Les Pages Jèrriaises

Les Dgiamants


Ma douoche 'tait d'shabilyie et, s'lon lé d'si d'man tchoeu,
Ou n'avait rein gardé qu'la clyîncâl'lie d'dgiamants;
Tout coumme des belles escliaves dans l'triomphe ordgilleux
Tchi dansent pouor eune vandgîthe dévant lus contchéthants.

En trîntchant et s'motchant, i' sonne dans sa dans'sie;
Chu monde êtînchélant d'pièrres précieuses et d'méta
Mé touônne follement la tête. Jé louange dans ma leun'nie
Les pièrres dans tchi qu'lé son et la lueu font bréha.

Ou 'tait êtrav'lée don à seule fîn d'm'embraichi,
Et d'sus chutte longue tchaîse-là san souôri 'tait marbré;
Et, coumme la mathée monte pouor couvri un rotchi,
Mén amour d'avanteu li'appréche coumme la mé.

Ou m'dgettait coumme eune catte, mêfieuse coumme eune têgrêsse;
Apprivouaîsie, ouaîsive, en prouaie dé s'n èrmueûthie,
Ou s'mouontrait tout sans honte - la libèrté ivrêsse
Dans châtchun dé ses poses mé donnait tant d'pliaîsi!

Auve toute la grâce d'un cŷngne, et lithants coumme du beurre,
Ses bieaux seins meux craûlaient coumme des grappes dé vèrjus.
Et v'là tchi pathadaient dévant mes ièrs tchuthieurs:
Ses bras, san ventre, ses gambes, ses belles tchiêsses et san tchu.

Chutte grande èrveue avanche, eune armée d'dgiâbliotîns,
Pouor disteurber l'èrpos dé m'n esprit rêvacheux,
Pouor pitchi bas mén âme du rotchi cristallîn
Où'est qu'ou règne sus san trône, trantchil'ye, à san tout seu.

I' m'sembliait vaie unnis dans chu nouvieau portrait:
D'un garçon, l'estonma - et d'Antiope, les belles hanques.
La souplièche d'l'amazonne donnit un tel êffet
À chu brun corps fardé, qué j'n'y vai rein tchi manque.

La veue trembliante sembliait lamper sus san mouothi.
N'y'avait qu'lé rouoge dé l'âtre tch'êcliaithait lé parleux;
Et châque fais qu'san soupi laîssit couôrre eune fliamb'thie
Lé sang innondit l'ambre dé sa pé auve du feu.


Geraint Jennings
2004

Vèrsion Jèrriaise des Bijoux d'Baudelaire


 

Viyiz étout:

 

Les Pages Jèrriaises