Les Pages Jèrriaises

Le Coucou


I' n'y'a pas d'doute qu'ous avez ouï
Ch't ouaîsé qui fait tréjous l'même brit,
Car ch'est de li qu' nou ouait le cri :
Coucou ! Coucou!

Nou n'peut jamais trouver san nid:
Ch'n'est pas parc' qu'il est bein muchi
Dans un fossé ou tchique côti­ -
L'coucou, Coucou.

Chut ouaîsé est hardi pièrcheux,
I' fait un nid servi à deux,
Et d'mêles ou d'grives i' n'a pas d'peux -
Chu coucou, Coucou.

I' pond sen oeu sans embarras,
Et pour li ch'est fini, hélas !
Car i' s'envole et ne r'veint pas­ -
L'coucou, Coucou.

L'ouaîsé à tchi l'nid appartcheint
Accepte chut oeu comme si ch'tait l'sien,
S'acliuqe dessus, et tout est bein.
Coucou! Coucou!

Deux s'maines pus tard la cruque se casse,
Ne v'chin la tête qui dehors passe,
Et pis les ailes, et toute la masse
Du coucou, Coucou.

Le p'tit a tréjous l'bec ouvert
Pour carpeleuse ou autchun ver
Qui pour raide bouonne nouorrituthe sert
Au coucou, Coucou.

Gourmand qu'il est, i' n'erfuse rein ;
N'y'a pas d'dangi qu'i' crève de faim,
Et certainement i' s'déhale bein­ -
L'coucou, Coucou.

Des aut' pétchiots il est l'pus fort,
Et l'scélérat, à tigue de corps,
Tchique jour pus tard les flianque déhors­ -
Coucou ! Coucou

Un bieau matin, au bord du nid,
Iun auprès l'autre l'coucou met l'pid
Et d'là s'envole pour faithe san brit­ -
Coucou! Coucou!

Quand veint le s'tembre i' crouaîse la mé
Et va en France passer l'hivé ;
I' n'nos aime pas quand i' fait fraid,
L'coucou, Coucou.

Mais faut s'attendre, l'année tchi veint,
A ouï le cri, de près et d'yain,
Dé ch't ouaisé que j'connaissons bein­
L'coucou, Coucou.

 

P. W. Luce
Vancouver, Le Canada - mai, 1957

 

Viyiz étout:

 

Les Pages Jèrriaises