Avec les patates à chinq chelins l'chent, une faillie récolte et la maladie pardessus l'marchi, avec touotes ces minsèthes l'affaithe est morte dans les paraisses, et d'bordées d'élections il n'y aura pon.

Ch'est que pouor abreuver les viaux et acater les siens qui sont à vendre, y faut du cliou et avec une faillie saison d'patates couomme chutte année y faut ergarder a sé et à ses sous!

Y faut pon craithe que si Samedi passé hardi de fermiers acatèrent des buns par la demie douzaine que ch'tait viyant que chunna lus faisait pus plaisi que l'fricot à la Missis! Nennin, car ils étaient fort marris d'aver à mangi des gateaux en atténdant pendant d's'heuthes lus tour d'passer sus l'bridge et en pensant qui n'pourraient pon faithe autant d'viages qu'ils avaient d'patates prêtes à apporter sus l'marchi.

A tchi la faute?

Ch'est l'Union, disaient les siens qui n'en appartiennent pon. Pourtchi aver fait v'nir en Jerri tant d'monde pouor la défouirie. Il y en a la maintchi d'trop, disaient les siens qui ieutes une job à trouver des defouisseurs.

Pourtchi èttout que l'Conmité des Havres et Chaussées à frumé l'bridge Vendredi, s'faisaient d'autres?

Ch'est viyant que l'Union a décidé de n'pon défouir que l's'autres en ont profité pouor mettre une ou deux fourches d'pus à défouir criyant que l'prix des patates s'n' allait hauchi, s'faisaient les siens de l'Union et n'v'la tchès qu'en est!

Enfin, les siens qui n'sont pas intéressis s'faisaient: Y s'ra toujours d'même avec les fermis viyant qu'il n'y a pon d'union entre ieux et qui sont jaloux l'un de l'autre. Si nous avait apporté la maintchi moins d'chèrges annièth l'prix aurait était la maintchi pus haut et touos en auraient profité.

Tandis que nos gens sont à lus plaindre et à lus lamenter, à maudithe ou à soutenir l'Union des Fermiers, l'buanhomme de Temps ritonne de touos chès d'vis.

Ch'est ly qui fait la pluie et l'biau temps et ch'est ly qui décide tchès qu'en s'ra.

Avec la fraid il a tardé les heurives et avec la mouilléture d'la pluie il a fait pousser d'la vigne mais pon grand patates dessous. Et souos ses ordres la saison est trais s'maines en retard oprès aver plianté d'pus buanne heuthe que d'vant.

Un miot d'bliaze, d'la pluie d'orage et la maladie s'est minse dans les patates juste quand nous avait buan espoir d'faithe une buanne saison.

Et chu grand coupable, l'sien cause de touotes les misèthes, ritonne car y sait bein qu'nous n'peux rein ly faithe, même pon de ly envièth Moussieu Balleine ou Moussieu Sohier pouor ly signifier d'aver à payi tous les dégâts qu'il a causé par son humeuthe capricieuse et tchique fais bé méchante!