Bouannes gens, me v'chin ervenu. J'ai tèt quâsiment dans toutes les pâraisses et ch'est pour chounna qu'i ne me virent pas au haout du vièr marchi la s'mainne pâssée.
I' faout que j'vos dise que j'ai tèt ettou ès Minquiers. Vèthe et occouo j'n'ai rein dounnèt à mangi ès paîssons. Ch'est pourtchi ou' pouvez acaté des crabes ou d's'andjulles sans crainte d'être empouaisonnès.
Sûs chès rotchiers j'ai ouï de bein drôles de choses, mais v'là qui s'ra pour eunne aoute feîs.
Ichin les gens sont touos occhuppès à compté lûs chèrges de patates, et j'vos assaeuthe que j'en ai veu pûs d'yun avec un ready-reckoner pour veîs si les sous correspondent avec les tichets du weighbridge.
J'sîs bein aise de veîs nos fermièrs fumé de grosses cigares et de veîs qui garde lûs pipes dans lûs pouchettes. Pourtchi ? Parce qu'ou viyîs, ch'est sinne que nou z'a fait des sous, et ch'est pour chounna q'nou peut acaté des cigares au lieu d'un quarton de p'tun.
Ou comprennez, bouannes gens que sous chès conditions le caouan n'a pas grand-chose à faithe et i' peut s'erposé un mio ach'teu qu'nou s'occhuppe pas de politique.
Coumme j'vos l'disais j'ai tèt dans quâsiment toutes les pâraisses et j'vos assaeuthe que nou n'pâsle que des patates et des tomates.
A St. Cliément, du bord du Hocq, rein n'bouoge et c'pendant l'élection pour Chantnyi apprèche. Nou n'sait pas occouo tch'est qui s'ra candidat. Et pourtant il est temps d'y pensé.
Dans la pâraisse d'à côté, y'étha pour saeux eunne bordée d'fanne et j'pense que tchique temps d'vant Noé, si j'sis occouo en vie, j'éthai bein des choses à vos raconté. Tchi pâraisse, bouannes gens, et les missis sont bein excitées, j'vos assaeuthe, depîs qu'ieunne est horte pour probabyiément jammais n'ervenin.
N'en v'là assez, caouan, i' n'faout pas en dithe trop là-d'sûs.
A la Trintèt, heutheusement, nou n's'occhuppe pas d'aoutre de rouoges ni d'biues. Pour de mé, i' m'pathaîssent touos d'la maîmme couleu, et ch'est bein tant mûs. Nou n'sait pas ch'est qui pouôrrait s'arrivé au meîs d'Décembre, mais che s'sait grand dommage de pôtchi l'feu ach'teu qu'il est presque dèsteint. Tchi vivra verra, coumme nou dit.
Eunne pâraisse iou qu'yétha de l'excitation pour Chantnyi, d'après chein qu'nou z'entend, ch'est la sienne à Charles.
J'ai ouï, et j'sait bein qu'chounna est la véthitèt, que déjà un moussieu du bord de Rôzé a cherchi des vouaix pour mettre dans sa Fosse les siens qui voudraient l'opposé.
Tout chounna ch'est chein qu'j'ai ouï dans chès pâraisses là, mais à St. Louothains j'en ai entendu bein d'aoutre que j'vos racon'tai la préchainne feîs.
A bétot, si'en cas.
Caouain
25/6/1910
Viyiz étout: