J'espéthe que les lecteurs de la Gazette ne m'en voudront pas trop pour avair tè si longtemps sans lus donner de mes nouvelles.

I' ne s'saient pas surprins de man long silence si' savaient tch'est que de travailli souos les ordres à Cliément d'Caen, comme je soummes à l'faithe, mai et ma famille, à la réquête toute spéciale de Moussieu Bouais et des autres membres du Comité, qui m'avaient fait accraithe que l'exempl'ye du Caouain otchuppè sur la terre, à un travas d'importance nationale, ne manqu'thait pas d'exercer une grande influence sus la situation locale.

Mais quand j'nos offrîmes pour aller aidjï à Cliément d'Caen et à son vaisin Laïesse Ernon, j'vos asseuthe que je n'savions d'ghèthe tch'est j'étions en train d'entreprendre.

Siez Laïesse Ernon, l'affaithe marche occouo. Ch'est un houmme rassis, qui prend les choses comme i' lis veinnent et dit tréjours qu'y'a pus d'jours que de s'maines et que chein qu'nou n'fait pon un jour, eh bein, nou le f'tha pas tard. - Et ches sentiments l'à n'l'empêchent pas de savair tréjous à tchi s'en t'nin et de r'haller s'n'êpile du ji.

Mais pour l'autre individu qui m'empl'yie sus sa terre, pour le vièr Cliément d'Caen, ov san mouochet s'notcheux, ses braies à pliatchet et s'n'êternelle groumâch'chie, ch'est autre chose, hélas! Je voudrais n'avair jamais consenti à tuer des mulots sus la terre de chu vièr empôtume-là. I' faut y travaill'yi nièt et jour. Les caouains ont habitude de se r'poser quand l'solei' lis, mais pas par ichin. Le vieux prétend que les vignes sont si hautes et si épaisses ch't'année que la lumiéthe ne peut pon pénétrer jusqu'à la terre et bouan gré, mau gré, i' faut aller de rang en rang, l'avant ès dêfoueurs, entre les vignes, cherchi pour des mulos le long des jours! Touos les sièrs, le vier avare envie Joseph Le Boutill'yi à ramasser les siens que j'avons tuè et alopinè dans l'couthant du jour et il est rare qui y'en ait mains d'une moyenne chiv'thèe! Des mulots? Jamais ou n'craithaites chein qui y'a par là.