Je n'peux pas vos en êcrithe bain long annièt. Je sommes touos capsizés siez-nous, car je v'nons justement de r'muer, alors ou pouvez comprendre comment que tout est chein-d'sus-d'sous. À la pliaiche d'être comme d'habitude, assis bain confortablyement à man desk, je sis à êcrithe ch't articlye ichin sus une câsse à savon dans l'allée de not'e nouvelle démeuthe, parmi une collection de batt'ie d'tchuisine, ticlyes, saucepainnes et toutes sortes d'âtivelles que j'n'avons pas oquo ieu l'temps d'arrangi.
Je vos asseuthe qu'i' nouos a fait bain ma de tchitter not'e vieille mansarde opprès y aver 'té tant d'années mais il a bain fallu.
La Direction des Chroniques était dêterminée qu'i' fallait absolument que l'Caouain démeuthisse sus les prémisses alors j'avons 'té obligis de transféther not'e petit mio d'butin du haut du Vier Marchi jusqu'au bas de la Place Royale. Il est vrai qu'i' n'y avait pas liain mais ch'la n'empêche pas que j'avons ieu hardi d'embarras et à cause de la d'jerre les frais d'transport ont 'té considéthablyes.
J'avais pensé que Fraînque Louothains nouos aithait fait l'pliaisi de nouos prêter une démié-douzaine de ses trolleys pour bouogi not'e meublye, mais à cause que l'Tribunal a r'fusé d'exempter une partie d'ses hommes il est mârri comme un Normand et n'eut qu'de m'avaler quand j'li proposi la tchestion.
Enfin tréjous, avec bain d'la minséthe, nouos v'là tout-d'même passés. Y'a ieu sans doute un grand nombre d'articles d'valeur de bûchis duthant l'opéthation et not'e meublye a 'té gentiment êgrinflié. Un biau mitheux à tchi que Marie Hibou t'nait hardi à cause qu'i' li avait 'té laissi par sa grandméthe, a té mins en brédelles par aver tchait sus les dalles du Vier Marchi. Marie, qui est superstitieuse comme tout, est convaintchue que v'là qui s'en va nouos porter malheur et ou n'fait que d's'en lamenter touos les jours.
I'y a ieu du hertchin ettou avec not'e ancient propriêtaithe qui r'fusait d'nouos laissi dêlouogi dévant que l's arriéthages de loyi fussent payis, une bagatelle de deux ans et d'mi, v'là tout, mais nouos gens des Chroniques ont consenti à restèr caution pour la balanche avec l'intention, je m'imagine bain, de garder chenna de sus mes salaithes.
Il aithait voulu ettou chergi des dommages parce que sa mansarde a 'té laissie, comme i' dit, “dans un êtat dêgouôtant de malpropreté.”
Je n'sais pas à tchi qu'i' s'attendait, mé.
Auchune personne de bouan sens dait bain saver que chinz ou siex Caouains ernardés dans la même pliaiche pour près d'un démi-siêcle, ne daivent pas mantchi d'y laissi une certaine quantité de chein qu'les Angliais appellent du “natural deposit.” S'il avait viagi comme mé et qu'il aithait visité les ouaisiaux qu'habitent les rotchers des îles Péruviennes il en aithait veu bain d'autres.
Eh bain, nouos v'là don installés dans une des chambres à Mess Bisson. Quant à mé, je sis certain que je m'en vais m'y pliaithe tout à fait bain, mais j'ai grand peux que Marie Hibou aitha d'la peine à s'y accouôtumer. Ne v'là-t-i' pon dêjà que la catte à Mess Bisson et lyi ne peuvent pas s'entre enduther. Oulle a prins une haine ettou contre ses pigeons et sinon qu'j'ai arrivé justement en temps à matin, oulle en t'nait iun dans ses griffes et s'en allait l'pliumer tout vivant.
Je crai, mé, qu'y a des “breakers ahead” pour tchiqu'uns ichin, et je vos dithait pus tard comment que l's affaithes vont avec nous.
Caouain
1917
Viyiz étout: