé.
Et j'm'en vais endueurchi l'tchoeu ès Êgyptiens pouor qu'il' âgent souotre vous, et jé s'sai glorifié sus chu Pharaon et sus ses troupes et sus ses tchéthiots et sus ses c'valièrs,
et quand jé s'sai glorifié d'même sus l'Pharaon et sus ses tchéthiots et sus ses c'valièrs, assa, l's Êgyptiens, ieux, saithont bein qu'mé j'sis l'Bouôn Dgieu."
Et l'ange dé Dgieu tchi viageait l'avant au camp d'Israël s'en fut viagi driéthe ieux – et l'pilyi nouageux s'en fut d'l'avant à ieux pouor s'mâter driéthe ieux, pliaichi entré l'camp d's Êgyptiens et l'camp d'Israël, et pouor ches'-là i' n'y'avait raique la nièrcheu et les nues, et pouor ches'-chîn la niet 'tait êcliaithie et eune dgaîngue n'appréchait pon d'l'aut' duthant toute la niétchie.
Et Moïse êtendit sa main à la mé, et toute la niet l'Bouôn Dgieu fit r'tither la mé atout eune dgêle dé l'Êst, et i' fit du tèrrain d'la mé, et s'pathit l's ieaux.
et l's êfants d'Israël allîtent à pid sé au mitan d'la mé, et à drouaite et à gauche y'avait des muthâles dg'ieau au pouorportant dg'ieux.
Et né v'là l's Êgyptiens souotre ieux, touos les j'vaux au Pharaon et ses tchéthiots et ses c'valièrs, au mitan d'la mé,
et êv'chîn à l'assinne, dé d'dans l'pilyi d'feu et d'nouage, lé Bouôn Dgieu r'gardit la racachie d'Êgyptiens et i' l's enhèrmélit:
I' paûtchit les reues des tchéthiots et i' fûtent embourbélés, épis l's Êgyptiens dîtent, "Dêpaûtchons-nous d'ichîn et des cheins d'Israël, car ch'est l'Bouôn Dgieu tchi combat pouor ieux contré l's Êgyptiens."
Et l'Bouôn Dgieu dit à Moïse, "Êtend ta main à la mé, et l's ieaux r'veindront sus l's Êgyptiens, sus lus tchéthiots et sus lus c'valièrs."
Et quand Moïse êtendit sa main à la mé au matîn la mé r'montit et înnondit l's Êgyptiens tchi couothaient hors d'ilo, et l'Bouôn Dgieu êglianmit l's Êgyptiens au mitan d'la mé.
Et l's ieaux r'vîntent et couvrîtent les tchéthiots et les c'valièrs et toute la dgaîngue au Pharaon tchi les siévîtent au mitan d'la mé – nou n'en viyait d'aut' iun.
Mais l's êfants d'Israël crouaîsîtent la mé à pid sé, et à drouaite et à gauche y'avait des muthâles dg'ieau au pouorportant dg'ieux.
Chu jour-là don, l'Bouôn Dgieu êpaîngnit Israël des mains d's Êgyptiens; et Israël vit l's Êgyptiens morts au bord d'la mé et Israël viyait coumme tchi qu'lé Bouôn Dgieu avait travailli contré l's Êgyptiens, et i' fûtent înspithés du Bouôn Dgieu et i' lus fiaient au Bouôn Dgieu et à san sèrveux Moïse.
Viyiz étout: